ربع قرن من الزمان 2

النهارده الخميس 3 يونيو 2010 الساعة 5.09 م

احم احم

سلامو عليكو

ودخلت المدرسة

ده هيكون عنوان حلقتنا النهارده

انا يمكن مش فاكر اول يوم دخلت فيه المدرسة

ولا فاكر كنت فرحان ولا زعلان

بس عموما فاكر اول سنة وفاكر الناس اللي عرفتهم في الاول

اول حاجة فاكرها ان انا كنت قاعد في الدكة التانية

وكان جنبي واحد اسمه ايهاب

وانا كنت مصر ارجع اقعد في الدكة الرابعة (معرفش ليه مصر يعني)

اللي كان قاعد فيها تلاتة هما :

محمد صلاح و احمد صبحي و تامر شرف وانا كنت الرابع بتاعهم

تقدرو تقولو ان دول كانو اكتر اصحاب ليا في الفترة دي

اتنين منهم وقعو مني في السكة

والتالت كمل معايا لحد الاخر وهو محمد صلاح

وهتيجي سيرتو كتير بعد كده

تاني مشهد كان في سنة تانية ابتدائي

وكنت قاعد جنب واحد اسمه محمد جلال

واللي فاكره انه هو كان قاعد بيقولنا نكت

بس كان دمه خفيف جدا جدا

وانا من يومها حبيته قوي وبقي من اعز الاصدقاء

وده برضو من اللي كملو الطريق معايا

المشهد ده بقي كوميدي شويه

كنا في تالتة ابتدائي

وكانت بتدرسلنا الابلة سميرة وكانت طيبة قوي

وكنا بنحبها قوي قوي

هي كانت بتهتم انها تعلمنا حاجات مفيدة جنب العلم يعني

من ضمن الحاجات دي

كانت موصيانا اننا كل يوم بعد ما نروح من المدرسة نقلع الشراب

ونغسله والكلام ده كل يوم

 في يوم كنت في المدرسة

والابلة سميرة كانت موقفة واحد علينا في الفصل

بيكتب اسم اللي يتكلم (الكلام بتاع الاطفال ده)

المهم انا كنت من اللي بيتكلمو

فاول ما جت قالت كلاللي انكتب اسمه 

يقلع الجزمة دلوقتي عشان هيتمد علي رجله 

طبعا انا سمعت الكلمة دي وفضلت اعيط 

وبان عليا اني زعلان قوي 

المشكلة ان انا لوحدي اللي كنت بعيط 

وباقي العيال ولا همهم 

المهم انا صعبت علي الابلة وسامحتني 

وقالت خلاص مفيش حد هينضرب عشان خاطر عبده

اللي يضحك بقي ان انا مكنتش بعيط عشان هنضرب 

انا كنت بعيط عشان مكنتش غاسل الشراب 

ممكن حد يسأل ويقول 

طب هتعرف منين ان انا غسلت امبارح ولا لا 

اكيد مش هيتوسخ في يوم يعني 

ويبان عليه كده 

بس تفكيري وقتها مكنش فيه كدب خالص 

مش عارف كان الواحد نضيف قوي 

لسه مكملين مع المرحلة الابتدائية 

بس المرة الجاية بقي 

فاصل ونكمل 

.........

انسان عادي