اصحاب ولا نتّيتة

 

احم احم 

سلامو عليكو 

استكمالا لمسلسل الذكريات اللي فتحته امبارح ومعرفتش اكمله 

فيه موضوع بيضايقني قوي ع النت 

انا تقريبا موجود ع النت من 9 سنين 

عرفت ناس كتير من خلال النت 

ناس حسيت انهم اصدقائي بجد بجد يعني 

اتكلمت معاهم بصراحة غير معهودة 

انا من طبعي اصلا مبعرفش افضفض مع حد فيس تو فيس 

"مش اي حد يعني "

الناس اللي عرفتهم دول كان بيجمعني بيهم اما شات ع الياهو 

او منتدي بنتقابل فيه "قبل الفيس يعني "

او مدونة زي دي 

وجه عليا وقت من الاوقات مكنش ليا اصحاب تقريبا غير دول 

كانت حياتي كلها ع النت 

ومكنتش اتخيل انه هيجي يوم وملاقيش الناس دي معايا 

المشكلة ان اليوم جه 

مش النهارده يعني من زمان 

بقو يروحو واحد ورا التاني 

المفروض ان ده عادي 

ناس بتتعرف علي بعض شويه وخلاص 

مش معرفة عمر يعني 

بس انا كنت حاسبهم كده اصحابي بجد 

كانو اقربلي من اي حد 

وفجأة خلاص مش موجودين 

وتخليدا لذكراهم عشان ليهم تأثير قوي عليا 

هكتب اساميهم وكومنت صغير كده لكل حد 

علا 

اول واحدة تشوفني من جوّه كنت بكلمها كأني بكلم نفسي بالظبط 

كنت اتمني تبقي صديقتي حقيقي مش ع النت 

بس انا فاكرها دايما ومش هنساها 

مشفتهاش ومعرفش شكلها ايه علي فكرة 

قعدنا اصحاب تقريبا تلات سنين

ايمي "ايمان"

دي كانت صحبتي الانتيخ

الانتيخ قوي 

رورو "رويدا"

الحب الفاشل 

مروة & هند

اخواتي الصغيرين 

اللاسعة 

سارة درويش 

من اعز الناس الي قلبي ع النت فعلا 

هي اللي عرفتني طريق البلوجر 

وفي ناس كتير غير دول كمان 

بس ايه ده 

هو ليه مفيش شباب ؟؟؟

استنو كده !!!!!

مش لاقي 

هي دي حاجة غريبة ولا ده عادي ؟؟؟

متهيألي عادي 

المهم كلنا ندعي لهم بالتوفيق في حياتهم ان شاء الله 

سلامو عليكو 

انا مش فارس الاحلام

 

نو كومنت

سلامو عليكو 

ذكريات

احم احم 

سلامو عليكو 

ازيكو يا مدونيين 

وحشتوني جدا 

عايز بس اعترف اعتراف صغير كده 

فعلا اللي اخترع التدوين ده كان عبقري 

انا اسوأ لحظات حياتي نفسيا لما ببقي بعيد عن المدونة دي 

او عن الكتابة يعني بشكل عام 

انا جاي النهارده وعايز اتكلم عن الذكريات 

انا شخصيا مبحبش الذكريات 

مع اني من الناس اللي بتحتفظ باي حاجة تخلي الذكريات دي عايشة او علي الاقل متموتش يعني 

بس بتعب او بتأثر جامد قوي كل اما ادخل في الذكريات دي 

يعني مثلا من كام يوم كده قلبت في دفاتري القديمة 

ودفاتري القديمة دي كانت مدونات برضو 

كان عندي مدونة زمان اسمها 

حالات في كلمات 

كنت بكتب فيها جزء شعري كده وبشرح الحالة بتاعته 

رغم ان الشعر مكنش قد كده يعني 

بس كانت الحالة حلوة وبتمس ناس كتير 

المهم ما علينا 

المشكلة اني لما كنت بكتب حاجة من دي كنت بعيشها بجد 

هي مش شرط تكون حقيقية بس كنت بوهم نفسي بيها انها حقيقية عشان اطلعها بشكل كويس والمشكلة الاكبر انها بعد ما بتطلع سواء كانت كويسة او وحشة بقي انا مبعرفش اخلع منها 

بحس انها فعلا حقيقية لدرجة اني كل لما اقرا الحالة دي 

ارجع لنفس الشعور تاني 

علي فكرة انا تقريبا قعدت فترة كبيرة جدا مدخلش علي المدونة دي اللي هي حالات في كلمات لدرجة ان الاكونت اللي كان علي مكتوب اتقفل وللاسف مش عارف ارجعه ولا ادخل عليها اصلا 

بس مش مشكلة لاني مكنتش هكتب فيها اي حاجة تاني اصلا 

بس بصراحة حسيت ان فيه حاجة ضاعت مني 

كنت حاسس انها جزء مني وضاع 

هي اكيد جزء مني 

احم 

نرجع بقي للذكريات 

هي الذكريات دي حاجة كويسة ولا حاجة مش كويسة 

انا اكتر حاجتين بيتعبوني في حياتي 

المدونة دي ودرج المكتب عندي 

عشان فيه بلاوي 

بس مش قادر اتنازل عن حاجة فيه 

سلام دلوقتي عشان الحالة بقت صعبة قوي ومش عارف اكتب 

اشوفكو قريب ان شاء الله 

سلامو عليكو 

"لوليتا " وحرية التعرّي

احم احم 

سلامو عليكو 

وحشتوني كتير جدا 

عارف اني مقصر بس معلش بقي 

الكسل وحش 

المهم انا كنت مريح كتير قوي ومش بكتب حاجة 

مع ان كان فيه حاجات كتير قوي تستحق الكتابة يعني 

بس بصراحة اكتر الموضوعات استفزازا لحد دلوقتي الانسة لوليتا 

اكيد طبعا كلنا سمعنا عنها وعن افكارها وجرأتها و..........

بصراحة بالنسبالي مفيش مشكلة 

واحدة عايزة تقلع وتنشر صورها ماشي 

ماهو كل يوم في الاف يعني بيقلعو 

في ناس بتداري حاجات وتظهر حاجات 

وناس تانية بتظهر كل حاجة 

مش دي المشكلة 

اللي استفزني اكتر التعليقات علي الحكاية دي 

معظم الناس اللي علقو علي الموضوع ده بيقول فيما معناه 

رغم اختلافي معاكي الا اني عاجبني جرأتك جدا 

مع كامل احترامي لجميع الناس

الا اني مش شايف دي جرأة 

دا تجرّأ يصل الي السفالة

مش هتكلم من اي ناحية دينية 

لان طبعا زي ما هي قالت انها ملحدة ولا تؤمن باي دين 

واخلاقيا برضو هي اكيد كمان وجهة نظرها انها بتعمل عمل بطولي 

وعادي لما يحصل شويه اخطاء بسيطة 

مفيش مشكلة يعني 

بس اللي انا عايز افهمه فعلا وبجد والله 

ايه الحرية في ده 

يعني هي شايفة اننا مجتمع متخلف 

شكرا يا ستي 

ايه اللي هيغير التخلف ده بقي لما نشوف صورة سيادتك عارية 

ايه علاقة الحرية بالعري 

حد يديني الحلقة الماسكة الاتنين دول ببعض

حرية شخصية مع نفسك 

اقفلي اوضتك يا انسه واعملي اللي انتي عايزاه 

وهتفرق في ايه يعني اتصورتي في بيت والدك ولا بيت شريكك "علي حد قولها يعني"

متهيالي مش هتفرق كتير يعني 

ماهو اكيد الصورة دي مش جديدة عليه يعني 

والله انا مش عايز اجي قوي علي البنت 

هي حاجة برضو لسه صغيرة 

17 سنة او ازيد شويه 

بس دي برضو سفالة 

وكمان الخبر اللي داير قوي ع الفيس 

ناشطة سياسية مش عارف تعمل ايه .....

ناشطة مين ياعم 

الله يسامح الثورة اللي عملت اي حد ناشط سياسي 

بأمارة ايه يعني ناشطة 

وبامارة ايه سياسية

ولا صحيح اللي خلي الاخ سبايدر ناشط سياسي 

يخلي الاخت لوليتا ناشطة 

بصراحة انا بدأـ اضايق واتخنق من اللي بيحصل 

شايف كل شويه ماشيين في طريق 

والثورة انضربت 

والدنيا باظت 

ومحدش فاهم حاجة 

الله يرحمك يا مصر 

سلامو عليكو

ايزيس

إيزيس

نفسي أنام فينك؟
يا ام الرموش عنقريب
(العنقريب سرير يصنعه اهل النوبة من الجريد)
ماتدمّعيش عينك
الفرح جاي عن قريب

إيزيس

إزاي بتتحمّل؟؟
أنساها .. وتجيني ..
أسقي بنات الدنيا إلاّها
ولما العطش يكويني ألقاها
هي اللي تسقيني
تهديني يوم وردة
أدِّيها لفلانة
تجري على حضني احكيلها عن نانا

إزاي بتتحمّل؟
غمز البنات واوعر من غمزهم ردِّي
جاياني ملهوفة ما تلاقي غير صدِّي
أحزن في أحضانها وافرح هناك وحدي
يا ام القليب اتخلق معرفش غير يِدِّي

يا ام الفؤاد ولاّد
معرفش غير يعشق
الصبر عدّى وزاد
يا قلبها المتقاد
ما عرِفت يوم تزهق
كانت بتلبس لي اجمل فساتينها
ترمي ف صحاريا أفتن بساتينها
تِدْمع رياحينها
ولا قلبي يوم يشفق

وإزاي بتتحمل ؟؟؟
كُتر الكلام عني بحكاوي وانا غايب
الليلة كان سهران
الليلة كان سكران
الليلة كان عاشق والليلة كان دايب

يا ام الرموش طايشة وام العيون لامّة
حضبك ما حيسعنيش انا بَلْوِتي طامّة
اربع سنين يا هوا مِلْكِيّتي عامّة

كل البنات اتلبنوا بيا وتفُّوني
ورسموني خروف معلوف وسمعوا قصايدي وابتسموا وصحيم

بدري يوم العيد ودبحوني
بقالي ييجي اربع سنين مسمار في غيط شواكيش
دَقُّوا على راسي لكن مثبتونيش
يوم التقي مرسى وسنين ياخدني الطيش

كل الالم فيّا ومش قادر اتألم
وبتصعبي عليا ومش بقدر اتكلم
انا نفسي بس افهم
كل البلاوي ديا ازاي مابعّدوكيش

سامحيني لما اغلط
وانا تاني رايح اغلط لجلٍ تسامحيني
احلى ما في التوهان اول ما باجي اوصل 

واحلى ما في الاحزان انك تضميني

يا مسكناني ضلوع
جواكي راح وبراح
ما بينلهاشي رجوع
شكلي حاموت سواح

كان نفسي فيكي زمان أياميها كان لي قلب
كانت الحياة خضرا
النخلة والبقرة
والقلب طين ابيض بينام على القرآن وبيصحى وقت الحَلْب
اياميها كان لي قلب
ايه اللي قلب النور ضلمة وليل راسي؟
واشمعنى فوق راسي يحلا العذاب والقلب؟
واشمعنى سابوا الناس بقلوب خضار وعمار ؟ وف قلبي نِزْلوا سَلْب ؟
انا اول اللي اتصلب بس التاريخ كداب مفهمش معنى الصلب
ركعوا البنات ليا واتّنوا قدامي
وفي حفل اعدامي
ضحكوا وقالوا كلب

انتي اللي دمّعتي
جمّعتي جسماني من مملكة ايزوريس ويا ريت ما جمّعتي
طب كنتي سبتيني ادخل هنا غزوة واعمل هنا هُدْنة
وما دمت انا ميت ايه تِفْرِق الدفنة؟
ما البحر راح يسبق لو مهما جدّفنا
انتي اللي بتعاندي وعشمانة في الجنة
والجنة مش ليا

إزاي بتتحمل لوم الصحاب فيا؟؟
على ايه غرامك بيه؟
ده التبن من تحتيه
باقي الماعون مية
تضحك على قولهم وتبص في الساعة وتقول زمانه صِحِي
زيدي كمان نورك يا ام الجبين الضَّحِي
جَنّنِي صوت حزنك إياكي يوم تفرحي
لا الفرحة تسرقنا

لا انا حِمل مهرك ودهبك ولا جاي معاي عاجِك
ولا حمل توب من حريرك ولا ماسة من تاجك
ده انا بالكتير حاجج من وسط حجاجك
جيت لك في شهر حرام فمتهدريش دمي
ماتقربيش مني مانتيش كِفَا همي
وَلِّي لحجاجك يا ام الجبين عرفات
حبك كما الصلوات والقِبلة مش يَمِّي

يا معلماني الهوا ومسَكِّنة التباريح
حبك نخيل طارح ميهزهوش الريح
ارمي الحجر جارح تنزِل رطب مجاريح
إزاي بتتكسر اشواكي جواكي
ابكي على صدرك القى البكا تفاريح

إزاي بتتغير دنيايا جوايا اول ما اكون جنبك
وإزاي يجيلك صبر تنشفي بكايا والذنب مش ذنبك
انا الاعمى
جفاني الحب ونسيته على ايدين اللي تتسمى ما تتسمى
قطع راسي على خوانة ولا كَبَّر ولا سمّى
ولا سابني اموت مستور ولمّ عليا ميت لمّة
وذنبك ايه بقية السكة تقضيها بعجوز اعمى؟

انا اللي الناس بتخشاني هوا ومنظر
هموم الدنيا خاشاني وبتمنظر
وعايش عيشة خشّاني وبتغندر
وبتلكلك في حضن الليل سُكّيتي
عواصفي فوق حدود وصفي
وبابك صعب يتحمل عواصف مهما سَكّيتي

انا المدبوح ولما تقول لي حبيتك بحس دماغي واكلاني
اردّ بايه على بنيّة في كل كيانها شايلاني
انا المجرم وانا القاسي وانا اللي نسيتها ميت مرة ما نسيتني
ومشيتها في دروب مرة ما ملّتني
وداست ع الطريق حافية وسلّتني
وصحيت بدري وقت الفجر صلّتني

ارد بايه؟
وقلبها سابها في متاهة
قليل الاصل غَيَّاها
وقلبي التاني قسّاني وقلّ باصله ويّاها


غرامك يا ام طيف مخمل بيتجمّل
ويفرش صدري بالعنبر وبالمحمل
انا المعشوق يا كل العاشقين غيروا
تحبوا شيء جميل طبعا لكن تتحبوا ده الاجمل
حبيبتي احلى من شعري واحلى م الحروف كُمَّل
ولا بتهجر ولا بتغدر ولا بظلمها تتململ
لكني في حيرتي بستغرب
انا ازاي مش بغني لها ؟
وهي ازاي بتتحمل؟؟؟؟

العاصفة

احم احم

سلامو عليكو

فاكرين فيلم العاصفة بتاع خالد يوسف 

بتاع حرب العراق والاخين اللي واجهو بعض 

عارفين الاحساس ده 

لما تكون انت في موقف واخوك في موقف معادي 

واقف قصادك وشك في وشه

انا تقريبا حاصل معايا الموقف ده 

بس مع بعض التعديلات 

اولا انا مش واقف قصاد اخويا 

انا واقف قصاد نفسي

حبة توضيح بقي

طبعا انتو عارفين ان انا في الجيش الايام دي

في ايام ثورة يناير وبالظبط يوم الخميس 10 فبراير انا كنت في ميدان التحرير 

انا مكنتش لسه بقيت ظابط ومكنتش مسؤول عن حاجة 

انا كنت في التحرير يومها كمتظاهر 

ولو كنت موجود في بيتنا في الايام اللي قبل التاريخ ده 

كنت قضيتهم في التحرير مع الناس 

ولكن للاسف كنت في الجيش 

المهم انا ساعتها مكنتش بفكر قوي ان انا في الجيش ومينفعش ابقي متظاهر 

كنت بتعامل زي ما بيقولو عندنا في الجيش "ملكي"

والحمد لله الثورة نجحت 

نيجي بقي بعد 5 شهور من اليوم ده 

انا بقيت ظابط والمفروض اني مسؤل 

وبكرة الجمعة 8 يوليو المفروض ان فيه ثورة الغضب التانية 

انا بكرة موجود في الوحدة بتاعتي بأمنها من اي حد 

بغض النظر عن اي حاجة 

سواءا بقي اللي في التحرير صح ولا غلط 

الجيش صح ولا غلط 

بس في 5 شهور انا اتحولت من الصف ده للصف اللي في المواجهة

والصراع بقي داخلي 

عارفين ابو العربي وهو بيقاسي مع حرب الجينات اللي عنده 

بين ابوه الشهيد وخاله الواطي 

اهو انا تقريبا في نفس الموقف 

عارف ان الجيش متكاسل ومتراخي في اخد قرارات لازم تتاخد

بس كمان قربت ازهق من الفوضي اللي في البلد

عارف كويس جدا ان النظام السابق مش هيمشي بسهولة 

ولازم "يفرفر "قبل ما يموت 

دي حاجة منطقية يعني 

بس احنا كمان لازم نبقي اذكي من كده 

ونفهم احنا رايحين فين 

مش عارف اقول لحد روح التحرير 

ومش جايلي قلب اقوله ما تروحش 

بس ياريت اللي رايح يتظاهر باسلوب محترم ويراعي سمعة مصر 

ويحترم مشاعر قوات الامن اللي هتبقي موجودة 

ارجوكم بلاش استفزاز لا للشرطة ولا للجيش

الناس دي مش هما اللي سرقوكم والله 

اذا كان في خطأ في القادة بتوعهم بلاش تاخدوهم بذنبهم 

اكيد اللي موجود في التحرير من الامن رايح علشان يأّمن مصر 

وشعب مصر 

يا اهل التحرير خافو علي مصر 

امنعو البلطجية من انهم يوصلو لغرضهم 

البلطجية بيستخبو بينكم 

ربنا يوفقكم ويحميكم 

ويحمي مصر وينصرها 

اللهم امين

سلامو عليكو

النظام الفوضوي & الفوضي المنظمة

احم احم 

سلامو عليكو

انا بكره النظام

طبعا عنوان زي ده زمان كان عمل قلق 

كلمة نظام في حد ذاتها بقت ليها هيبة داخليه كده

بس انا هنا مش بقصد النظام اللي هو الحكومة السابقة 

انا بكره النظام اللي هو الترتيب 

اه انا مش بحب الفوضي 

بس برضو بيبقي شئ ممل لما كل يوم تبقي نفس  الحاجات بنفس الشكل 

خصوصا بقي لو كان النظام ده ظاهريا بس 

يعني نرتب الشكل من بره ومن جوه فوضي 

ندي مثال عشان نفهم 

مثلا ايام ما كنت لسه في الكلية وكنت بذاكر بقي وكده

"طبعا الكلام ده في شهر الامتحانات يعني بس"

انا كانت عندي عادة كده 

عندي طرابيزة كبيرة شوية كده ومكتب 

بحط كل الكتب والورق المتعلق بكل المواد بتاعتي علي الطرابيزة دي

بتبقي كل مادة ورقها وكتبها وكشاكيلها 

بس ده مش بيبقي واضح لاي حد يعني 

تقريبا انا بس اللي كنت شايف كده

لان كل يوم لما يجو يرتبو الاوضة بتاعتي 

بلاقي كل الكتب والورق والكشاكيل اتلمو علي بعض 

واتحطو علي المكتب 

والاقي الطرابيزة عليها مفرش جميل وحاجة زي زهريه كده

هما فاكرين كده انهم رتبو الكتب 

لكن بالنسبالي هي اتلخبطت 

وفاكرين ان منظر الطرابيزة بقي اجمل 

لكن برضو انا شايف ان ده محصلش 

لان وظيفة الطرابيزة اني اذاكر عليها 

مش انه يتحط عليها مفرش جميل وزهرية 

الممل في الموضوع ان الحكاية دي كانت بتحصل كل يوم 

يعني انا اخرج من بيتنا حتي لو نص ساعة 

ارجع الاقيهم رتبو الاوضة 

يعني من وجهة نظري انا بوظو النظام اللي انا عامله 

وقولتلهم ملايين المرات محدش يرتب كتبي 

اعملو اي حاجة في الاوضة 

بس سيبو الطرابيزة والمكتب 

اتهموني ان انا مش بحب النظافة

ومش مرتب 

وحاجات تعبانة كده

اللي انا عايز اوصله بقي ليكم 

ان النظام  ده برضو حاجة نسيبة 

يعني انا بستخدم الحاجة دي يبقي اجدر واحد يقدر ينظمها 

حتي لو شكلها قدام الناس انها في حالة فوضي 

وبما اني مهندس برضو اتعلمت حاجة 

ان الهندسة هي انتاج سلعة بأقل تكلفة وأقل مجهود واعلي جودة 

فكل واحد بينظم حياتو علي اساس هو ممشيها ازاي 

يعني انا مقدرش اقول عليك انت مش منظم طالما انت ناجح في حياتك 

النظام اسلوب له اشكال مختلفة 

المهم تكون فاهم 

وانا شخصيا من عشاق الفوضي المنظمة 

بتبقي ممتعة اكتر من النظام والترتيب الروتيني اللي اي حد يفهمه 

ويتعامل معاه 

مش عارف وجهة نظري وصلت ولا لا 

بس عموما انا بكره النظام بتاعكو المتعارف عليه

شكرا 

سلامو عليكو