28‏/04‏/2010

اخر الرجال المحترمين

النهارده الاربع 28 ابريل 2010 الساعة 2.31 م 




سيرة ذاتية للشيخ جاد الحق على جاد الحق.. الإمام الأكبر "رحمه الله"


مولده ونشأته :

وُلِد الشيخ جاد الحق بقرية "بطرة" التابعة لمركز "طلخا" بمحافظة "الدقهلية"
الخميس الموافق (13 جمادى الآخرة سنة 1335 هـ = 5 من إبريل 1917م)،
وتلقى تعليمه الأوْلِي في قريته، فحفظ القرآن الكريم، وتعلم مبادئ القراءة والكتابة،
ثم الْتحق بالمعهد الأحمدي بطنطا، وأنهى المرحلة الابتدائية به، وانتقل إلى المرحلة الثانوية،
واستكملها في القاهرة في معهدها الديني بالدَرَّاسَة، وبعد اجتيازه لها التحق بكلية الشريعة،
وتخرَّج فيها سنة (1363هـ = 1944م)، حاصلاً على الشهادة العالمية،
ثم نالَ تخصص القضاء بعد عامين من الدراسة،
وكان الأزهر يعطي لمن يحصل على العالمية في الشريعة أن يتخصص في القضاء لمدة عامين،
ويمنح الطالب بعدها شهادة العالمية مع إجازة القضاء.

بعد التخرج :
عمل جاد الحق بعد التخرج في المحاكم الشرعية في سنة (1366هـ = 1946م)،
ثم عُيِّن أمينًا للفتوى بدار الإفتاء المصرية في سنة (1373هـ = 1953م)،
ثم عاد إلى المحاكم الشرعية قاضيًا في سنة (1374هـ = 1954م)،
ثم انتقل إلى المحاكم المدنية سنة (1376هـ = 1956م) بعد إلغاء القضاء الشرعي، وظلَّ يعمل بالقضاء،
ويترقى في مناصبه حتى عُين مستشارًا بمحاكم الاستئناف في سنة (1396هـ = 1976م).
وقد حفظت سجلات المحاكم التي عمل بها أحكامه القضائية في أثناء عمله بها أحكامه القضائية في أثناء عمله بالقضاء،
وتشتمل على بحوث وتعليلات واجتهادات في التطبيق،
وقد نشرت المجلات القانونية في مصر بعضًا من تلك الأحكام،
وفي كثير منها أحكام لما استجد من مستحدثات لم يعالجها الحكم الفقهي من قبل.

جاد الحق مفتيًا: 

عُيِّن الشيخ جاد الحق مفتيًا للديار المصرية في (رمضان 1398هـ = أغسطس 1978م)
فعمل على تنشيط الدار، والمحافظة على تراثها الفقهي، فعمل على اختيار الفتاوى ذات المبادئ الفقهية،
وجمعها من سجلات دار الإفتاء المصرية، ونشرها في مجلدات بلغت عشرين مجلدًا، وهي ثروة فقهية ثمينة؛
لأنها تمثل القضايا المعاصرة التي تشغل بال الأمة في فترة معينة من تاريخها،
وفي الوقت نفسه تستند إلى المصادر والأصول التي تستمد منها الأحكام الشرعية.
وتشمل اختيارات الفتاوى ما صدر عن دار الإفتاء في الفترة من سنة
(1313هـ = 1895م) حتى سنة (1403 هـ = 1982م)،
وضمت المجلدات الثامن والتاسع والعاشر من سلسلة الفتاوى اختيارات من أحكامه وفتاواه،
وتبلغ نحو 1328 فتوى في الفترة التي قضاها مفتيًا للديار المصرية.

توليه مشيخة الأزهر:

عُيّن وزيرًا للأوقاف في (ربيع الأول 1402هـ = يناير 1982م)،
وظلَّ به شهورًا قليلة، اختير بعدها شيخًا للجامع الأزهر في
(13 من جمادى الأولى 1402هـ = 17 من مارس 1982م)،
وبدأت فترة زاهية من فترات تاريخ الأزهر؛ سواء فيما يتصل بمؤسسة الأزهر،
أو بدورها باعتبارها القائمة على الفكرة الإسلامي والتعليم الديني في مصر، ومحط أنظار الناس، ومعقد أمانيهم.
وكان لاشتغال الشيخ جاد الحق بالقضاء منذ وقت مبكر أثره البالغ في قيادته الأزهر،
فهو فقيه قاضٍ يعتمد على الدراسة المتأنية والنظر العميق،
والبُعْد عن الهوى، ومن ثَم كانت قراراته صائبة، هادئة،
بعيدة عن العاطفة المشبوهة والانفعال المؤقت، وتهدف إلى الصالح العالم.
 
مواقف الشيخ :

عُرف الشيخ في الفترة التي تولَّى فيها مشيخة الأزهر بمواقفه الجريئة، والصدع بما يعتقد أنه الحق والصواب،
وإن خالف هوى الناس وأغضب السلطان،
فقد أعلن بعد توليه المشيخة تأييد الأزهر للجهاد الأفغاني ضد المحتل الروسي،
وعدَّ ما يحدث في البوسنة والهرسك حربًا صليبية جديدة تهدف إلى إبادة المسلمين،
ودعا إلى الوقوف إلى جانب المسلمين والدفاع عن قضيتهم،
وكان له مثل هذا الموقف مع المسلمين الشيشان في جهادهم للروس، ومع الانتفاضة الفلسطينية.
ويُذكر له موقفه الواضح من التطبيع مع إسرائيل، حتى إن كانت هناك اتفاقية سلام بين مصر وإسرائيل،
واشتدَّ في معارضته للتطبيع، في الوقت التي نشطت فيها حركات التطبيع في بعض مؤسسات الدولة،
فأفتى بعدم جواز زيارة القدس إلا بعد تحريرها، ورفض استقبال أي وفد إسرائيلي يرغب في زيارة الأزهر،
وإنْ سبَّب ذلك حرجًا للمسؤولين.

مؤتمرا المرأة والسكان: 

وكان للشيخ رأي واضح في مقررات مؤتمر السكان الذي تم عقده في القاهرة في
(ربيع الآخر 1415هـ = سبتمبر 1994م)،
فعارض دعوات الانحلال الأُسري والشذوذ، والخروج على الفطرة السليمة، وتعاون معه –
في رد تلك الدعاوى- نفر من المخلصين، وكان لحضورهم هذا المؤتمر
ودحضهم تلك الدعاوى أثره في إحباط ما كان يخطِّط له القائمون على المؤتمر،
وتكرَّر منه هذا الموقف الواضح في رفضه لوثيقة مؤتمر المرأة الذي تم عقده في بكين في
(جمادى الأولى 1416هـ = سبتمبر 1995م).

موقف من التطرف: 

هال الإمام جاد الحق أن يتخذ نفر من الكُتّاب من تطرف بعض الشباب ذريعة للهجوم على الإسلام
ومبادئه دون وازع من ضمير أو تسلح بثقافة وعلم، فانطلق قلمه يصدع بالحق ويفضح سموم بعض الكتبة بقوله: "
وقد أفزعت الحرية من مفهومها الصحيح، حتى صارت الدعوة إلى الفساد حرية،
وصار الطعن في الإسلام وصلاحيته حرية،
ثم صارت المسارعة إلى توزيع الاتهامات على الناس أسبق من نتائج التحقيق التي تقوم بها الجماعة المختصة".
وحين أعلنت بعض الصحف عن مسابقة لاختيار ملكة النيل، فزع من تطرف بعض المترفين وانسياقهم وراء الهوى والضلال، وكتب مقالة في غاية القوة والبيان بعنوان "أوقفوا هذا العبث باسم وفاء النيل"،
وعدَّ هذا التصرف الطائش عودة إلى سوق النحاسة والرقيق الأبيض، وردَّة إلى الجاهلية العمياء،
لا يُفرَّق فيها بين الحلال والحرام.

جهود الشيخ في مؤسسة الأزهر: 

يُذكر للشيخ جهوده في نشر التعليم الأزهري والتوسع في إنشاء المعاهد الأزهرية في أنحاء مصر،
وكانت سمعة الشيخ وثقة الناس فيه تجعل الناس يتسابقون في التبرع لإنشاء المعاهد الدينية،
وتقديمها للأزهر للإشراف عليها، وبلغت المعاهد الأزهرية في عهده خمسة آلاف معهد،
وأنشأ فروعًا للجامعة الأزهرية في بعض محافظات مصر ومدنها الكبيرة.
ولحرصه على أن يجد الناس مبتغاهم فيما يتعلق بأمور دينهم فقد دعَّم عمل لجنة الفتوى الرئيسية بالجامع الأزهر
بإنشاء فروعًا لها في كل منطقة أزهرية في كل محافظات الجمهورية، فبلغت خمسًا وعشرين لجنة،
وانتقى لها أفضل العناصر من العلماء، الذين يجيدون الفتوى، وأمدها بالكتب التي تحتاجها في أداء عملها.

مؤلفات الشيخ :

للشيخ جاد الحق مؤلفات عديدة منها: "الفقه الإسلامي مرونته وتطوره"، و"
بحوث فتاوى إسلامية في قضايا معاصرة"، وصدر من الكتاب أربعة أجزاء،
وهي تضم الفتاوى والبحوث التي أصدرها الشيخ منذ ولايته المشيخة، وله "
رسالة في الاجتهاد وشروطه"، وأخرى بعنوان "رسالة في القضاء في الإسلام".
ويبرز في كتبه منهجه في التفكير الفقهي؛ حيث يبدأ القضية بالتعريف اللغوي لها،
ثم يتبعها بالتعريف الشرعي، ويتلو ذلك بيان الحكم وفق المذاهب الأربعة وغيرها، ثم يقوم بالترجيح بين آراء العلماء لاختيار الرأي الذي يرتضيه، ويكون محققًا للمصلحة التي يبتغيها الشارع الحكيم.

مكانة الشيخ :

كان الشيخ جاد الحق قدم راسخة في العلم، وعقل راجح، ورأي صائب، وقدرة على الاستفادة من أهل العلم، فاستخلص منهم طائفة استخدمهم في الدفاع عن الإسلام، وجلاء قضاياه، والرد على ما يقوله المغرضون،
فقَوِيَ بهم الأزهر، واشتد ساعده.
وعرف العالم الإسلامي مكانة الشيخ وفضله فمنحه أرفع الجوائز والأوسمة، فمنحته مصر "وشاح النيل"،
أعلى وشاح تمنحه الدولة في (سنة 1403هـ = 1983م) بمناسبة العيد الألفي للأزهر، ومنحه المغرب وسام "
الكفاءة الفكرية والعلوم" من الدرجة الممتازة،
وحصل على جائزة الملك فيصل العالمية لخدمة الإسلام سنة (1416هـ = 1995م).

وفاة الشيخ :

وبعد حياة طويلة مليئة بجلائل الأعمال، تُوفِّي الإمام الأكبر "جاد الحق على جاد الحق"
إثر نوبة قلبية ألمَّت به الجمعة الموافق (25 من شوال 1416هـ = 15 من مارس 1996م)
عن عمر يناهز التاسعة والسبعين. 


احم احم 
سلامو عليكو 

اولا انا مش بقصد بكلمة اخر الرجال المحترمين دي
ان اللي جم بعد كده مكنوش محترمين 
طبعا لا دي ناس محترمة جدا 
ولكن يمكن ده اللي اثر فيا اكتر وبشكل كبير 
يمكن انا ملحقتهوش الا في فترة بسيطة وكان ادراكي ساعتها مش كبير 
يعني تقريبا هو اتوفي وانا كان عندي 11 سنة 
بس في الفترة دي كنت حاسس بيه وشايف انه شخصية قوية 
يمكن من كلام الناس عليه قصادي 
كنت شايفه راجل وسمت عليه شخصية شيخ الازهر 
يعني اللي ممكن يبقي شيخ للازهر لازم يبقي زي ده 

الراجل ده يا جماعة زي قرينا كان قاضي وبعدين رئيس محكمة 
وبعدين مفتي وبعدين وزير وبعدين شيخ للازهر 
يعني مراتب رفيعة جدا 
ورغم كل ده مغيرش شقته اللي كان قاعد فيها في المنيل 
وبيته اللي كان في البلد في الدقهلية فضل زي ماهو 
ما شفناش عمارة طلعت مكانو ولا حاجة 

ومن الحاجات الي سمعتها عنه كمان 
ان هو كان عامل جمعية خيريه في البلد عندهم 
وكان  جاله ناس كويتيين علي ما اعتقد 
وقالوله عايزين نتبرع ونبني مسجد في القرية 
رد عليهم وقالهم :
الناس ممكن تصلي علي الارض عادي 
جعلت لي الارض مسجدا وطهورا 
لكن مش ممكن الناس تتعالج علي الارض 
او تتعلم علي الارض 
لو عايزين تتبرعو بجد يبقي تبنو مستشفيات 
او مدارس ده افيد للناس 

بجد حاجة زي كده بتوضح انه رجل فاهم كويس 
وتهمه المصلحة بالدرجة الاولي 
سيبك بقي من المناظر والكلام الفاضي ده 

عموما انا حبيت اتعرف معاكو علي شخصية زي دي 
فيها حاجات كتير نتعلم منها 
واكيد مهما قلنا مش هنديله حقه 
ربنا يرحم الامام الاكبر وشيخ الازهر الاسبق 
الشيخ جاد الحق علي جاد الحق 

شكراااا 

فاصل ونكمل 

.........

انسان عادي

26‏/04‏/2010

دمعت لما شفتها


 النهارده الاتنين 26 ابريل 2010 الساعة 3.20 م 





دمعت لما شفتها

دمعت لما شفتها .. مكسورة زي ما سيبتها
من كام سنه ودعتها .. وقولت مفيش مابينا نصيب
وبعدت قلبي عنها  ..  وخادتني دنيا وعشتها
ومفتكرتش انها   ..  لسه عاملاني حبيب

انا قولت نسيت وابتدت تعيش حياة زي البشر
تحب تاني وتنسي تاني كأن ولا شئ انكسر
اتاريها عايشه في الجراح ودموعها لسه في خدها
لا عمرها نسيت ولا عاشت يومين بعد الفراق
من شكلها باين عليها قاتلها موت الاشتياق
حبيتني بس جنيت عليها بكل قسوة جرحتها

الدموع اللي في عنيها  ..  كل ما اقرب عليها
فيه سؤال بحسه فيها   .. انت ليه عذبتني
انا كنت فاكر شوقها عادي  .. بعد يوم راح يبقي ماضي
واديها بعد سنين قصادي  .. شوقها ليه خضني


احم احم 
سلامو عليكو 

معلش غصب عني رجعت للاغاني تاني 
حاسس اني هيجرالي حاجة لو مكتبتش 
استحملوني بقي

احم احم 

الاغنية دي انا عشتها يمكن مش بنفس الدرجة دي 
بس الاحساس كان موجود 
لما تكون بتحب حد بطريقة كبير وهي كمان بتبادلك نفس الشعور 
ويمكن اكتر 
بس ظروفك بتحكم بحاجات معينة 
ممكن تكون سافرت وسبت البلد مثلا 
يعني مش خيانة ولا فراق 
المهم وانت بعيد بيبدأ الحب يقل شويه شويه من عندك 
ومتخيل برضو ان الحب بيقل من عندها هي كمان 
وبتاخدك الدنيا بقي وبتعيش وممكن تحب تاني 
وتعيش حياتك 
وبيجي وقت رجوعك تاني 
وبتصادف انك تقابل حبيبتك الاولي 
وهنا بتكون الصدمة 
انت متخيل انها نسيت زي ما انت نسيت 
لكنك بتلاقي واحدة جواها شوق وحب اكتر من الاول 
واحدة كانت عايشة بس عشان ترجعلها تاني 
وموقفة حياتها علي اليوم ده 

غصب عنك لما تشوفها بالمنظر ده 
عنيك دمعت 
حسيت دلوقتي بس انك خنتها 

ويعني بتحاول تتهرب من نظرتها ولومها 
وبتقول لنفسك 
انا كنت فاكرها هتنسي 
بس للاسف ده محصلش 

طبعا الاحساس ده تعبني جدا لما عشته 
وتعبني اكتر وانا بكتبه 


بس 

فاصل ونكمل 

......

انسان عادي

25‏/04‏/2010

ما احلي النظام في زمن الفوضي

النهارده الاحد 25 ابريل 2010 الساعة 6.15 ص 



احم احم
سلامو عليكو

انا بطبعي مش بحب اكون عادي زي اي حد
ومش بحب امشي مع الموجة
ومش بحب اكون نسخة مطبوعة من بشر كتير
يعني بحب اكون مختلف

بس اكتشفت بقي كمان ان المتعة الاكبر لما تكون مختلف وصح
يعني مش خالف تعرف لا خالف عشان ده الصح

مثلا في الميترو الايام دي عاملين بابين للصعود وبابين للنزول
طبعا قلما حد يلتزم بالكلام ده الا صدفة بقي
لو لقي نفسه قدام الباب الصح
الا من رحم ربي طبعا
انا بقي بقيت التزم جدا بالحكاية دي
بحس بمتعة كبيرة وانا بعمل حاجة صح ومنظمة
خصوصا لو هي مش منتشرة او سائدة

حتي في الشارع
لما اكون معايا منديل ورق عايز ارميه
او كانز حاجة ساقعة
الشارع ممكن يكون زبالة ومش هيفرق يعني الورقة اللي هرميها
بس انك تعمل الصح دي متعة لوحدها

متتصوروش بفرح قد ايه لما افضل الف وادور علي باسكت عشان ارمي فيها الحاجة دي
وطبعا بفرح اكتر لما بلاقيها عشان مش دايما بلاقيها

ولما تكون قاعد في اتوبيس او المترو برضو
وتقوم عشان تقعد حد كبير او حد تعبان مكانك
او حتي واحد عادي لو انت مشوارك بسيط و ميستاهلش قعدة يعني
برضو بفرح بيها جدا

وفيه حاجة كمان هو مش دايما بعملها
بس عملتها ساعات
هي بصراحة في المترو بس
لما حد يرمي ورقة مثلا في المترو
ومن المعروف ان المتر من انضف الاماكن في بلدنا
علي الاقل الاماكن اللي انا شفتها
ممكن اروح واشيل الورقة دي وارميها في الباسكت
ممكن ناس ميعجبهاش الكلام ده وتقول انا مالي
كفاية انا اكون ملتزم وانا مش همشي الم الزبالة يعني
بس انا بقول يمكن حد يشوفني وتكون نفسيته حلوة ويعمل زيي

بجد انا بحس بمتعة كبيرة وانا ملتزم
وبحس ان انا ليا قيمة كده

فعلا

ما احلي النظام في زم الفوضي

بس خلاص

فاصل ونكمل

......

انسان عادي

24‏/04‏/2010

عمرك سمعت فيلم رعب ؟؟؟

النهارده السبت 24 ابريل 2010 الساعة 12.28 ص 


احم احم
سلامو عليكو

سؤال بسيط

فيه حد فكر يسمع فيلم رعب ؟؟
وانا قاصد هنا كلمة يسمع يعني من غير ما يشوف

انا حصلت معايا الحكاية دي

كنت اول امبارح عند الحلاق عشان احلق
( عادي يعني )ء
المهم كان شغال في التلفزيون فيلم كامب
وانا مكنتش سمعته قبل كده
واللي اعرفه عنه انه فيلم رعب
اكيد مش رعب زي الافلام الاجنبي بس اسمه رعب وخلاص

المهم انا قاعد علي الكرسي والراجل بيحلقلي

وانا طبعا لازم اسمع كلام الراجل يعني يودي رقيتي يمين ماشي
يجيبها شمال معاه مقدرش اقول لا
المهم هو ثبت وشي في عكس التلفزيون
والفيلم شغال وشادد انتباهي
وانا مقدرش ابص له
طب اعمل ايه
قلت خلاص مفيش غير حل واحد
انا اسمع الحوار
وبعدين افتح للخيال بقي واجيب احداث من عندي
وابقي انا المخرج يا معلم
الحقيقة يعني انا لاقيتها حكاية ممتعة جدا
بس المشكلة انه مكنش فيه كلام كتير يديني الطريق اللي همشي عليه
كله كان مثلا صرخات
وحد خايف
وحد مات
وهكذا يعني
وطبعا افلام الرعب كلها كده
بس انا مسكتش برضو عشت مع الفيلم في دماغي

المهم بقي اني لما سمعت الفيلم تاني يوم

لقيت اني كنت اجمد من المخرج بكتير
ولقيت ان الفيلم الي انا عملته كان احسن من الفيلم ده وممتع اكتر

عشان كده فكرت اكرر التجربة مع مستوي اعلي

هعملها مع فيلم اجنبي ان شاء الله
بس مستني لما اتعلم انجلش كويس بس وهعملها علي طول 

بس خلاص 

فاصل ونكمل 

.......

انسان عادي

21‏/04‏/2010

لا يملّ الله حتي تملّوا

النهارده الاربع 21 ابريل 2010 الساعة 4.55 م


أتى رجل النبي صلى الله عليه وسلم فقال:
يارسول الله.. أحدنا يُذنب, قال: يُكتب عليه,
قال الرجل: ثم يَستغفر منه ويتوب,
قال: يُغفر له ويُتاب عليه
ثم قال: فيعود فيُذنب،
قال: يُكتب عليه,
قال الرجل: ثم يستغفر ويتوب منه,
قال: يُغفر له ويُتاب عليه
ثم قال: فيعود فيذنب،
قال: يكتب عليه.. ولا يمل الله حتى تملوا
وقيل للحسن: ألا يستحي أحدنا من ربه
يستغفر من ذنوبه ثم يعود, ثم يستغفر ثم يعود
فقال: ود الشيطان لو ضفر منكم بهذه, فلا تملّوا من الاستغفار


احم احم
سلامو عليكو

انا مش هشرح الحديث لانه شارح نفسه
ومفهوم جدا علي ما اعتقد
انا بس عايز اقول شوف ربنا حليم قد ايه
شوف ربنا صبر عليك ازاي وانت بتعمل المعصية وهو شايفك
ومطلع عليك لكنه امهلك عشان تتوب
عشان ربنا بيحبنا
بجد والله ربنا بيحب كل عباده وعمرك في يوم ما هتيجي
تقول يارب ومش هتلاقيه جنيك
انا كنت زمان لما بعمل معصية او حاجة غلط
( وطبعا كلنا بنغلط يعني )
كنت ببقي مكسوف قوي وبحاول اعمل ناسي او مش واخد بالي منها
عشان مش عايز افنكرها
بس دلوقتي بقيت اعمل حاجة تانية
طبعا برضو انا زي ما انا لسه بغلط برضو
بس بقيت لما اعمل حاجة كده
بعدها علي طول اقوم اتوضا واصلي ركعتين في اي وقت
علي فكرة الحكاية دي بتفرق كتير قوي
اصلي عارف كويس جدا اني مليش حد تاني
وكمان حاجة
حتي لما اكون بس بفكر في معصية معينة  والشيطان نازل زن في وداني
اروح قايم بسرعة واتوضا واصلي برضو ركعتين
طبعا مقولكوش شوشو بيبقي عامل ايه ساعتها
طبعا بياكل في نفسه هههههههه
اللهم اني اعوذ بك من الشيطان الرجيم

عارفين
فيه حاجة كده دايما بحسها
بحس اني هموت صغير شباب يعني
وبستني الموت ده في اي لحظة
وانا راكب عربية بقول ممكن تحصل حادثة
وانا راكب موتوسيكل ورا واحد صاحبي
وانا نايم ببقي حاسس اني مش هقوم
انا مش زعلان اني ممكن اموت صغير او لسه معملتش حاجات كتير تنفعني
انا بس نفسي اموت وربنا راضي عني
الواحد بيغلط كتير قوي والله اعلم النهاية هتيجي وانا حالي ازاي 

ربنا يستر 
وربنا يرحمنا برحمته 
اللهم انك عفو غفور تحب العفو فاعف عنا 


فاصل ونكمل 

........

انسان عادي

18‏/04‏/2010

هل هي صراحة ام بجاحة ام قلة ادب ؟؟؟؟


النهاردة الخميس 10 ابريل 2010 الساعة 12.29 م




احم احم 
سلامو عليكو 

انا طبعا بقالي كتير جدا بكتبتش حاجة 
بعتذر اولا لاي حد كان بيدخل علي المدونة ومش بيلاقي جديد
ده لو كان فيه يعني 
وياريت تسامحوني بجد الايام دي انا داخل علي اخر
امتحانات ليا 
وخلاص المفروض اني اتخرج بقي
وفيه مشروع تخرج المفروض انه واخد وقت كبير 
بس بصراحة اللي مخليني مش عارف اكتب مش قلة وقت 
لكن دماغي مش رايقة خالص ومش مركز وقلقان 
ربنا يسترها بقي 

نتكلم في موضوعنا بقي 

طبعا كلنا سمعنا فيلم ضد الحكومة 
اولا ده من الافلام اللي انا بحبها جد اجد 
وممكن اسمعه كل يوم عادي وما ازهقش
في الفيلم ده وخصوصا في المشهد الاخير 
الا وهو المرافعة  واقف احمد زكي بيسمع كل شئ غلط عمله 
في حياته تاريخ اسود بينحكي قدام الناس كلها 
في مفهومنا احنا يعني فضيحة علي الملأ 
لكن هو رد علي الكلام ده بمنتهي الجراءة واكده 
وقال جملة عجبتني انا شخصا قوي  
قال  " علّي اتطهر منها "
هو ليه اعترف او اكد علي الكلام ده 
يا تري عشان هو مش هيقدر ينكر لان فيه اثباتات للكلام ده
ولا هو وشه مكشوف زي ما بنقول ومش همه حاجة 
ولا فعلا عشان  " علّي اتطهر منها "

انا هحكي موقف حصل معايا واثر فيا بشكل كبير قوي 
خلاني اغير وجهة نظري واتصرف بشكل مختلف 

طبعا زي ما انتو عارفين انا كنت فاشل شويتين في الدراسة 
وعدت اكتر من سنة في الكلية 
"احم احم .. واللي ميعرفش اديه عرف اي خدمة "
ودايما كنت لما النتيجة بتظهر كان اكتر حاجة بخاف منها 
وبزعل قوي منها نظرة الناس ليا 
وهما بيقولو بعنيهم :
" شوفو اللي كان شاطر في الثانوية وجايب مجموع قد كده ايه 
جراله"
وفيه اللي يشكك اصلا ان انا كنت مجتهد بقي
ويقول ده حظ 
وحاجات كده يعني 
بس ده كنت بعديه وبحاول اتجنبه وخلاص 
لحد فيه يوم قابلت مدرس كان بيدرسلي في اعدادي انجلش 
كنت بحبه قوي وكان له معزة خاصة كده عندي 
المهم قابلني وسلم عليا وسألني كالعادة ع النتيجة 
فانا كالعادة برضو حطيت وشي في الارض مع نظرة
حزن كده خفيفة 
وقولتله : " احم .. مفيش نصيب يا استاذ احمد "
لاقيته سحب ايده من ايدي في نص الشارع وسبني ومشي 
من غير ولا نص كلمة 
مش عارف  اقوله قد ايه انا كان هاين عليا في اللحظة 
دي اموت نفسي
انا عارف انه بيحبني وبيخاف عليا وعايز مصلحتي 
بس عرفين لو كان مسكني في الشارع وضربني 
كان هيبقي ارحم بالنسبالي كتير من اللي حصل ده 
وروحت بيتنا وانا فعلا منهار جدا ومخنوق قوي من نفسي

وبعد ما هديت وفكرت شويه 
قلت طب انا اخنق نفسي بلام الناس ولا نظراتهم ليه 
ما يولعو ده المتضرر الوحيد في الحكاية دي انا 
ويمكن بعد كده والدي ووالدتي  
ومن يوميها اخدت قرار اني مش هنكسف ابدا من اي
حاجة تحصلي 
او اي حاجة اعملها ومش هخبيها 
لا وكمان بقيت اي حاجة حاسس كده اني هضايق لو حد عرفها 
بقيت اسبق انا واعرفها للناس 
وبقول انا عملت كذا ...
طالما حاجة مش بايدي صحيح انا ممكن اكون مقصر 
لكن هي حاجة وحصلت لو فضلت اخنق في نفسي 
والومها بقي يبقي مش هنخلص 
اه المفروض اتعلم منها وده اللي انا عملته 
لكن الحياة موقفتش بقي علي كده 

يمكن القرار ده هو اللي رجع لي نفسي تاني 
انا في الايام دي كنت تايه وضايع بشكل كبير قوي 
مش عارف انا بعمل ايه ولا بعمل ده ليه 
لكن بعد الوقفة دي اللي فات هان في عنيا جدا 
وبقي الاهم هو اللي جاي 

نطلع من الكلام ده بايه :
ان مصارحة النفس باخطاءها ومصارحة الناس كمان 
تدخل تحت بند ايه ؟؟؟؟
ياتري  صراحة ويبقي ده حد كويس وبيعترف باخطاؤه
ولا بجاحة ونقول ده واحد وشه مكشوف ومعندوش دم 
ولا قلة ادب بقي وعدم احترام نفسك قدام الناس

انا من وجهة نظري مهما كان نوعها 
فانا معاها لانها رجعتني تاني للحياة 

بس خلاص 

فاصل ونكمل 

.....

انسان عادي

10‏/04‏/2010

بجد ...... خايف احلم تاني


النهارده السبت 10 ابريل 2010 الساعة 3.06 ص



احم احم 
سلامو عليكو 

اولا وقبل ما ابدأ في الموضوع عايز اقول 
ان البوست ده من ضمن مجموعة العقد النفسية اللي عندي 
يعني للي مكتئب ولا مضايق بلاش يقرا 
انا مش مسؤل
اللهم بلغت اللهم فاشهد 

ندخل في الجد بقي 
انا من فترة كبير من وانا صغير يعني دايما عايش في احلامي 
دايما ليا العالم بتاعي اللي بعيش فيه 
برسمه بمزاجي وعلي طريقتي 
وطبعا متأملا يعني انه في  يوم حاجة من ده تتحقق 

المهم ان بقي كل فترة كده حلم يوقع مني 
وبعد فترة كمان حلم يقع تاني ويتوه 

المشكلة مكنتش في الاحلام الكبيرة لانها كانت بالنسبالي 
صعب تتحق او مستحيل 
كنت بحلمها بس كده تضييع وقت بتسلي يعني 
المشكلة الحقيقية كانت في الاحلام الصغيرة
اللي هي المفروض اني اقدر احققها 
دايما كنت لما افكر في حاجة معينة واحلم بيها 
كان لازم متحصلش 
فعلا لازم متحصلش 
لما ارتب لموضوع معين اي موضوع وافكر فيه بشكل معين 
لازم لازم الشكل ده يتغير 
ويحصل حاجة مش ع البال خالص 

عارفين النكتة في ايه كمان 
ان انا لو كان حصل مشكلة مثلا او حاجة وحشة 
وانا خايف جدا من عواقبها وقلقان 
ابص الاقيها تعدي عادي ولا كان حاجة حصلت 
والعكس صحيح 
لو انا مش في دماغي او حصل حاجة وانا مش مهم حتي لو صغيرة 
الاقيها تكبر زيادة عن اللزوم 

الخلاصة اني دايما ظني بيخيب في اي حاجة بفكر فيها 
عمري ما رتبت لحاجة وحصلت 
وعمري ما فكرت في حاجة وتمت زي مانا عاوز 
سواءا كانت خير او شر 
يعني مثلا انا خارج من الامتحانات ومطمن وبقول انا ان شاء الله ناجح 
الاقيني ساقط 
ولما اكون خايف قوي ومش مطمن والدنيا مقلوبة 
الاقيني نجحت ويمكن بتقدير 

بجد بجد الموضوع ده ممكن يكون بيرعبني 
انا فعلا فعلا بقيت اخاف احلم بحاجة عشان عارف انها مستحيل هتتحقق 
ولا افكر في اي شئ في حياتي 
طالما اللي بفكر فيه مبيحصلش طب افكر ليه ؟؟؟
اخنق علي نفسي وخلاص ؟؟
عارفين 
لما اكون بتفرج علي متش مثلا لمصر 
من جوايا ببقي عايز اقنع نفسي بالعافية ان هما هيتغلبو 
عشان يحصل العكس ويكسبو 
ولو مقدرتش اقنع نفسي بالحكاية دي 
وبقيت حاسس انهم هيكسبو فطبعا ينغلبو 
ببقي حاسس اني السبب 
وبقول طب دول ذنبهم ايه تكون السبب في خسارتهم ؟؟؟

الموضوع ده بجد دايما بيحصل معايا 
وبجد بجد انا خايف قوي 
خايف احلم او افكر او ارتب 

انا عارف طبعا ان كل حاجة بامر الله 
ومفيش حاجة بتحصل الا وتكون مقدرة ومكتوبة عنده 
وانا مهما رحت ولا جيت مش ممكن اغير حاجة 
انا الحمد لله مؤمن جدا ومقتنع تماما 
مفيهاش كلام 
ويمكن ده اللي خلاني افكر من ناحية تانية 
وهي ان ربنا عايزني اكون عارف كويس جدا 
اني انا مش حاجة 
وان مش انا اللي اقول ايه اللي يحصل وايه اللي ميحصلش 
كل حاجة بامر الله 

علي فكرة 
الحاية دي كمان حصلت في المدونة دي 
انا عملتها وانا فاقد الامل ان فيه واحد ممكن يدخل ويشوفها 
ولا حد يعبرني حتي 
لكن لاقيت فيه ناس بتعدي عليا وناس بتقرا 
وبرضو فيه ناس بترد 
يعني ده كان برضو حاجة مش مخططلها 

علي فكرة 
انا مش مجنون والله 
دي لحظة صراحة بس المفروض تبقي مع نفسي 
بس انا تعبت من كتر ما قلتها لنفسي 
فقلت اخنق علي حد تاني بقي 
وارحم نفسي شويه 

شكرا للي وصل للاخر 
ونلتقي مع عقدة جديدة 
ومتخفوش العقد كتير 
ههههههههه


فاصل ونكمل 

.......

انسان عادي

07‏/04‏/2010

نفسي احبك يا ريس

النهارده الاتنين 5 ابريل 2010 الساعة 11.01 م




احم احم
سلامو عليكو

اولا انا بجد انسان عادي وعادي جدا
مش مثقف بدرجة كافية اني اكتب في مدونة
او حد ياخد بكلامي
معنديش لغة قوية او اسلوب يشد الناس 
عمري ما مشيت في مظاهرة ولا كنت عضو في حزب
 بتأثر بسرعة جدا بكل الظروف اللي بتحصل حواليا
وممكن قوي كلمتين يولعوني وكلمتين برضو ينزلوني الارض

ندخل في الجد بقي
انا زمان لما كنت بتفرج علي الافلام الوطنية بتاعتنا
واشوف الرئيس جمال عبدالناصر بيحي الشعب
والناس فرحانة بيه وبتحبه بشكل جنوني
وكل ما تيجي سيرته مثلا قدام والدتي تفضل تحكيلي
يوم ما مات
بتقولي فضلنا نعيط عليه واحنا عمرنا ما شفناه
ولما بشوف اقتناع والدي بالثورة ورجالة الثورة مهما عملو بعد كده
ومهما حصل منهم
يقولي بس دول خرجو البلد من احتلال
عموما انا كنت بعذرهم وبقول ان الاعلام كان مكثف جهوده علشان يفهمهم كده

انا مش بقصد ان جمال والثورة كانو وحشين
بالعكس هما فعلا عملو تغيير جامد جدا
بس اقصد انهم خلفو سلبيات كتير والناس عدتها
زي ما بنقول كده الشعب بلعلهم الزلط

وقلت في عقل بالي  كل الحكام بيعملو سلبيات كتير عشان الهدف الاسمي
احم احم عدوها عدوها
بس زمان الشعب كان بيحب الحكام عشان مكنش يعرف السلبيات دي
انما دلوقتي الدنيا مفضوحة وكل حاجة مكشوفة
وربنا يخلي الجزيرة اللي مستلمانا ومبتفوتش حاجة

وقلت ان ده سبب عدم حبي للريس (بدون ذكر اسماء)
لكن فيه منظر شفته زمان ايام الشيخ زايد الله يرحمه 
ايام وفاته كنت شايف حزن الشعب بتاعه عليه بجد 
كنت حاسسهم زعلانين 
انا نفسي كنت زعلان عليه جدا 
وكنت بقول فيه حاكم عربي كويس اهو وشعبه بيحبو 
ساعتها بصراحة حسيت بغيرة فظيعة 
 طب ليه انا ميبقاش عندي  رئيس بيخاف عليا وبخاف عليه
بجد كان نفسي في ده وقتها 

نيجي لعلاقة البرادعي بقي بالموضوع ده 
انا قبل كده كنت بسمع عن البرادعي قليل جدا 
عادي يعني اه هو صحيح كان حد مميز جدا 
ومصري ماسك منصب عالمي 
بس مكنش فيه اي حب بيني وبينه عادي 
مش زي زويل مثلا 
وحتي بعد ما رجع والكلام كتر عليه علي انه هيرشح نفسه للرئاسة 
يمكن بصراحة من شحنة الاحباط اللي جوايا مكنتش مصدق 
انه ممكن ياخد الخطوة دي 
خصوصا انه راجل دماغه كبيره وعارف ان الكلام ده مش سهل 
المهم فضلت العلاقة باردة بيني وبينه لحد ما حكومتنا العزيزة 
قربت الوصال بينا وبدأت تحاربه 
بدأت انا كمان اخد بالي 
طب هما بيحاربوه ليه ؟؟؟؟؟
هوممكن فعلا حد يجي ويهز كرسي العرش بتاع الريس 
بدأت افكر وبدأت كمان اقتنع انه ممكن يحصل حاجة 
ساعتها بقي بدأت اذاكر البرادعي 
وعشان انا علي نياتي زي كل المصريين (الا من رحم ربي)
صدقت كل الكلام واقتنعت بيه وايدته 
والبركة في حكومتنا العزيزة 

واملي الاخير في الدنيا اني احب الرئيس 
او الرئيس يبقي اللي انا بحبه 

وربنا يدينا ويديكو طولت العمر واشوف اليوم ده 


فاصل ونكمل 

......

انسان عادي

04‏/04‏/2010

بحب التلفزيون ولكن .........


النهارده الحد 4 ابريل 2010 الساعة 9.43 م 

التلفاز

احم احم 
سلامو عليكو 

انا بحب التلفزيون ولا لا ؟؟؟؟
سؤال سألته لنفسي مرة والاجابة متأخرتش 
لاقيتني بقول ... ايون بحبه ومقتنع بوجوده تماما
بس لما جيت اتابع علاقتي بالتلفزيون لاقتها كالتالي :

* اول لما والدتي تمسك الريموت وتبدأ جولة المسلسلات بتاعت كل يوم 
الاقيني يا اما بحاول اقنعها انها تغير القناة 
او اني اسحب نفسي من سكات واقوم اشوف حاجة تانية اعملها 

* اول لما اخويا يستلم الريموت ويبدأ يقلب في قنوات الافلام الاجنبية 
الاقيني برضو بحاول معاه انه يغير من عليها 
لكن برضو كل المحاولات دي بتبوء بالفشل 
وبرضو اسحب نفسي تاني لنفس الحاجة الاولانيه 

* ولما تيجي الوصلة بقي بتاعت والدي ويستلم هو الراية قصدي 
الريموت يعني ودي بقي بتبقي الجولة الرياضية
وفيها بيعدي علي الاخ مدحت شلبي في مودرن او الاخ محمد الليثي 
في الاهلي وساعات علاء صادق ع النيل وهكذا بقي 
طبعا مع والدي مش بحاول معاه انه يغير القناة اللي بيتفرج عليها 
انا كل اللي بقدر اعمله ابدي رأيي في البرنامج اللي بيسمعه 
يمكن يقولي عندك حق ده برنامج وحش ويغير بقي 
الاقيه يقولي البرنامج ده مش حلو انا بقي اقول في عقل بالي كويس 
هيغير اهو فيرجع يقولي بس نشوفه هيعمل ايه 
وطبعا انا ولا بنطق عادي 

المشكلة بقي بتجي امتي ؟؟؟؟؟
لما اكون قاعد لوحدي او اللي موجودين مش مهتمين بالتلفزيون
وسايبينلي الدفه وانا اللي سايق 
المشكلة اني مش بلاقي حاجة بتعجبني 
افضل الف علي كل القنوات بكل انواعها 
وتقريبا اللفة دي مش بتاخد نص ساعة وازهق واقوم 
واسيب التلفزيون لوحده 

المهم بقي انا نفسي اعرف انا بحب التلفزيون ليه 
لما انا مش بحب حاجة فيه ليه متخيل ان الحياة من غير تلفزيون هتبقي صعبة 
مع انه عادي اهو ولا فارق معايا 

انا يمكن المرة الوحيدة اللي تابعت التلفزيون فيها كتير قوي 
وخليت اللي في البيت كمان يتابعو معايا 
كانت لما قناة ناشونال جيوجرافيك ابوظبي نزلت واشتغلت 
بقيت اتابعها يشكل مستمر  وبقت حاجة اساسية في حياتي 

بس دي من وجهة نظري انا تابعتها مش حبا في التلفزيون 
لكن لاني تخصص هندسة وهي بتجيب حاجات كتير انا فاهمها 
وبتعلي دماغي كده 
لاقيت نفسي فيها يعني 

لكن غير كده لا 
يمكن بتفرج علي ماتشات الكورة من غير تحليل عشان بكرة التحليل 
وممكن برامج قليلة قوي زي العاشرة مساءا و واحد من الناس 
ومش بصفة مستمرة كمان 

السؤال للاخوة المشاهدين في البيوت 
السؤال بيقول علل اي افطن 
انت شايف ان التلفزيون بتاعنا المصري الخاص والحكومي 
بيقوم بدوره المطلوب منه كاعلام وكثقافة 
ولا احنا بنسلي نفسنا وبنضيع وقت وخلاص ؟؟؟؟؟

انا شايف اننا بنهزر وبنضيع وقت 
انا وانت 

احم احم 

فاصل ونكمل 

.........

انسان عادي

سكت


النهارده الحد 4 ابريل 2010 الساعة 1.05 ص




سكت 

سكت ملقتش رد عليه وسكت مش عارفه اقوله ايه 
حسيت وكاني هنت عليه وبجد انا عمري مرة ماهنت 
تعبت مكنتش اتصور يجي يوم وهوانا يتغير 
بيقول احساسه متحير وكمان بيقولي انا اتسرعت 

ازاي بقي يعني ده اسمه كلام بيروح في ثواني شوق وغرام 
وليالي الحب الاحلام بتكون غلطة غلطناها 
معقولة فراقنا ده عادي اتنين حبو وبقي ماضي 
ازاي قلبو طلع فاضي دي حاجة صعب معناها 

فهمت انا ولا مش فاهمة كلامو بجد كان صدمة 
محستش بـ ولا كلمة وحسيت اني بس بضيع 
ده هواه فجأة طلع كدبة واهو كل غرامه كان لعبة 
ياه ع الدنيا دي صعبة واحساسي بجد فظيع 


احم احم 
سلامو عليكو 
انا مكنتش ناوي اكتب اغنيتين ورا بعض كده 
انا اصلا مكنتش ناوي اكتب اغاني خالص زي ما قلت 
بس بجد الاغنية دي رغم حزنها انا بحبها جدا 
عشان كنت حسسها جدا 
هي فعلا مكتوبة علي لسان بنت 
لاني كا راجل مقدرتش انكسر في احساسي مظبوط 
فاستعملت المرأة وقولتها علي لسانها 
المهمة ان هنا من وجهة نظري الرد علي  صدمة معينة 
او صدمة العمر زي ما بيقولو مش بيكون بالبكا 
ولا بالحزن ولا بالدموع 
الرد هنا بالسكوت 
حاجة فعلا كانت مستحيل تحصل 
لكن حصلت خلاص 
البطلة هنا مش عارفه تعمل ايه 
فسكتت 

علي فكرة 
انا كتبت الاغنية دي هنا وهي اغلي اغنية عندي 
عشان اصالح حد زعلان مني 
ياريت بقي ميكونش زعلان 
ماشي ؟؟؟؟

فاصل ونكمل 

........

انسان عادي

28‏/04‏/2010

اخر الرجال المحترمين

النهارده الاربع 28 ابريل 2010 الساعة 2.31 م 




سيرة ذاتية للشيخ جاد الحق على جاد الحق.. الإمام الأكبر "رحمه الله"


مولده ونشأته :

وُلِد الشيخ جاد الحق بقرية "بطرة" التابعة لمركز "طلخا" بمحافظة "الدقهلية"
الخميس الموافق (13 جمادى الآخرة سنة 1335 هـ = 5 من إبريل 1917م)،
وتلقى تعليمه الأوْلِي في قريته، فحفظ القرآن الكريم، وتعلم مبادئ القراءة والكتابة،
ثم الْتحق بالمعهد الأحمدي بطنطا، وأنهى المرحلة الابتدائية به، وانتقل إلى المرحلة الثانوية،
واستكملها في القاهرة في معهدها الديني بالدَرَّاسَة، وبعد اجتيازه لها التحق بكلية الشريعة،
وتخرَّج فيها سنة (1363هـ = 1944م)، حاصلاً على الشهادة العالمية،
ثم نالَ تخصص القضاء بعد عامين من الدراسة،
وكان الأزهر يعطي لمن يحصل على العالمية في الشريعة أن يتخصص في القضاء لمدة عامين،
ويمنح الطالب بعدها شهادة العالمية مع إجازة القضاء.

بعد التخرج :
عمل جاد الحق بعد التخرج في المحاكم الشرعية في سنة (1366هـ = 1946م)،
ثم عُيِّن أمينًا للفتوى بدار الإفتاء المصرية في سنة (1373هـ = 1953م)،
ثم عاد إلى المحاكم الشرعية قاضيًا في سنة (1374هـ = 1954م)،
ثم انتقل إلى المحاكم المدنية سنة (1376هـ = 1956م) بعد إلغاء القضاء الشرعي، وظلَّ يعمل بالقضاء،
ويترقى في مناصبه حتى عُين مستشارًا بمحاكم الاستئناف في سنة (1396هـ = 1976م).
وقد حفظت سجلات المحاكم التي عمل بها أحكامه القضائية في أثناء عمله بها أحكامه القضائية في أثناء عمله بالقضاء،
وتشتمل على بحوث وتعليلات واجتهادات في التطبيق،
وقد نشرت المجلات القانونية في مصر بعضًا من تلك الأحكام،
وفي كثير منها أحكام لما استجد من مستحدثات لم يعالجها الحكم الفقهي من قبل.

جاد الحق مفتيًا: 

عُيِّن الشيخ جاد الحق مفتيًا للديار المصرية في (رمضان 1398هـ = أغسطس 1978م)
فعمل على تنشيط الدار، والمحافظة على تراثها الفقهي، فعمل على اختيار الفتاوى ذات المبادئ الفقهية،
وجمعها من سجلات دار الإفتاء المصرية، ونشرها في مجلدات بلغت عشرين مجلدًا، وهي ثروة فقهية ثمينة؛
لأنها تمثل القضايا المعاصرة التي تشغل بال الأمة في فترة معينة من تاريخها،
وفي الوقت نفسه تستند إلى المصادر والأصول التي تستمد منها الأحكام الشرعية.
وتشمل اختيارات الفتاوى ما صدر عن دار الإفتاء في الفترة من سنة
(1313هـ = 1895م) حتى سنة (1403 هـ = 1982م)،
وضمت المجلدات الثامن والتاسع والعاشر من سلسلة الفتاوى اختيارات من أحكامه وفتاواه،
وتبلغ نحو 1328 فتوى في الفترة التي قضاها مفتيًا للديار المصرية.

توليه مشيخة الأزهر:

عُيّن وزيرًا للأوقاف في (ربيع الأول 1402هـ = يناير 1982م)،
وظلَّ به شهورًا قليلة، اختير بعدها شيخًا للجامع الأزهر في
(13 من جمادى الأولى 1402هـ = 17 من مارس 1982م)،
وبدأت فترة زاهية من فترات تاريخ الأزهر؛ سواء فيما يتصل بمؤسسة الأزهر،
أو بدورها باعتبارها القائمة على الفكرة الإسلامي والتعليم الديني في مصر، ومحط أنظار الناس، ومعقد أمانيهم.
وكان لاشتغال الشيخ جاد الحق بالقضاء منذ وقت مبكر أثره البالغ في قيادته الأزهر،
فهو فقيه قاضٍ يعتمد على الدراسة المتأنية والنظر العميق،
والبُعْد عن الهوى، ومن ثَم كانت قراراته صائبة، هادئة،
بعيدة عن العاطفة المشبوهة والانفعال المؤقت، وتهدف إلى الصالح العالم.
 
مواقف الشيخ :

عُرف الشيخ في الفترة التي تولَّى فيها مشيخة الأزهر بمواقفه الجريئة، والصدع بما يعتقد أنه الحق والصواب،
وإن خالف هوى الناس وأغضب السلطان،
فقد أعلن بعد توليه المشيخة تأييد الأزهر للجهاد الأفغاني ضد المحتل الروسي،
وعدَّ ما يحدث في البوسنة والهرسك حربًا صليبية جديدة تهدف إلى إبادة المسلمين،
ودعا إلى الوقوف إلى جانب المسلمين والدفاع عن قضيتهم،
وكان له مثل هذا الموقف مع المسلمين الشيشان في جهادهم للروس، ومع الانتفاضة الفلسطينية.
ويُذكر له موقفه الواضح من التطبيع مع إسرائيل، حتى إن كانت هناك اتفاقية سلام بين مصر وإسرائيل،
واشتدَّ في معارضته للتطبيع، في الوقت التي نشطت فيها حركات التطبيع في بعض مؤسسات الدولة،
فأفتى بعدم جواز زيارة القدس إلا بعد تحريرها، ورفض استقبال أي وفد إسرائيلي يرغب في زيارة الأزهر،
وإنْ سبَّب ذلك حرجًا للمسؤولين.

مؤتمرا المرأة والسكان: 

وكان للشيخ رأي واضح في مقررات مؤتمر السكان الذي تم عقده في القاهرة في
(ربيع الآخر 1415هـ = سبتمبر 1994م)،
فعارض دعوات الانحلال الأُسري والشذوذ، والخروج على الفطرة السليمة، وتعاون معه –
في رد تلك الدعاوى- نفر من المخلصين، وكان لحضورهم هذا المؤتمر
ودحضهم تلك الدعاوى أثره في إحباط ما كان يخطِّط له القائمون على المؤتمر،
وتكرَّر منه هذا الموقف الواضح في رفضه لوثيقة مؤتمر المرأة الذي تم عقده في بكين في
(جمادى الأولى 1416هـ = سبتمبر 1995م).

موقف من التطرف: 

هال الإمام جاد الحق أن يتخذ نفر من الكُتّاب من تطرف بعض الشباب ذريعة للهجوم على الإسلام
ومبادئه دون وازع من ضمير أو تسلح بثقافة وعلم، فانطلق قلمه يصدع بالحق ويفضح سموم بعض الكتبة بقوله: "
وقد أفزعت الحرية من مفهومها الصحيح، حتى صارت الدعوة إلى الفساد حرية،
وصار الطعن في الإسلام وصلاحيته حرية،
ثم صارت المسارعة إلى توزيع الاتهامات على الناس أسبق من نتائج التحقيق التي تقوم بها الجماعة المختصة".
وحين أعلنت بعض الصحف عن مسابقة لاختيار ملكة النيل، فزع من تطرف بعض المترفين وانسياقهم وراء الهوى والضلال، وكتب مقالة في غاية القوة والبيان بعنوان "أوقفوا هذا العبث باسم وفاء النيل"،
وعدَّ هذا التصرف الطائش عودة إلى سوق النحاسة والرقيق الأبيض، وردَّة إلى الجاهلية العمياء،
لا يُفرَّق فيها بين الحلال والحرام.

جهود الشيخ في مؤسسة الأزهر: 

يُذكر للشيخ جهوده في نشر التعليم الأزهري والتوسع في إنشاء المعاهد الأزهرية في أنحاء مصر،
وكانت سمعة الشيخ وثقة الناس فيه تجعل الناس يتسابقون في التبرع لإنشاء المعاهد الدينية،
وتقديمها للأزهر للإشراف عليها، وبلغت المعاهد الأزهرية في عهده خمسة آلاف معهد،
وأنشأ فروعًا للجامعة الأزهرية في بعض محافظات مصر ومدنها الكبيرة.
ولحرصه على أن يجد الناس مبتغاهم فيما يتعلق بأمور دينهم فقد دعَّم عمل لجنة الفتوى الرئيسية بالجامع الأزهر
بإنشاء فروعًا لها في كل منطقة أزهرية في كل محافظات الجمهورية، فبلغت خمسًا وعشرين لجنة،
وانتقى لها أفضل العناصر من العلماء، الذين يجيدون الفتوى، وأمدها بالكتب التي تحتاجها في أداء عملها.

مؤلفات الشيخ :

للشيخ جاد الحق مؤلفات عديدة منها: "الفقه الإسلامي مرونته وتطوره"، و"
بحوث فتاوى إسلامية في قضايا معاصرة"، وصدر من الكتاب أربعة أجزاء،
وهي تضم الفتاوى والبحوث التي أصدرها الشيخ منذ ولايته المشيخة، وله "
رسالة في الاجتهاد وشروطه"، وأخرى بعنوان "رسالة في القضاء في الإسلام".
ويبرز في كتبه منهجه في التفكير الفقهي؛ حيث يبدأ القضية بالتعريف اللغوي لها،
ثم يتبعها بالتعريف الشرعي، ويتلو ذلك بيان الحكم وفق المذاهب الأربعة وغيرها، ثم يقوم بالترجيح بين آراء العلماء لاختيار الرأي الذي يرتضيه، ويكون محققًا للمصلحة التي يبتغيها الشارع الحكيم.

مكانة الشيخ :

كان الشيخ جاد الحق قدم راسخة في العلم، وعقل راجح، ورأي صائب، وقدرة على الاستفادة من أهل العلم، فاستخلص منهم طائفة استخدمهم في الدفاع عن الإسلام، وجلاء قضاياه، والرد على ما يقوله المغرضون،
فقَوِيَ بهم الأزهر، واشتد ساعده.
وعرف العالم الإسلامي مكانة الشيخ وفضله فمنحه أرفع الجوائز والأوسمة، فمنحته مصر "وشاح النيل"،
أعلى وشاح تمنحه الدولة في (سنة 1403هـ = 1983م) بمناسبة العيد الألفي للأزهر، ومنحه المغرب وسام "
الكفاءة الفكرية والعلوم" من الدرجة الممتازة،
وحصل على جائزة الملك فيصل العالمية لخدمة الإسلام سنة (1416هـ = 1995م).

وفاة الشيخ :

وبعد حياة طويلة مليئة بجلائل الأعمال، تُوفِّي الإمام الأكبر "جاد الحق على جاد الحق"
إثر نوبة قلبية ألمَّت به الجمعة الموافق (25 من شوال 1416هـ = 15 من مارس 1996م)
عن عمر يناهز التاسعة والسبعين. 


احم احم 
سلامو عليكو 

اولا انا مش بقصد بكلمة اخر الرجال المحترمين دي
ان اللي جم بعد كده مكنوش محترمين 
طبعا لا دي ناس محترمة جدا 
ولكن يمكن ده اللي اثر فيا اكتر وبشكل كبير 
يمكن انا ملحقتهوش الا في فترة بسيطة وكان ادراكي ساعتها مش كبير 
يعني تقريبا هو اتوفي وانا كان عندي 11 سنة 
بس في الفترة دي كنت حاسس بيه وشايف انه شخصية قوية 
يمكن من كلام الناس عليه قصادي 
كنت شايفه راجل وسمت عليه شخصية شيخ الازهر 
يعني اللي ممكن يبقي شيخ للازهر لازم يبقي زي ده 

الراجل ده يا جماعة زي قرينا كان قاضي وبعدين رئيس محكمة 
وبعدين مفتي وبعدين وزير وبعدين شيخ للازهر 
يعني مراتب رفيعة جدا 
ورغم كل ده مغيرش شقته اللي كان قاعد فيها في المنيل 
وبيته اللي كان في البلد في الدقهلية فضل زي ماهو 
ما شفناش عمارة طلعت مكانو ولا حاجة 

ومن الحاجات الي سمعتها عنه كمان 
ان هو كان عامل جمعية خيريه في البلد عندهم 
وكان  جاله ناس كويتيين علي ما اعتقد 
وقالوله عايزين نتبرع ونبني مسجد في القرية 
رد عليهم وقالهم :
الناس ممكن تصلي علي الارض عادي 
جعلت لي الارض مسجدا وطهورا 
لكن مش ممكن الناس تتعالج علي الارض 
او تتعلم علي الارض 
لو عايزين تتبرعو بجد يبقي تبنو مستشفيات 
او مدارس ده افيد للناس 

بجد حاجة زي كده بتوضح انه رجل فاهم كويس 
وتهمه المصلحة بالدرجة الاولي 
سيبك بقي من المناظر والكلام الفاضي ده 

عموما انا حبيت اتعرف معاكو علي شخصية زي دي 
فيها حاجات كتير نتعلم منها 
واكيد مهما قلنا مش هنديله حقه 
ربنا يرحم الامام الاكبر وشيخ الازهر الاسبق 
الشيخ جاد الحق علي جاد الحق 

شكراااا 

فاصل ونكمل 

.........

انسان عادي

26‏/04‏/2010

دمعت لما شفتها


 النهارده الاتنين 26 ابريل 2010 الساعة 3.20 م 





دمعت لما شفتها

دمعت لما شفتها .. مكسورة زي ما سيبتها
من كام سنه ودعتها .. وقولت مفيش مابينا نصيب
وبعدت قلبي عنها  ..  وخادتني دنيا وعشتها
ومفتكرتش انها   ..  لسه عاملاني حبيب

انا قولت نسيت وابتدت تعيش حياة زي البشر
تحب تاني وتنسي تاني كأن ولا شئ انكسر
اتاريها عايشه في الجراح ودموعها لسه في خدها
لا عمرها نسيت ولا عاشت يومين بعد الفراق
من شكلها باين عليها قاتلها موت الاشتياق
حبيتني بس جنيت عليها بكل قسوة جرحتها

الدموع اللي في عنيها  ..  كل ما اقرب عليها
فيه سؤال بحسه فيها   .. انت ليه عذبتني
انا كنت فاكر شوقها عادي  .. بعد يوم راح يبقي ماضي
واديها بعد سنين قصادي  .. شوقها ليه خضني


احم احم 
سلامو عليكو 

معلش غصب عني رجعت للاغاني تاني 
حاسس اني هيجرالي حاجة لو مكتبتش 
استحملوني بقي

احم احم 

الاغنية دي انا عشتها يمكن مش بنفس الدرجة دي 
بس الاحساس كان موجود 
لما تكون بتحب حد بطريقة كبير وهي كمان بتبادلك نفس الشعور 
ويمكن اكتر 
بس ظروفك بتحكم بحاجات معينة 
ممكن تكون سافرت وسبت البلد مثلا 
يعني مش خيانة ولا فراق 
المهم وانت بعيد بيبدأ الحب يقل شويه شويه من عندك 
ومتخيل برضو ان الحب بيقل من عندها هي كمان 
وبتاخدك الدنيا بقي وبتعيش وممكن تحب تاني 
وتعيش حياتك 
وبيجي وقت رجوعك تاني 
وبتصادف انك تقابل حبيبتك الاولي 
وهنا بتكون الصدمة 
انت متخيل انها نسيت زي ما انت نسيت 
لكنك بتلاقي واحدة جواها شوق وحب اكتر من الاول 
واحدة كانت عايشة بس عشان ترجعلها تاني 
وموقفة حياتها علي اليوم ده 

غصب عنك لما تشوفها بالمنظر ده 
عنيك دمعت 
حسيت دلوقتي بس انك خنتها 

ويعني بتحاول تتهرب من نظرتها ولومها 
وبتقول لنفسك 
انا كنت فاكرها هتنسي 
بس للاسف ده محصلش 

طبعا الاحساس ده تعبني جدا لما عشته 
وتعبني اكتر وانا بكتبه 


بس 

فاصل ونكمل 

......

انسان عادي

25‏/04‏/2010

ما احلي النظام في زمن الفوضي

النهارده الاحد 25 ابريل 2010 الساعة 6.15 ص 



احم احم
سلامو عليكو

انا بطبعي مش بحب اكون عادي زي اي حد
ومش بحب امشي مع الموجة
ومش بحب اكون نسخة مطبوعة من بشر كتير
يعني بحب اكون مختلف

بس اكتشفت بقي كمان ان المتعة الاكبر لما تكون مختلف وصح
يعني مش خالف تعرف لا خالف عشان ده الصح

مثلا في الميترو الايام دي عاملين بابين للصعود وبابين للنزول
طبعا قلما حد يلتزم بالكلام ده الا صدفة بقي
لو لقي نفسه قدام الباب الصح
الا من رحم ربي طبعا
انا بقي بقيت التزم جدا بالحكاية دي
بحس بمتعة كبيرة وانا بعمل حاجة صح ومنظمة
خصوصا لو هي مش منتشرة او سائدة

حتي في الشارع
لما اكون معايا منديل ورق عايز ارميه
او كانز حاجة ساقعة
الشارع ممكن يكون زبالة ومش هيفرق يعني الورقة اللي هرميها
بس انك تعمل الصح دي متعة لوحدها

متتصوروش بفرح قد ايه لما افضل الف وادور علي باسكت عشان ارمي فيها الحاجة دي
وطبعا بفرح اكتر لما بلاقيها عشان مش دايما بلاقيها

ولما تكون قاعد في اتوبيس او المترو برضو
وتقوم عشان تقعد حد كبير او حد تعبان مكانك
او حتي واحد عادي لو انت مشوارك بسيط و ميستاهلش قعدة يعني
برضو بفرح بيها جدا

وفيه حاجة كمان هو مش دايما بعملها
بس عملتها ساعات
هي بصراحة في المترو بس
لما حد يرمي ورقة مثلا في المترو
ومن المعروف ان المتر من انضف الاماكن في بلدنا
علي الاقل الاماكن اللي انا شفتها
ممكن اروح واشيل الورقة دي وارميها في الباسكت
ممكن ناس ميعجبهاش الكلام ده وتقول انا مالي
كفاية انا اكون ملتزم وانا مش همشي الم الزبالة يعني
بس انا بقول يمكن حد يشوفني وتكون نفسيته حلوة ويعمل زيي

بجد انا بحس بمتعة كبيرة وانا ملتزم
وبحس ان انا ليا قيمة كده

فعلا

ما احلي النظام في زم الفوضي

بس خلاص

فاصل ونكمل

......

انسان عادي

24‏/04‏/2010

عمرك سمعت فيلم رعب ؟؟؟

النهارده السبت 24 ابريل 2010 الساعة 12.28 ص 


احم احم
سلامو عليكو

سؤال بسيط

فيه حد فكر يسمع فيلم رعب ؟؟
وانا قاصد هنا كلمة يسمع يعني من غير ما يشوف

انا حصلت معايا الحكاية دي

كنت اول امبارح عند الحلاق عشان احلق
( عادي يعني )ء
المهم كان شغال في التلفزيون فيلم كامب
وانا مكنتش سمعته قبل كده
واللي اعرفه عنه انه فيلم رعب
اكيد مش رعب زي الافلام الاجنبي بس اسمه رعب وخلاص

المهم انا قاعد علي الكرسي والراجل بيحلقلي

وانا طبعا لازم اسمع كلام الراجل يعني يودي رقيتي يمين ماشي
يجيبها شمال معاه مقدرش اقول لا
المهم هو ثبت وشي في عكس التلفزيون
والفيلم شغال وشادد انتباهي
وانا مقدرش ابص له
طب اعمل ايه
قلت خلاص مفيش غير حل واحد
انا اسمع الحوار
وبعدين افتح للخيال بقي واجيب احداث من عندي
وابقي انا المخرج يا معلم
الحقيقة يعني انا لاقيتها حكاية ممتعة جدا
بس المشكلة انه مكنش فيه كلام كتير يديني الطريق اللي همشي عليه
كله كان مثلا صرخات
وحد خايف
وحد مات
وهكذا يعني
وطبعا افلام الرعب كلها كده
بس انا مسكتش برضو عشت مع الفيلم في دماغي

المهم بقي اني لما سمعت الفيلم تاني يوم

لقيت اني كنت اجمد من المخرج بكتير
ولقيت ان الفيلم الي انا عملته كان احسن من الفيلم ده وممتع اكتر

عشان كده فكرت اكرر التجربة مع مستوي اعلي

هعملها مع فيلم اجنبي ان شاء الله
بس مستني لما اتعلم انجلش كويس بس وهعملها علي طول 

بس خلاص 

فاصل ونكمل 

.......

انسان عادي

21‏/04‏/2010

لا يملّ الله حتي تملّوا

النهارده الاربع 21 ابريل 2010 الساعة 4.55 م


أتى رجل النبي صلى الله عليه وسلم فقال:
يارسول الله.. أحدنا يُذنب, قال: يُكتب عليه,
قال الرجل: ثم يَستغفر منه ويتوب,
قال: يُغفر له ويُتاب عليه
ثم قال: فيعود فيُذنب،
قال: يُكتب عليه,
قال الرجل: ثم يستغفر ويتوب منه,
قال: يُغفر له ويُتاب عليه
ثم قال: فيعود فيذنب،
قال: يكتب عليه.. ولا يمل الله حتى تملوا
وقيل للحسن: ألا يستحي أحدنا من ربه
يستغفر من ذنوبه ثم يعود, ثم يستغفر ثم يعود
فقال: ود الشيطان لو ضفر منكم بهذه, فلا تملّوا من الاستغفار


احم احم
سلامو عليكو

انا مش هشرح الحديث لانه شارح نفسه
ومفهوم جدا علي ما اعتقد
انا بس عايز اقول شوف ربنا حليم قد ايه
شوف ربنا صبر عليك ازاي وانت بتعمل المعصية وهو شايفك
ومطلع عليك لكنه امهلك عشان تتوب
عشان ربنا بيحبنا
بجد والله ربنا بيحب كل عباده وعمرك في يوم ما هتيجي
تقول يارب ومش هتلاقيه جنيك
انا كنت زمان لما بعمل معصية او حاجة غلط
( وطبعا كلنا بنغلط يعني )
كنت ببقي مكسوف قوي وبحاول اعمل ناسي او مش واخد بالي منها
عشان مش عايز افنكرها
بس دلوقتي بقيت اعمل حاجة تانية
طبعا برضو انا زي ما انا لسه بغلط برضو
بس بقيت لما اعمل حاجة كده
بعدها علي طول اقوم اتوضا واصلي ركعتين في اي وقت
علي فكرة الحكاية دي بتفرق كتير قوي
اصلي عارف كويس جدا اني مليش حد تاني
وكمان حاجة
حتي لما اكون بس بفكر في معصية معينة  والشيطان نازل زن في وداني
اروح قايم بسرعة واتوضا واصلي برضو ركعتين
طبعا مقولكوش شوشو بيبقي عامل ايه ساعتها
طبعا بياكل في نفسه هههههههه
اللهم اني اعوذ بك من الشيطان الرجيم

عارفين
فيه حاجة كده دايما بحسها
بحس اني هموت صغير شباب يعني
وبستني الموت ده في اي لحظة
وانا راكب عربية بقول ممكن تحصل حادثة
وانا راكب موتوسيكل ورا واحد صاحبي
وانا نايم ببقي حاسس اني مش هقوم
انا مش زعلان اني ممكن اموت صغير او لسه معملتش حاجات كتير تنفعني
انا بس نفسي اموت وربنا راضي عني
الواحد بيغلط كتير قوي والله اعلم النهاية هتيجي وانا حالي ازاي 

ربنا يستر 
وربنا يرحمنا برحمته 
اللهم انك عفو غفور تحب العفو فاعف عنا 


فاصل ونكمل 

........

انسان عادي

18‏/04‏/2010

هل هي صراحة ام بجاحة ام قلة ادب ؟؟؟؟


النهاردة الخميس 10 ابريل 2010 الساعة 12.29 م




احم احم 
سلامو عليكو 

انا طبعا بقالي كتير جدا بكتبتش حاجة 
بعتذر اولا لاي حد كان بيدخل علي المدونة ومش بيلاقي جديد
ده لو كان فيه يعني 
وياريت تسامحوني بجد الايام دي انا داخل علي اخر
امتحانات ليا 
وخلاص المفروض اني اتخرج بقي
وفيه مشروع تخرج المفروض انه واخد وقت كبير 
بس بصراحة اللي مخليني مش عارف اكتب مش قلة وقت 
لكن دماغي مش رايقة خالص ومش مركز وقلقان 
ربنا يسترها بقي 

نتكلم في موضوعنا بقي 

طبعا كلنا سمعنا فيلم ضد الحكومة 
اولا ده من الافلام اللي انا بحبها جد اجد 
وممكن اسمعه كل يوم عادي وما ازهقش
في الفيلم ده وخصوصا في المشهد الاخير 
الا وهو المرافعة  واقف احمد زكي بيسمع كل شئ غلط عمله 
في حياته تاريخ اسود بينحكي قدام الناس كلها 
في مفهومنا احنا يعني فضيحة علي الملأ 
لكن هو رد علي الكلام ده بمنتهي الجراءة واكده 
وقال جملة عجبتني انا شخصا قوي  
قال  " علّي اتطهر منها "
هو ليه اعترف او اكد علي الكلام ده 
يا تري عشان هو مش هيقدر ينكر لان فيه اثباتات للكلام ده
ولا هو وشه مكشوف زي ما بنقول ومش همه حاجة 
ولا فعلا عشان  " علّي اتطهر منها "

انا هحكي موقف حصل معايا واثر فيا بشكل كبير قوي 
خلاني اغير وجهة نظري واتصرف بشكل مختلف 

طبعا زي ما انتو عارفين انا كنت فاشل شويتين في الدراسة 
وعدت اكتر من سنة في الكلية 
"احم احم .. واللي ميعرفش اديه عرف اي خدمة "
ودايما كنت لما النتيجة بتظهر كان اكتر حاجة بخاف منها 
وبزعل قوي منها نظرة الناس ليا 
وهما بيقولو بعنيهم :
" شوفو اللي كان شاطر في الثانوية وجايب مجموع قد كده ايه 
جراله"
وفيه اللي يشكك اصلا ان انا كنت مجتهد بقي
ويقول ده حظ 
وحاجات كده يعني 
بس ده كنت بعديه وبحاول اتجنبه وخلاص 
لحد فيه يوم قابلت مدرس كان بيدرسلي في اعدادي انجلش 
كنت بحبه قوي وكان له معزة خاصة كده عندي 
المهم قابلني وسلم عليا وسألني كالعادة ع النتيجة 
فانا كالعادة برضو حطيت وشي في الارض مع نظرة
حزن كده خفيفة 
وقولتله : " احم .. مفيش نصيب يا استاذ احمد "
لاقيته سحب ايده من ايدي في نص الشارع وسبني ومشي 
من غير ولا نص كلمة 
مش عارف  اقوله قد ايه انا كان هاين عليا في اللحظة 
دي اموت نفسي
انا عارف انه بيحبني وبيخاف عليا وعايز مصلحتي 
بس عرفين لو كان مسكني في الشارع وضربني 
كان هيبقي ارحم بالنسبالي كتير من اللي حصل ده 
وروحت بيتنا وانا فعلا منهار جدا ومخنوق قوي من نفسي

وبعد ما هديت وفكرت شويه 
قلت طب انا اخنق نفسي بلام الناس ولا نظراتهم ليه 
ما يولعو ده المتضرر الوحيد في الحكاية دي انا 
ويمكن بعد كده والدي ووالدتي  
ومن يوميها اخدت قرار اني مش هنكسف ابدا من اي
حاجة تحصلي 
او اي حاجة اعملها ومش هخبيها 
لا وكمان بقيت اي حاجة حاسس كده اني هضايق لو حد عرفها 
بقيت اسبق انا واعرفها للناس 
وبقول انا عملت كذا ...
طالما حاجة مش بايدي صحيح انا ممكن اكون مقصر 
لكن هي حاجة وحصلت لو فضلت اخنق في نفسي 
والومها بقي يبقي مش هنخلص 
اه المفروض اتعلم منها وده اللي انا عملته 
لكن الحياة موقفتش بقي علي كده 

يمكن القرار ده هو اللي رجع لي نفسي تاني 
انا في الايام دي كنت تايه وضايع بشكل كبير قوي 
مش عارف انا بعمل ايه ولا بعمل ده ليه 
لكن بعد الوقفة دي اللي فات هان في عنيا جدا 
وبقي الاهم هو اللي جاي 

نطلع من الكلام ده بايه :
ان مصارحة النفس باخطاءها ومصارحة الناس كمان 
تدخل تحت بند ايه ؟؟؟؟
ياتري  صراحة ويبقي ده حد كويس وبيعترف باخطاؤه
ولا بجاحة ونقول ده واحد وشه مكشوف ومعندوش دم 
ولا قلة ادب بقي وعدم احترام نفسك قدام الناس

انا من وجهة نظري مهما كان نوعها 
فانا معاها لانها رجعتني تاني للحياة 

بس خلاص 

فاصل ونكمل 

.....

انسان عادي

10‏/04‏/2010

بجد ...... خايف احلم تاني


النهارده السبت 10 ابريل 2010 الساعة 3.06 ص



احم احم 
سلامو عليكو 

اولا وقبل ما ابدأ في الموضوع عايز اقول 
ان البوست ده من ضمن مجموعة العقد النفسية اللي عندي 
يعني للي مكتئب ولا مضايق بلاش يقرا 
انا مش مسؤل
اللهم بلغت اللهم فاشهد 

ندخل في الجد بقي 
انا من فترة كبير من وانا صغير يعني دايما عايش في احلامي 
دايما ليا العالم بتاعي اللي بعيش فيه 
برسمه بمزاجي وعلي طريقتي 
وطبعا متأملا يعني انه في  يوم حاجة من ده تتحقق 

المهم ان بقي كل فترة كده حلم يوقع مني 
وبعد فترة كمان حلم يقع تاني ويتوه 

المشكلة مكنتش في الاحلام الكبيرة لانها كانت بالنسبالي 
صعب تتحق او مستحيل 
كنت بحلمها بس كده تضييع وقت بتسلي يعني 
المشكلة الحقيقية كانت في الاحلام الصغيرة
اللي هي المفروض اني اقدر احققها 
دايما كنت لما افكر في حاجة معينة واحلم بيها 
كان لازم متحصلش 
فعلا لازم متحصلش 
لما ارتب لموضوع معين اي موضوع وافكر فيه بشكل معين 
لازم لازم الشكل ده يتغير 
ويحصل حاجة مش ع البال خالص 

عارفين النكتة في ايه كمان 
ان انا لو كان حصل مشكلة مثلا او حاجة وحشة 
وانا خايف جدا من عواقبها وقلقان 
ابص الاقيها تعدي عادي ولا كان حاجة حصلت 
والعكس صحيح 
لو انا مش في دماغي او حصل حاجة وانا مش مهم حتي لو صغيرة 
الاقيها تكبر زيادة عن اللزوم 

الخلاصة اني دايما ظني بيخيب في اي حاجة بفكر فيها 
عمري ما رتبت لحاجة وحصلت 
وعمري ما فكرت في حاجة وتمت زي مانا عاوز 
سواءا كانت خير او شر 
يعني مثلا انا خارج من الامتحانات ومطمن وبقول انا ان شاء الله ناجح 
الاقيني ساقط 
ولما اكون خايف قوي ومش مطمن والدنيا مقلوبة 
الاقيني نجحت ويمكن بتقدير 

بجد بجد الموضوع ده ممكن يكون بيرعبني 
انا فعلا فعلا بقيت اخاف احلم بحاجة عشان عارف انها مستحيل هتتحقق 
ولا افكر في اي شئ في حياتي 
طالما اللي بفكر فيه مبيحصلش طب افكر ليه ؟؟؟
اخنق علي نفسي وخلاص ؟؟
عارفين 
لما اكون بتفرج علي متش مثلا لمصر 
من جوايا ببقي عايز اقنع نفسي بالعافية ان هما هيتغلبو 
عشان يحصل العكس ويكسبو 
ولو مقدرتش اقنع نفسي بالحكاية دي 
وبقيت حاسس انهم هيكسبو فطبعا ينغلبو 
ببقي حاسس اني السبب 
وبقول طب دول ذنبهم ايه تكون السبب في خسارتهم ؟؟؟

الموضوع ده بجد دايما بيحصل معايا 
وبجد بجد انا خايف قوي 
خايف احلم او افكر او ارتب 

انا عارف طبعا ان كل حاجة بامر الله 
ومفيش حاجة بتحصل الا وتكون مقدرة ومكتوبة عنده 
وانا مهما رحت ولا جيت مش ممكن اغير حاجة 
انا الحمد لله مؤمن جدا ومقتنع تماما 
مفيهاش كلام 
ويمكن ده اللي خلاني افكر من ناحية تانية 
وهي ان ربنا عايزني اكون عارف كويس جدا 
اني انا مش حاجة 
وان مش انا اللي اقول ايه اللي يحصل وايه اللي ميحصلش 
كل حاجة بامر الله 

علي فكرة 
الحاية دي كمان حصلت في المدونة دي 
انا عملتها وانا فاقد الامل ان فيه واحد ممكن يدخل ويشوفها 
ولا حد يعبرني حتي 
لكن لاقيت فيه ناس بتعدي عليا وناس بتقرا 
وبرضو فيه ناس بترد 
يعني ده كان برضو حاجة مش مخططلها 

علي فكرة 
انا مش مجنون والله 
دي لحظة صراحة بس المفروض تبقي مع نفسي 
بس انا تعبت من كتر ما قلتها لنفسي 
فقلت اخنق علي حد تاني بقي 
وارحم نفسي شويه 

شكرا للي وصل للاخر 
ونلتقي مع عقدة جديدة 
ومتخفوش العقد كتير 
ههههههههه


فاصل ونكمل 

.......

انسان عادي

07‏/04‏/2010

نفسي احبك يا ريس

النهارده الاتنين 5 ابريل 2010 الساعة 11.01 م




احم احم
سلامو عليكو

اولا انا بجد انسان عادي وعادي جدا
مش مثقف بدرجة كافية اني اكتب في مدونة
او حد ياخد بكلامي
معنديش لغة قوية او اسلوب يشد الناس 
عمري ما مشيت في مظاهرة ولا كنت عضو في حزب
 بتأثر بسرعة جدا بكل الظروف اللي بتحصل حواليا
وممكن قوي كلمتين يولعوني وكلمتين برضو ينزلوني الارض

ندخل في الجد بقي
انا زمان لما كنت بتفرج علي الافلام الوطنية بتاعتنا
واشوف الرئيس جمال عبدالناصر بيحي الشعب
والناس فرحانة بيه وبتحبه بشكل جنوني
وكل ما تيجي سيرته مثلا قدام والدتي تفضل تحكيلي
يوم ما مات
بتقولي فضلنا نعيط عليه واحنا عمرنا ما شفناه
ولما بشوف اقتناع والدي بالثورة ورجالة الثورة مهما عملو بعد كده
ومهما حصل منهم
يقولي بس دول خرجو البلد من احتلال
عموما انا كنت بعذرهم وبقول ان الاعلام كان مكثف جهوده علشان يفهمهم كده

انا مش بقصد ان جمال والثورة كانو وحشين
بالعكس هما فعلا عملو تغيير جامد جدا
بس اقصد انهم خلفو سلبيات كتير والناس عدتها
زي ما بنقول كده الشعب بلعلهم الزلط

وقلت في عقل بالي  كل الحكام بيعملو سلبيات كتير عشان الهدف الاسمي
احم احم عدوها عدوها
بس زمان الشعب كان بيحب الحكام عشان مكنش يعرف السلبيات دي
انما دلوقتي الدنيا مفضوحة وكل حاجة مكشوفة
وربنا يخلي الجزيرة اللي مستلمانا ومبتفوتش حاجة

وقلت ان ده سبب عدم حبي للريس (بدون ذكر اسماء)
لكن فيه منظر شفته زمان ايام الشيخ زايد الله يرحمه 
ايام وفاته كنت شايف حزن الشعب بتاعه عليه بجد 
كنت حاسسهم زعلانين 
انا نفسي كنت زعلان عليه جدا 
وكنت بقول فيه حاكم عربي كويس اهو وشعبه بيحبو 
ساعتها بصراحة حسيت بغيرة فظيعة 
 طب ليه انا ميبقاش عندي  رئيس بيخاف عليا وبخاف عليه
بجد كان نفسي في ده وقتها 

نيجي لعلاقة البرادعي بقي بالموضوع ده 
انا قبل كده كنت بسمع عن البرادعي قليل جدا 
عادي يعني اه هو صحيح كان حد مميز جدا 
ومصري ماسك منصب عالمي 
بس مكنش فيه اي حب بيني وبينه عادي 
مش زي زويل مثلا 
وحتي بعد ما رجع والكلام كتر عليه علي انه هيرشح نفسه للرئاسة 
يمكن بصراحة من شحنة الاحباط اللي جوايا مكنتش مصدق 
انه ممكن ياخد الخطوة دي 
خصوصا انه راجل دماغه كبيره وعارف ان الكلام ده مش سهل 
المهم فضلت العلاقة باردة بيني وبينه لحد ما حكومتنا العزيزة 
قربت الوصال بينا وبدأت تحاربه 
بدأت انا كمان اخد بالي 
طب هما بيحاربوه ليه ؟؟؟؟؟
هوممكن فعلا حد يجي ويهز كرسي العرش بتاع الريس 
بدأت افكر وبدأت كمان اقتنع انه ممكن يحصل حاجة 
ساعتها بقي بدأت اذاكر البرادعي 
وعشان انا علي نياتي زي كل المصريين (الا من رحم ربي)
صدقت كل الكلام واقتنعت بيه وايدته 
والبركة في حكومتنا العزيزة 

واملي الاخير في الدنيا اني احب الرئيس 
او الرئيس يبقي اللي انا بحبه 

وربنا يدينا ويديكو طولت العمر واشوف اليوم ده 


فاصل ونكمل 

......

انسان عادي

04‏/04‏/2010

بحب التلفزيون ولكن .........


النهارده الحد 4 ابريل 2010 الساعة 9.43 م 

التلفاز

احم احم 
سلامو عليكو 

انا بحب التلفزيون ولا لا ؟؟؟؟
سؤال سألته لنفسي مرة والاجابة متأخرتش 
لاقيتني بقول ... ايون بحبه ومقتنع بوجوده تماما
بس لما جيت اتابع علاقتي بالتلفزيون لاقتها كالتالي :

* اول لما والدتي تمسك الريموت وتبدأ جولة المسلسلات بتاعت كل يوم 
الاقيني يا اما بحاول اقنعها انها تغير القناة 
او اني اسحب نفسي من سكات واقوم اشوف حاجة تانية اعملها 

* اول لما اخويا يستلم الريموت ويبدأ يقلب في قنوات الافلام الاجنبية 
الاقيني برضو بحاول معاه انه يغير من عليها 
لكن برضو كل المحاولات دي بتبوء بالفشل 
وبرضو اسحب نفسي تاني لنفس الحاجة الاولانيه 

* ولما تيجي الوصلة بقي بتاعت والدي ويستلم هو الراية قصدي 
الريموت يعني ودي بقي بتبقي الجولة الرياضية
وفيها بيعدي علي الاخ مدحت شلبي في مودرن او الاخ محمد الليثي 
في الاهلي وساعات علاء صادق ع النيل وهكذا بقي 
طبعا مع والدي مش بحاول معاه انه يغير القناة اللي بيتفرج عليها 
انا كل اللي بقدر اعمله ابدي رأيي في البرنامج اللي بيسمعه 
يمكن يقولي عندك حق ده برنامج وحش ويغير بقي 
الاقيه يقولي البرنامج ده مش حلو انا بقي اقول في عقل بالي كويس 
هيغير اهو فيرجع يقولي بس نشوفه هيعمل ايه 
وطبعا انا ولا بنطق عادي 

المشكلة بقي بتجي امتي ؟؟؟؟؟
لما اكون قاعد لوحدي او اللي موجودين مش مهتمين بالتلفزيون
وسايبينلي الدفه وانا اللي سايق 
المشكلة اني مش بلاقي حاجة بتعجبني 
افضل الف علي كل القنوات بكل انواعها 
وتقريبا اللفة دي مش بتاخد نص ساعة وازهق واقوم 
واسيب التلفزيون لوحده 

المهم بقي انا نفسي اعرف انا بحب التلفزيون ليه 
لما انا مش بحب حاجة فيه ليه متخيل ان الحياة من غير تلفزيون هتبقي صعبة 
مع انه عادي اهو ولا فارق معايا 

انا يمكن المرة الوحيدة اللي تابعت التلفزيون فيها كتير قوي 
وخليت اللي في البيت كمان يتابعو معايا 
كانت لما قناة ناشونال جيوجرافيك ابوظبي نزلت واشتغلت 
بقيت اتابعها يشكل مستمر  وبقت حاجة اساسية في حياتي 

بس دي من وجهة نظري انا تابعتها مش حبا في التلفزيون 
لكن لاني تخصص هندسة وهي بتجيب حاجات كتير انا فاهمها 
وبتعلي دماغي كده 
لاقيت نفسي فيها يعني 

لكن غير كده لا 
يمكن بتفرج علي ماتشات الكورة من غير تحليل عشان بكرة التحليل 
وممكن برامج قليلة قوي زي العاشرة مساءا و واحد من الناس 
ومش بصفة مستمرة كمان 

السؤال للاخوة المشاهدين في البيوت 
السؤال بيقول علل اي افطن 
انت شايف ان التلفزيون بتاعنا المصري الخاص والحكومي 
بيقوم بدوره المطلوب منه كاعلام وكثقافة 
ولا احنا بنسلي نفسنا وبنضيع وقت وخلاص ؟؟؟؟؟

انا شايف اننا بنهزر وبنضيع وقت 
انا وانت 

احم احم 

فاصل ونكمل 

.........

انسان عادي

سكت


النهارده الحد 4 ابريل 2010 الساعة 1.05 ص




سكت 

سكت ملقتش رد عليه وسكت مش عارفه اقوله ايه 
حسيت وكاني هنت عليه وبجد انا عمري مرة ماهنت 
تعبت مكنتش اتصور يجي يوم وهوانا يتغير 
بيقول احساسه متحير وكمان بيقولي انا اتسرعت 

ازاي بقي يعني ده اسمه كلام بيروح في ثواني شوق وغرام 
وليالي الحب الاحلام بتكون غلطة غلطناها 
معقولة فراقنا ده عادي اتنين حبو وبقي ماضي 
ازاي قلبو طلع فاضي دي حاجة صعب معناها 

فهمت انا ولا مش فاهمة كلامو بجد كان صدمة 
محستش بـ ولا كلمة وحسيت اني بس بضيع 
ده هواه فجأة طلع كدبة واهو كل غرامه كان لعبة 
ياه ع الدنيا دي صعبة واحساسي بجد فظيع 


احم احم 
سلامو عليكو 
انا مكنتش ناوي اكتب اغنيتين ورا بعض كده 
انا اصلا مكنتش ناوي اكتب اغاني خالص زي ما قلت 
بس بجد الاغنية دي رغم حزنها انا بحبها جدا 
عشان كنت حسسها جدا 
هي فعلا مكتوبة علي لسان بنت 
لاني كا راجل مقدرتش انكسر في احساسي مظبوط 
فاستعملت المرأة وقولتها علي لسانها 
المهمة ان هنا من وجهة نظري الرد علي  صدمة معينة 
او صدمة العمر زي ما بيقولو مش بيكون بالبكا 
ولا بالحزن ولا بالدموع 
الرد هنا بالسكوت 
حاجة فعلا كانت مستحيل تحصل 
لكن حصلت خلاص 
البطلة هنا مش عارفه تعمل ايه 
فسكتت 

علي فكرة 
انا كتبت الاغنية دي هنا وهي اغلي اغنية عندي 
عشان اصالح حد زعلان مني 
ياريت بقي ميكونش زعلان 
ماشي ؟؟؟؟

فاصل ونكمل 

........

انسان عادي

Recent News

Introduction

Recent News