17‏/11‏/2011

"لوليتا " وحرية التعرّي

احم احم 
سلامو عليكو 










وحشتوني كتير جدا 
عارف اني مقصر بس معلش بقي 
الكسل وحش 
المهم انا كنت مريح كتير قوي ومش بكتب حاجة 
مع ان كان فيه حاجات كتير قوي تستحق الكتابة يعني 
بس بصراحة اكتر الموضوعات استفزازا لحد دلوقتي الانسة لوليتا 
اكيد طبعا كلنا سمعنا عنها وعن افكارها وجرأتها و..........

بصراحة بالنسبالي مفيش مشكلة 
واحدة عايزة تقلع وتنشر صورها ماشي 
ماهو كل يوم في الاف يعني بيقلعو 
في ناس بتداري حاجات وتظهر حاجات 
وناس تانية بتظهر كل حاجة 
مش دي المشكلة 
اللي استفزني اكتر التعليقات علي الحكاية دي 
معظم الناس اللي علقو علي الموضوع ده بيقول فيما معناه 
رغم اختلافي معاكي الا اني عاجبني جرأتك جدا 
مع كامل احترامي لجميع الناس
الا اني مش شايف دي جرأة 
دا تجرّأ يصل الي السفالة
مش هتكلم من اي ناحية دينية 
لان طبعا زي ما هي قالت انها ملحدة ولا تؤمن باي دين 
واخلاقيا برضو هي اكيد كمان وجهة نظرها انها بتعمل عمل بطولي 
وعادي لما يحصل شويه اخطاء بسيطة 
مفيش مشكلة يعني 

بس اللي انا عايز افهمه فعلا وبجد والله 
ايه الحرية في ده 
يعني هي شايفة اننا مجتمع متخلف 
شكرا يا ستي 
ايه اللي هيغير التخلف ده بقي لما نشوف صورة سيادتك عارية 
ايه علاقة الحرية بالعري 
حد يديني الحلقة الماسكة الاتنين دول ببعض
حرية شخصية مع نفسك 
اقفلي اوضتك يا انسه واعملي اللي انتي عايزاه 
وهتفرق في ايه يعني اتصورتي في بيت والدك ولا بيت شريكك "علي حد قولها يعني"
متهيالي مش هتفرق كتير يعني 
ماهو اكيد الصورة دي مش جديدة عليه يعني 


والله انا مش عايز اجي قوي علي البنت 
هي حاجة برضو لسه صغيرة 
17 سنة او ازيد شويه 
بس دي برضو سفالة 

وكمان الخبر اللي داير قوي ع الفيس 
ناشطة سياسية مش عارف تعمل ايه .....
ناشطة مين ياعم 
الله يسامح الثورة اللي عملت اي حد ناشط سياسي 
بأمارة ايه يعني ناشطة 
وبامارة ايه سياسية
ولا صحيح اللي خلي الاخ سبايدر ناشط سياسي 
يخلي الاخت لوليتا ناشطة 

بصراحة انا بدأـ اضايق واتخنق من اللي بيحصل 
شايف كل شويه ماشيين في طريق 
والثورة انضربت 
والدنيا باظت 
ومحدش فاهم حاجة 



الله يرحمك يا مصر 


سلامو عليكو

08‏/11‏/2011

ايزيس

إيزيس

نفسي أنام فينك؟
يا ام الرموش عنقريب
(العنقريب سرير يصنعه اهل النوبة من الجريد)
ماتدمّعيش عينك
الفرح جاي عن قريب

إيزيس

إزاي بتتحمّل؟؟
أنساها .. وتجيني ..
أسقي بنات الدنيا إلاّها
ولما العطش يكويني ألقاها
هي اللي تسقيني
تهديني يوم وردة
أدِّيها لفلانة
تجري على حضني احكيلها عن نانا

إزاي بتتحمّل؟
غمز البنات واوعر من غمزهم ردِّي
جاياني ملهوفة ما تلاقي غير صدِّي
أحزن في أحضانها وافرح هناك وحدي
يا ام القليب اتخلق معرفش غير يِدِّي

يا ام الفؤاد ولاّد
معرفش غير يعشق
الصبر عدّى وزاد
يا قلبها المتقاد
ما عرِفت يوم تزهق
كانت بتلبس لي اجمل فساتينها
ترمي ف صحاريا أفتن بساتينها
تِدْمع رياحينها
ولا قلبي يوم يشفق

وإزاي بتتحمل ؟؟؟
كُتر الكلام عني بحكاوي وانا غايب
الليلة كان سهران
الليلة كان سكران
الليلة كان عاشق والليلة كان دايب

يا ام الرموش طايشة وام العيون لامّة
حضبك ما حيسعنيش انا بَلْوِتي طامّة
اربع سنين يا هوا مِلْكِيّتي عامّة

كل البنات اتلبنوا بيا وتفُّوني
ورسموني خروف معلوف وسمعوا قصايدي وابتسموا وصحيم
بدري يوم العيد ودبحوني
بقالي ييجي اربع سنين مسمار في غيط شواكيش
دَقُّوا على راسي لكن مثبتونيش
يوم التقي مرسى وسنين ياخدني الطيش

كل الالم فيّا ومش قادر اتألم
وبتصعبي عليا ومش بقدر اتكلم
انا نفسي بس افهم
كل البلاوي ديا ازاي مابعّدوكيش

سامحيني لما اغلط
وانا تاني رايح اغلط لجلٍ تسامحيني
احلى ما في التوهان اول ما باجي اوصل 
واحلى ما في الاحزان انك تضميني

يا مسكناني ضلوع
جواكي راح وبراح
ما بينلهاشي رجوع
شكلي حاموت سواح

كان نفسي فيكي زمان أياميها كان لي قلب
كانت الحياة خضرا
النخلة والبقرة
والقلب طين ابيض بينام على القرآن وبيصحى وقت الحَلْب
اياميها كان لي قلب
ايه اللي قلب النور ضلمة وليل راسي؟
واشمعنى فوق راسي يحلا العذاب والقلب؟
واشمعنى سابوا الناس بقلوب خضار وعمار ؟ وف قلبي نِزْلوا سَلْب ؟
انا اول اللي اتصلب بس التاريخ كداب مفهمش معنى الصلب
ركعوا البنات ليا واتّنوا قدامي
وفي حفل اعدامي
ضحكوا وقالوا كلب

انتي اللي دمّعتي
جمّعتي جسماني من مملكة ايزوريس ويا ريت ما جمّعتي
طب كنتي سبتيني ادخل هنا غزوة واعمل هنا هُدْنة
وما دمت انا ميت ايه تِفْرِق الدفنة؟
ما البحر راح يسبق لو مهما جدّفنا
انتي اللي بتعاندي وعشمانة في الجنة
والجنة مش ليا

إزاي بتتحمل لوم الصحاب فيا؟؟
على ايه غرامك بيه؟
ده التبن من تحتيه
باقي الماعون مية
تضحك على قولهم وتبص في الساعة وتقول زمانه صِحِي
زيدي كمان نورك يا ام الجبين الضَّحِي
جَنّنِي صوت حزنك إياكي يوم تفرحي
لا الفرحة تسرقنا

لا انا حِمل مهرك ودهبك ولا جاي معاي عاجِك
ولا حمل توب من حريرك ولا ماسة من تاجك
ده انا بالكتير حاجج من وسط حجاجك
جيت لك في شهر حرام فمتهدريش دمي
ماتقربيش مني مانتيش كِفَا همي
وَلِّي لحجاجك يا ام الجبين عرفات
حبك كما الصلوات والقِبلة مش يَمِّي

يا معلماني الهوا ومسَكِّنة التباريح
حبك نخيل طارح ميهزهوش الريح
ارمي الحجر جارح تنزِل رطب مجاريح
إزاي بتتكسر اشواكي جواكي
ابكي على صدرك القى البكا تفاريح

إزاي بتتغير دنيايا جوايا اول ما اكون جنبك
وإزاي يجيلك صبر تنشفي بكايا والذنب مش ذنبك
انا الاعمى
جفاني الحب ونسيته على ايدين اللي تتسمى ما تتسمى
قطع راسي على خوانة ولا كَبَّر ولا سمّى
ولا سابني اموت مستور ولمّ عليا ميت لمّة
وذنبك ايه بقية السكة تقضيها بعجوز اعمى؟

انا اللي الناس بتخشاني هوا ومنظر
هموم الدنيا خاشاني وبتمنظر
وعايش عيشة خشّاني وبتغندر
وبتلكلك في حضن الليل سُكّيتي
عواصفي فوق حدود وصفي
وبابك صعب يتحمل عواصف مهما سَكّيتي

انا المدبوح ولما تقول لي حبيتك بحس دماغي واكلاني
اردّ بايه على بنيّة في كل كيانها شايلاني
انا المجرم وانا القاسي وانا اللي نسيتها ميت مرة ما نسيتني
ومشيتها في دروب مرة ما ملّتني
وداست ع الطريق حافية وسلّتني
وصحيت بدري وقت الفجر صلّتني

ارد بايه؟
وقلبها سابها في متاهة
قليل الاصل غَيَّاها
وقلبي التاني قسّاني وقلّ باصله ويّاها


غرامك يا ام طيف مخمل بيتجمّل
ويفرش صدري بالعنبر وبالمحمل
انا المعشوق يا كل العاشقين غيروا
تحبوا شيء جميل طبعا لكن تتحبوا ده الاجمل
حبيبتي احلى من شعري واحلى م الحروف كُمَّل
ولا بتهجر ولا بتغدر ولا بظلمها تتململ
لكني في حيرتي بستغرب
انا ازاي مش بغني لها ؟
وهي ازاي بتتحمل؟؟؟؟

07‏/07‏/2011

العاصفة





احم احم
سلامو عليكو

فاكرين فيلم العاصفة بتاع خالد يوسف 
بتاع حرب العراق والاخين اللي واجهو بعض 

عارفين الاحساس ده 
لما تكون انت في موقف واخوك في موقف معادي 
واقف قصادك وشك في وشه

انا تقريبا حاصل معايا الموقف ده 
بس مع بعض التعديلات 
اولا انا مش واقف قصاد اخويا 
انا واقف قصاد نفسي

حبة توضيح بقي
طبعا انتو عارفين ان انا في الجيش الايام دي
في ايام ثورة يناير وبالظبط يوم الخميس 10 فبراير انا كنت في ميدان التحرير 
انا مكنتش لسه بقيت ظابط ومكنتش مسؤول عن حاجة 
انا كنت في التحرير يومها كمتظاهر 
ولو كنت موجود في بيتنا في الايام اللي قبل التاريخ ده 
كنت قضيتهم في التحرير مع الناس 
ولكن للاسف كنت في الجيش 
المهم انا ساعتها مكنتش بفكر قوي ان انا في الجيش ومينفعش ابقي متظاهر 
كنت بتعامل زي ما بيقولو عندنا في الجيش "ملكي"
والحمد لله الثورة نجحت 

نيجي بقي بعد 5 شهور من اليوم ده 
انا بقيت ظابط والمفروض اني مسؤل 
وبكرة الجمعة 8 يوليو المفروض ان فيه ثورة الغضب التانية 
انا بكرة موجود في الوحدة بتاعتي بأمنها من اي حد 

بغض النظر عن اي حاجة 
سواءا بقي اللي في التحرير صح ولا غلط 
الجيش صح ولا غلط 
بس في 5 شهور انا اتحولت من الصف ده للصف اللي في المواجهة
والصراع بقي داخلي 
عارفين ابو العربي وهو بيقاسي مع حرب الجينات اللي عنده 
بين ابوه الشهيد وخاله الواطي 
اهو انا تقريبا في نفس الموقف 
عارف ان الجيش متكاسل ومتراخي في اخد قرارات لازم تتاخد
بس كمان قربت ازهق من الفوضي اللي في البلد
عارف كويس جدا ان النظام السابق مش هيمشي بسهولة 
ولازم "يفرفر "قبل ما يموت 
دي حاجة منطقية يعني 
بس احنا كمان لازم نبقي اذكي من كده 
ونفهم احنا رايحين فين 

مش عارف اقول لحد روح التحرير 
ومش جايلي قلب اقوله ما تروحش 

بس ياريت اللي رايح يتظاهر باسلوب محترم ويراعي سمعة مصر 
ويحترم مشاعر قوات الامن اللي هتبقي موجودة 
ارجوكم بلاش استفزاز لا للشرطة ولا للجيش
الناس دي مش هما اللي سرقوكم والله 
اذا كان في خطأ في القادة بتوعهم بلاش تاخدوهم بذنبهم 
اكيد اللي موجود في التحرير من الامن رايح علشان يأّمن مصر 
وشعب مصر 
يا اهل التحرير خافو علي مصر 
امنعو البلطجية من انهم يوصلو لغرضهم 
البلطجية بيستخبو بينكم 

ربنا يوفقكم ويحميكم 
ويحمي مصر وينصرها 

اللهم امين


سلامو عليكو

22‏/06‏/2011

النظام الفوضوي & الفوضي المنظمة

http://games.bnanet.com/files/image/istefada_Se8D1.JPG












احم احم 
سلامو عليكو


انا بكره النظام
طبعا عنوان زي ده زمان كان عمل قلق 
كلمة نظام في حد ذاتها بقت ليها هيبة داخليه كده
بس انا هنا مش بقصد النظام اللي هو الحكومة السابقة 
انا بكره النظام اللي هو الترتيب 
اه انا مش بحب الفوضي 
بس برضو بيبقي شئ ممل لما كل يوم تبقي نفس  الحاجات بنفس الشكل 
خصوصا بقي لو كان النظام ده ظاهريا بس 
يعني نرتب الشكل من بره ومن جوه فوضي 

ندي مثال عشان نفهم 

مثلا ايام ما كنت لسه في الكلية وكنت بذاكر بقي وكده
"طبعا الكلام ده في شهر الامتحانات يعني بس"
انا كانت عندي عادة كده 
عندي طرابيزة كبيرة شوية كده ومكتب 
بحط كل الكتب والورق المتعلق بكل المواد بتاعتي علي الطرابيزة دي
بتبقي كل مادة ورقها وكتبها وكشاكيلها 
بس ده مش بيبقي واضح لاي حد يعني 
تقريبا انا بس اللي كنت شايف كده
لان كل يوم لما يجو يرتبو الاوضة بتاعتي 
بلاقي كل الكتب والورق والكشاكيل اتلمو علي بعض 
واتحطو علي المكتب 
والاقي الطرابيزة عليها مفرش جميل وحاجة زي زهريه كده
هما فاكرين كده انهم رتبو الكتب 
لكن بالنسبالي هي اتلخبطت 
وفاكرين ان منظر الطرابيزة بقي اجمل 
لكن برضو انا شايف ان ده محصلش 
لان وظيفة الطرابيزة اني اذاكر عليها 
مش انه يتحط عليها مفرش جميل وزهرية 

الممل في الموضوع ان الحكاية دي كانت بتحصل كل يوم 
يعني انا اخرج من بيتنا حتي لو نص ساعة 
ارجع الاقيهم رتبو الاوضة 
يعني من وجهة نظري انا بوظو النظام اللي انا عامله 
وقولتلهم ملايين المرات محدش يرتب كتبي 
اعملو اي حاجة في الاوضة 
بس سيبو الطرابيزة والمكتب 

اتهموني ان انا مش بحب النظافة
ومش مرتب 
وحاجات تعبانة كده

اللي انا عايز اوصله بقي ليكم 
ان النظام  ده برضو حاجة نسيبة 
يعني انا بستخدم الحاجة دي يبقي اجدر واحد يقدر ينظمها 
حتي لو شكلها قدام الناس انها في حالة فوضي 

وبما اني مهندس برضو اتعلمت حاجة 
ان الهندسة هي انتاج سلعة بأقل تكلفة وأقل مجهود واعلي جودة 

فكل واحد بينظم حياتو علي اساس هو ممشيها ازاي 

يعني انا مقدرش اقول عليك انت مش منظم طالما انت ناجح في حياتك 
النظام اسلوب له اشكال مختلفة 
المهم تكون فاهم 

وانا شخصيا من عشاق الفوضي المنظمة 
بتبقي ممتعة اكتر من النظام والترتيب الروتيني اللي اي حد يفهمه 
ويتعامل معاه 

مش عارف وجهة نظري وصلت ولا لا 
بس عموما انا بكره النظام بتاعكو المتعارف عليه


شكرا 
سلامو عليكو

19‏/06‏/2011

قانون مورفي

احم احم
سلامو عليكو

حد سمع عن قانون مورفي ده
انا كنت قريت عنه من فترة كده وبعدين نسيته
وبالصدفة جه قدامي تاني
بصراحة الموضوع عاجبني قوي 
انا حاولت اجمع اكبر عدد من القوانين لاني عايز احتفظ بيها بصراحة 
وده أأمن مكان عندي 

اه
ده قانون من عندي علي غرار قوانين مورفي 
دايما الحاجة اللي بتخاف عليها من الضياع اول حاجة بتضيع


  • كل شيء يتعطل في الوقت نفسه
  •  إذا تركت الأمور على عواهنها فسوف تنتقل من سيء إلى أسوأ
  • يستحيل تحصين أي أمر ضد الأغبياء لأن غباءهم مبدع
  • لو سار كل شيء على ما يرام، فأنت لم تلحظ الخطأ فقط.
  • الكون ليس غير مبال بالعلماء فقط.. إنه ضدهم على طول الخط..
  • أي سلك تقطعه حسب طول معين هو أقصر من اللازم.
  • احتمال حدوث خطأ يتناسب طرديًا مع الضرر الذي سيسببه هذا الخطأ.
  • عندما يفشل كل شيء آخر اقرأ التعليمات.
  • الرجل الذي يبتسم عند الفشل، يعرف رجلاً آخر يلقي باللوم عليه.
  • لابد أن يسقط التوست على الجانب الذي دهنته بالزبد.
  • احتمال سقوط التوست علي الجانب المدهون بالزبد يتناسب مع ثمن السجادة.
  • الأمر يستغرق وقتًا أكثر مما توقعت له، ومهما فعلت.
  • من سوء الحظ أن تكون متشائمًا.
  • قانون لورا: الطفل لا يقيء وهو في الحمام أبدًا.
  • قانون النوافذ: القذارة على الجانب الآخر من الزجاج دائمًا !
  • قانون الذاكرة: فرصة نسيان شيء مهم تتناسب مع.. مع.. مع....
  • لو لم يسر الأمر حسب الخطة، فلا توجد خطة أصلاً.
  • ابتسم.. فالغد أسوأ.
  • الأشياء تتلف حسب قيمتها.
  • لا يمكن أن تحمي عملك من الحمقى، لأن الحمقى عباقرة.
  • كل حل يخلق مشاكل جديدة !
  • الشيء الذي يقع، يقع في المكان الذي يسبب فيه أكبر ضرر ممكن.
  • بعد ما تبتاع بديلاً للشيء الذي بحثت عنه في كل مكان ولم تجده، يظهر الشيء الأصلي.
  • بمجرد شراء تلك السلعة النادرة، سوف تجدها معروضة في كل مكان وأرخص مما اشتريتها.
  • صمم شيئاً يستطيع حتى المعتوهين استعماله، ولسوف لا يستعمله سوى المعتوهين.
  • كل شيء ممتع في الحياة غير قانوني أو غير أخلاقي أو يسبب السمنة.
  • كل شيء يقع في الحمام لابد أن يسقط في المرحاض.
  • أي شيء تضعه في مكان أمين، لن تجده أبدًا ثانية.
  • الأفكار العظيمة لا نتذكرها أبدًا، والأفكار الغبية لا ننساها أبدًا.
  • الغسالة لا تبتلع إلا فردة واحدة من كل زوج من الجوارب.
  • الضوء في نهاية النفق قطار قادم !
  • صندوق الخطابات دائمًا في الناحية الأخرى من الشارع.
  • الفوضى تربح دائمًا لأنها أفضل تنظيمًا !
  • لو لم تنجح، تخلص من أية أدلة على أنك حاولت.
  • لكل قاعدة شواذ ما عدا هذه القاعدة.
  • الرجل الذي يسبقك مباشرة في طابور المصرف، يقوم بأعقد إجراءات ممكنة.
  • معرفتك بقوانين مورفي لن يساعدك في شيء!
  • قانون الموظف:عندما تكون مشغولا تكثر الطلبات وتتولد الافكار بلا توقف وفي لحظات الفراغ لا أحد يسألك شيئا
  • نظرية كانون: إذا أخبرت رئيسك بأن انفجار إطار سيارتك قد سبب قدومك متأخرا، فسوف ينفجر إطار سيارتك في اليوم التالي
  • - مبدأ ماكسيم: المنطق هو الطريقة المنظمة للوصول بثقة إلى الاستنتاج الخاطئ
  • - نظرية أوتونيل الثانية: عند اكتشاف وإصلاح خطأ ما، فسوف يكتشف فيما بعد أن ذلك الخطأ قد كان صحيحا من الأساس
  • - قانون غامبرسون: درجة احتمال حدوث أي أمر تتوافق بصورة عكسية مع درجة الرغبة في حدوثه
  • - مبدأ إهمان: الأمور سوف تسوء قبل أن تتحسن
  • تعليق غامبرسون: من قال أن الأمور سوف تتحسن.
  • - القانون غير التبادلي للتوقعات: التوقعات المتشائمة تعطي نتائج سيئة، والتوقعات المتفائلة تعطي نتائج سيئة.
  • - قانون الاسترجاع: يستحيل إيجاد الوثائق الضائعة قبل القيام باستبدالها.
  • - قانون الطائرات: عندما تكون الطائرة التي أتيت فيها متأخرة ستأتي الطائرة التي ترغب في التحويل إليها في موعدها.
  • - مبدأ إيتور: المسار الآخر يتحرك بسرعة.
  • - مبدأ بيير: كن على حذر ممن يجهد نفسه في تعلم شيء ما ثم يجد أنه لم يصبح أكثر علما من ذي قبل، لأنه مليء بحقد قاتل على الناس الذين وصلوا لنفس الدرجة من الجهل دون أن يبذلوا الجهد نفسه.
  • - قانون بيير الثاني: ساعد المرء عند حاجته، وسوف يتذكرك عندما يقع في ورطة أخرى.
  • - قانون كارسون: أفضل للمرء أن يكون غنيا ومعافى من أن يكون فقيرا ومريضا.
  • - قانون ويلر: ليس هناك مستحيل للشخص الذي عليه أن يقوم بالوظيفة بنفسه.
  • - قانون بيكهاب: الجمال مضروبا في الذكاء يساوي رقما ثابتا.
  • - قانون الهمس: سوف يصدق الناس كل ما تقول إذا قلته لهم همسا.
  • - قانون الحظ: إذا أكلت ضفدعا حيا في بداية اليوم، فلن يحصل لك أمر أسوأ بقية ذلك اليوم.
  • - مبدأ كارنسدك: بعد أن تذهب الأمور من سيء إلى أسوأ سوف تعيد الدائرة نفسها.
  • - نظرية غروسمان: كل المشاكل المعقدة تملك أجوبة سهلة ويسيرة الفهم ولكنها خاطئة.
  • - مبدأ كونوي: في كل منظمة هناك شخص يفهم تحديدا ما الذي يحدث، ذلك الشخص يجب أن يفصل.
  • - ملاحظة رالف: من الخطأ جعل أي أداة ميكانيكية تلاحظ أنك مستعجل.
  • - تعديل جنسبرغ على القوانين الثلاث للديناميكا الحرارية: لايمكنك أن تفوز، لايمكنك أن تخسر، لايمكنك أن تنسحب.
  • - مبدأ لويس: يحصل المرء في الأغلب على أقل ما يرغبه
  • - مبدأ غب: يتزاحم الأغبياء على المكان الذي يزدحم بالأغبياء.
  • - مبدأ كول: مجموع محصلات الذكاء على هذا الكوكب هو رقم ثابت، وعدد السكان هو الذي يزيد.
  • - قانون الحديث: عندما تذكر شيئا ما، إذا كان جيدا فسوف يختفي، وإذا كان سيئا فسوف يحدث.
  • - قانون هلرانج: إذا انتظرت فسوف يبتعد....
  • تعديل شيفلسون: إذا انتظرت فسوف يبتعد.. :بعد أن يقوم بفعله: إضافة غريلب: إذا انتظرت فسوف يبتعد.. بعد أن يقوم بفعله.. وإذا كان فعله سيئا فسوف يعود مرة أخرى.
  • - قانون دوشارم: الفرصة تطرق الباب دائما في أسوأ الأوقات لها.
  • - الفرضية التماثلية الأولى: الأشياء التي لاتماثلها أشياء أخرى تماثل بعضها البعض.
  • - القانون الغير قابل للتطبيق: غسل سيارتك لجعل السماء تمطر لن يفيد.
  • - قانون النقانق: على الناس الذين يحبون النقانق ويحترمون القانون أن لايروا مطلقا كيف يتم صنع الاثنين!!
  • - قانون غولد: إذا ناسبك مقاس الحذاء فالحذاء قبيح.
  • - مبدأ غالويس: إذا أدخلت حماقة إلى الكمبيوتر فلن تخرج منه غير الحماقة، ولكنها وبسبب مرورها داخل جهاز باهظ الثمن ستصبح حماقة نبيلة لايجرؤ أحد على انتقادها.
  • - قانون كوهن: ما يهم فعلا هو الاسم الذي تطلقه على الحقائق وليس الحقائق نفسها.
  • - قوانين جيرالد الحركية: إذا كان الشيء في وضع الحركة فهو يتحرك في الاتجاه الخاطئ، وإذا كان في وضع السكون فهو في المكان الخاطئ.
  • - قانون غولدوين: الاتفاقية اللفظية لاتساوي قيمة الورق المكتوبة عليه.
  • - قانون لانغين: إذا تركت الأمور للصدف فسوف تصبح أفضل.
  • - قانون لانغين الثاني: إذا احتفظت برباطة جأشك بينما الكل حولك يفقدونها، فربما لم تفهم بعد ما الذي يجري.
  • - إيضاح إبلي: الزواج هو الإتحاد الوحيد الذي لايمكن تنظيمه، فكل من الطرفين يعتقد أنه الإدارة المسؤولة.
  • - قانون بيكر في الاقتصاد: إنك عازف عما يمكنك الحصول عليه.
  • - ملاحظة بوركون: يقاس تأخر وصول المرء في المسرح ببعد مقعده عن الممشى في الوسط.
  • - قاعدة بوسويل: لا أحد يؤكد أن السيارة المستعملة تقتصد في الوقود إلا البائع.
  • - دستور المحادثة: إن لم تود أن يسمع أولادك ما تقول فتظاهر بأنك تخاطبهم.
  • - قاعدة ديكسون لعمر 49: أكبر عزاء لمن بلغ التاسعة والأربعين إدراكه أنه شاخ ولن يموت شابا.
  • - قاعدة غيست للسفر مع الأولاد: لاتذهب وإياهم في إتجاه واحد أبدا.
  • - بشارة غيلبرت: أكبر مؤشر على أنك في ورطة في العمل أن أحدا لا يحاول تعليمك كيف تنجز عملك.
  • - لغز غريسون: أصغر ثقب يفرغ أكبر إناء إلا إذا أعد عمدا للتصريف فهو حينئذ ينسد.
  • - مبدأ هارييت في المطاعم: في كل المطاعم تزداد قساوة قطع الزبدة بازدياد طراوة الخبز المقدم على المائدة.
  • - قانون هليبرغر للمحامين: عندما يعمل محام واحد في البلدة فإنه لايستطيع كسب عيشه أما إذا كان هناك محاميان فسوف يكسب كلاهما رزقه وزيادة.
  • - قاعدة هوف في المسؤولية: توزيع لامسؤولية مئة في المئة على اثنين يعطي كل منهما عشرة في المئة !!
  • - قانون غيست في آداب القيادة: تزداد رعونة السائق بازدياد هلهلة السيارة.
  • - مؤشر كينوورثي: كثافة السجادة في مكتب المسؤوول الذي استدعاك مقياس لفداحة المشكلة التي تواجهها.
  • - وصيتا لاوس للأسفار: إذا وصلت إلى المحطة باكرا تأخر القطار، وإذا كنت مستعجلا فاتك القطار.
  • - نظرية وبستر: نادرا ما تتجاوز أضرار الحوادث الحد الأدنى الذي تغطيه شركات التأمين.
  • - نظام نودل: المسؤولون الوحيدون الذين تجدي مراجعتهم هم الذين لايقابلون الناس.
  • - قاعدة موراي: أي بلد تدخل الديمقراطية اسمه ليس ديمقراطيا. ((الديمقراطية غير قابلة للتنظير))
  • - قاعدة زيا: سيحدث حسب ايمانك. ((أعتقد أنه يقصد ايمانك بحدوث الشيء))
  • - قاعدة الغميز :لا تكن في أول القطيع ولا في اخره (لان اوله حمار واخره كلب)

نفسي ارجع تاني صاحبكم













اسالو عليا يا مدونين عيب كده

صباحو كدب













احم احم
سلامو عليكو


ازيكو يا مدونين
بعد فترة من الاحباط قررت ارجع زي زمان قوي
واكتب وخلاص

بصراحة الاحباط جه من اني فضلت فترة كبيرة مش بكتب حاجة 
ولما قررت اكتب لاقيتني مش عارف اكتب 
زي ما اكون خدت علي الكسل 

المهم قررت اكتب لكم النهارده وخلونا نهبل مع بعض 

نبدأ باكتر حاجة مستفزاني جدا جدا الايام دي وهي هوس الفيس بوك 
معاكم ان الفيس كان عامل كبير في ثورتنا 
وكلنا بنشكره علي الموقف النبيل ده 

 لكن اللي بيحصل ده كتير قوي يعني 
اي واحد ماشي في الشارع وشاف اي حاجة يروح عاملها بيدج 
نام وحلم بحاجة يصحي من النوم اول حاجة يعملها بيدج للحاجة دي 
الكلام ده من قبل الثورة بس بعد الثورة زادت بفظاعة يعني 
ده غير ان الصفحات دي اصلا مش بتعمل حاجة غير انهم يعملو اعلانات لبعض 
هو ده الحاجة الوحيدة اللي بيعملوها 
تدخل علي البيج من دول تلاقي كلها اعلانات لصفحات تانية اتفه منها 
يعني الصفحة بقت عبارة عن عنوان بس 
ده بقي غير الكدب اللي بقي علي الفاضي والمليان 

تلاقي واحد عامل بيج بيقول 
ازاي تخترق معرفش ايه والله العظيم شغال بس انت اتبع الخطوات 
ويخليك تعمل لايك لسبعميت صفحة 
وفي الاخر يقولك لا لا انت اكيد غلطت في حاجة 

وصفحة تانية لفيديو فضيحة معرفش مين 
مش هنعرض الفيديو الا بعد ما نوصل 10000 
ونفس الحوار تاني 

بستغرب جدا لما بلاقي صفحة فيها تقريبا اكتر من 20 او 30 الف 
وهي اصلا مش بتقول اي حاجة 
مش بقصد انها صفحة تافهة 
لا دي اصلا مفيهاش اي حاجة غير المبادلات الاعلانية 

انا معرفش ايه الفايدة منها بصراحة الصفحات دي 
انا فكرت مثلا وقلت يمكن الصفحات دي اصلا الهدف منها الدعاية دي 
وبيكسبو منها فلوس 

ما انا هتجنن يعني 
انت بتعمل الصفحة دي ليييييييييييييييييييييه ؟؟؟؟؟؟؟؟؟
بتستفيد ايه 
لا انت بتنشر رأي 
ولا بتحارب فساد
ولا بتكسب فلوس 
ولا بتضبط بنات "سوري يعني "
ولا بتعمل ايه حاجة 

بصراحة انا ضغطي بقي يعلي كل اما اشوف الصفحات دي 
وبقيت اعملهم ريبورت اول باول كده علي طول 



يلا اشوفكم علي خير 
لما ربنا يريد وارجع اكتب تاني

21‏/05‏/2011

ثورة الغضب المصرية التانية

احم احم
سلامو عليكو




















يوم التلات 25 يناير 2011 كنا نازلين في شوارع مصر كلها 
ضد الفساد والتعذيب 
وكنا بنطالب بالحرية واليمقراطية والعدالة الاجتماعية
لا كان فيه محاكمة مبارك ولا العادلي ولا اي حاجة من الكلام ده 
ونظرا للاهمال اللي اتقابلت بيه مظاهرات يوم 25 يناير
قررنا اننا ننزل يوم الجمعة 28 يناير (جمعة الغضب) 
عشان نقولهم ان احنا لينا صوت ورأي ومش مهمشين 
وعلي الاقل لازم نتسمع 

المهم انا مش بحكي الاحداث 
كلنا عارفين الاحداث كويس 
انا عايز بس افكر الناس احنا كنا نازلين ليه في الاول 
وكانت مطالبنا ايه 
وبعد كام يوم ازاي المطالب دي اتحولت وكبرت بطريقة كبيرة 
لما حسينا ان مفيش حد مهتم بكلامنا 
كنا بنشتكي من فساد الشرطة ..... بقينا نطالب بمحاكمة وزير الداخلية 
اداء الحكومة مكنش علي المستوي المطلوب 
طالبنا بتغيير الحكومة 
طالبنا بتنحي رئيس الجمهورية 
ومش بس كده 
طالبنا  بمحاكمة رئيس الجمهورية 
انا بس بحاول استعرض معاكو ازاي المطالب بتتطور بسرعة 
نظرا لاهمال النظام في التعامل معاها 
بس كتير مننا اعطي النظام السابق العذر في المعاملة دي 
وقولنا اتفاجئو من اللي حصل 
ومكنوش متوقعين ان ممكن الشعب ده يطلعلو صوت 

الكلام بقي دلوقتي موجه للحكومة اللي ماسكو دلوقتي وللمجلس العسكري 
ليه مش عايزين نتعلم من اللي حصل 
ليه بنسيب الامور تتطور وتخرج عن السيطرة 
طالما في ايدنا الحل وعارفين ايه اللي يتعمل ساكتين ليه 
باقيين علي مبارك ليه 
ليه محسسنا ان له ديول موجودة في البلد وليها سلطة 
دا احنا كنا بتريق علي الرئيس الليبي والسوري انهم متعلموش من اللي حصل في مصر وتونس 
ليه احنا كمان مبنتعلمش من اللي بيحصل عندنا 

انا مع ثورة سلمية تانية 
للتأكيد علي مطالب الشعب ومطالب ثورة 25 يناير 
اللي هي الحرية والديمقراطية والعدالة الاجتماعية 
مش محاكمة مبارك وعصابته 
اصل دي المفروض مش محتاجة ثورة عشان نطالب بيها 
ده  امر بديهي وطبيعي 
واحد عمل فينا البدع سرقة وقتل  ونهب وترويع وتعذيب واضطهاد  و .....
وبلاوي تانية كتيييييير قوي 
اللي زي ده نبقي عليه ليه 
وليه نخليه يبقي السبب في فساد ثورتنا 

المجلس العسكري والحكومة المصرية 
اعلنو حسن النوايا وحاكمو المجرم محاكمة عادلة 

انا مع الثورة السلمية قلبا وقالبا 
لكن احتراما للجيش طبعا مش هنزل الشارع حتي لو كنت فاضي 
مع اني نزلت المرة اللي فاتت بس اعتقد الوضع مختلف دلوقتي 


نيجي بقي لحتة المجلس الرئاسي 
انا مش فاهمها قوي 
الناس طالبت بالحكاية دي عشان خايفة من الجيش 
ولا عشان اداء المجلس العسكري مش كويس

بصراحة انا مش قادر اخد قرار في الموضوع ده 
وشايف تنفيذه هيبقي صعب شويه 
لان فعلا الجيش ماسك البلد دلوقتي 
واعتقد متحكم في كل حاجة 
والمجلس اللي هيجي هيبقي سلطته مدنية وعسكرية ؟؟؟
ولا مدني بس
يعني هنقسم البلد نصين المجلس الرئاسي يحكم الشعب 
والمجلس العسكري يمسك الجيش 
؟؟؟؟
ولا المجلس الرئاسي هيبقي له سلطة علي المجلس العسكري 

انا شايف انها ملخبطة ومليانة حوارات 
انا مع انتخابات رئاسية في اقرب فرصة 
مع استمرار المجلس العسكري بتدوير شئون البلاد 
ومع مراقبة الشعب (يعني لا مجلس ائتلاف الثورة ولا الاحزاب ولا الاخوان )
مراقبة الشعب لاداء المجلس 
والتحرير موجود 


سلامو عليكو

06‏/05‏/2011

اول يوم ظابط

احم احم

سلامو عليكو










ازيكو يا بني ادمين يا غاليين عليا
انا جايلكو النهارده عايز احكيلكو قصة اول يوم ليا وانا ظابط
والمرمطة اللي شفتها وانا رايح الوحدة 

اولا كنت مسافر يوم خميس بعد الظهر 
الجو كان حر جدا 
كان معايا شنطتين 
والاهم من ده كله مكنتش عارف الوحدة فين بالظبط 

المهم خرجت من بيتنا وبدأت الرحلة وبعد تلات ساعات في المواصلات 
وصلت العبور 
علي فكرة في الظروف العادية من بنها للعبور بتاخد ساعة او ساعة ونص يعني بالكتير

طبعا مكنتش عارف انا هنول فين بالظبط 
فسألت واحد كان واقف بتاكسي وصفلي بوابة هدخل منها 
هي علي بعد 10 كم تقريبا من المكان اللي انا كنت واقف فيه 
وقفت نص ساعة كده ولقيت مكروباص جاي وركبت معاه 
والرجل نزلني عند البوابة اللي قولتله عليها 

المهم وانا لسه يدوب بره قابلت صول وسالته عن الوحدة بتاعتي 
هي موجوده هنا او قريبه يعني من المكان ده 
قالي اه ادخل علي طول بعدين هتكسر يمين 

طبعا كانت الساعة تقريبا دلوقتي كده 4 ونص بعد العصر 
المهم دخلت وقابلت الامن اللي علي البوابة وسالتهم نفس السؤال 
بس للاسف محدش كان يعرف فيهم 
هما كانو سامعين عنها بس هي فين بالظبط مش عارفين 
فضلو يسألو بعض وقالو نفس الكلام ان هي موجودة جوه بس بلاش تمشي 
عشان المسافة هتبقي كبيرة  شويه واستني اي عربية داخلة 
انا قلت ماشي 
وجت عربية كانت خارجة تجيب حاجات للكانتين 
هي عربية نقل كده ومتقفلة من ورا 
ركبت ورا زي ال .......... ما علينا 
الهربية مشيت تقريبا بتاع 10 دقايق كده وقالولي يا فندم سيادتك 
هتكمل علي طول بقي عشان احنا هنحود هنا 
قلت مفيش مشاكل 

انا قلت في عقل بالي العربية خدت 10 دقايق وتقريبا زي ما قالولي دي تص المسافة 
يعني انا همشي مثلا نص  ساعة 
ومكنش فارق معايا لان الجو اصلا كان بدأ يحلو عشان كنا قربتا علي المغرب 
المهم قررت امشي وفعلا بدأت 
وبعد نص ساعة تقريبا قابلتني اول بوابة لاول وحدة علي الطريق 
فرحت وقولت ياااااه الحمد لله وصلت 
سألتهم علي البوابة هي دي وحدة ............. قالولي لا يا  فندم 
وبرضو فضلو يسألأو بعض ويتشاورو في الامر 
ورجعو قالولي انت هتكمل مشي علي طول لحد ما توصل  لبوابة  ......... وحود يمين 
وهتلاقي الوحدة بتاعتك هناك في المكان ده 
انا قلت ماشي وكملت 
ودي كمان خدت معاها كمان نص ساعة مشي 
ولما وصلت سألت تاني برضو عشان اتأكد وكان الرد ايجابي 
قلت كويس وكملت طريقي 

واخدين بالكو معايا انا ماشي بشنطتين ها ؟

في الوقت ده تقريبا كان المغرب اذن 
اه نسيت اقولوكو حاجة 
الطرق اللي انا ماشي فيها دي كلها صحرااااااء 
لا مية ولا نور ولا حد بيمشي فيها 
هي اخرها انها متسفلته بس 

المهم خدت الطريق ده علي طول زي ما قالولي 
وفي الطريق ده ضربتلي بتاع ساعتين ماشي 
طبعا المغرب كان اذن والعشاء اذنت والجو ضلّم وانا ماشي 
المشكلة الاكبر اني مكنتش بقابل حاجة علي الطريق 
او حد اتاكد منه انا ماشي صح ولا لا
انا ماشي وخلاص ومش عارف انا رايح فين 

 وكمان انا مكنش معايا لا مية ولا اكل مكنتش فاكر ان انا طالع سفاري بصراحة 

المهم بعد الساعتين دول وصلت لوحدة كده علي الطريق كده 
كنت شايف نورها من بعيد 
الوحيدة اللي لقيتها يعني 
رحت عليها وسألتهم برضو عن الوحدة بتاعتي 
جالي صول محترم كده 
وده الوحيد اللي كلمني بصراحة 
اول ما قلتله اسم الوحدة لقيته استغرب كده وقالي ايه ياباشا الي جابك من هنا 
ده انت المفروض تنزل عند مش عارف فين 
ووصفلي حاجة تانية خالص 
بس الكلام ده كان من الاول طبعا 
هو كان بيقولي ارجع وامشي علي الوصفة بتاعته 
انا قلتله مستحيل ارجع اللي مشيته ده تاني 
ده انا لو هموت في الصحرا دي مش راجع 
قولي اوصل ازاي 
قالي يا باشا دي هتاخد منك ساعتين مشي 
طبعا الكلمة نزلت عليا كالصاعقة 
ساعتين تاني ؟؟؟؟
انا اصلا كنت تعبت بجد بدنيا ونفسيا 
خلاص يعني كنت خلصت 
قولتله في حل تاني ؟؟؟
قالي لا 
قولتله خلاص اوصف 
المهم قالي همشي ازاي وهيقابلك ايه في الطريق 
شكله كان دارس المنطقة يعني
المهم شكرت الراجل ولميت شنطي ومشيت 

الجو ضلمة .......
وانا عطشان وجعان  .......
وتعبان بدرجة كبيرة جدا ........
وفي نفس الوقت سامع اصوات غريبة حواليه 

المشكلة فعلا ان انا مكنتش خايف معرفش ليه 
يمكن التعب وحلم الوصول (مش الوصول لكاس العالم) كانو مسيطرين عليا 
ومش مديني فرصة افكر في اي حاجة تانية 

في الليلة دي جه عليا وقت قلت ايه اللي بيحصلي ده 
كان كتير عليا قوي 
بتاع خمس او ست ساعات مشي متواصل مع اول يوم ظابط 
كانو كتير عليا 
وده كان كافي يديني الانطباع الاول عن الجيش 
في المرحلة الجديدة 


عموما بعد رحلة الشقاء  دي وصلت للوحدة الحمد لله

يلا بقي اسيبكو دلوقتي 

ونلتقي في مغامرة تانية 
باي باي

16‏/04‏/2011

Back

احم احم 
سلامو عليكو 


ازيكو يا بني ادمين ايه اخباركو 
انا تقريبا دلوقتي بقالي بتاع 5 شهور ما دخلتش علي المدونة 
وكنت تقريبا نسيتها 
بس انا كل لما ببقي مخنوق او مضايق ومش بلاقي حد اكلمه 
باجي هنا 
بحس انها صاحبي اللي كل ما احتاجه بلاقيه 
المهم مش عايز انكد علي حد 
انا جاي اطمن عليكو واسلم بسرعة كده عشان عندي جيش 
مش فاضي بقي 
كنت ايز بس اقولكو اني خلاص يوم التلات اللي جاي 
هتخرج من كلية الضباط الاحتياط وهبقي ظابط بجد 
عشان كده غيرت اسم المدونة
يعني زي نيولوك كده 
انا بحب التغيير 
اا كانت مصر كلها اتغيرت جت يعني علي اسم المدونة بتاعتي 


المهم بقي قولولي مبروك وادعولي 
وبما اني هبقي ظابط بقي عايز اطلب منكم طلب 
الطلب لاخونا المتظاهرين اللي كنت واحد منكم قبل ما ادخل الجيش 
امانة عليكو ما تعاملوش الجيش زي الشرطة  
الجيش بيحارب في اكتر من جبهة 
وكمان هو مش متعود علي المواجهة المباشرة مع المدنيين 
وكمان الجيش مفيش في ايده عصاية 
ده سلاح واحنا بشر 
هو صحيح مفيهوش خيرة ومنظر علي الفاضي 
بس برضو احترمو ان دول بشر 
وجهو كلامو للي يقدر ياخد قرار 
الظابط اللي في الشارع ميقدرش يعمل حاجة غير انه يحافظ علي الوضع امن وبس 
انا بقول كده عشان اولا بحب مصر 
ثانيا صحابي نازلين الشارع والله اعلم انا كمان هنزل ولا لا 


يلا بقي عشان مسافر اتمني ليكم حياة سعيدة 
واتمني مستقبل احسن لمصر 


سلامو عليكو

17‏/11‏/2011

"لوليتا " وحرية التعرّي

احم احم 
سلامو عليكو 










وحشتوني كتير جدا 
عارف اني مقصر بس معلش بقي 
الكسل وحش 
المهم انا كنت مريح كتير قوي ومش بكتب حاجة 
مع ان كان فيه حاجات كتير قوي تستحق الكتابة يعني 
بس بصراحة اكتر الموضوعات استفزازا لحد دلوقتي الانسة لوليتا 
اكيد طبعا كلنا سمعنا عنها وعن افكارها وجرأتها و..........

بصراحة بالنسبالي مفيش مشكلة 
واحدة عايزة تقلع وتنشر صورها ماشي 
ماهو كل يوم في الاف يعني بيقلعو 
في ناس بتداري حاجات وتظهر حاجات 
وناس تانية بتظهر كل حاجة 
مش دي المشكلة 
اللي استفزني اكتر التعليقات علي الحكاية دي 
معظم الناس اللي علقو علي الموضوع ده بيقول فيما معناه 
رغم اختلافي معاكي الا اني عاجبني جرأتك جدا 
مع كامل احترامي لجميع الناس
الا اني مش شايف دي جرأة 
دا تجرّأ يصل الي السفالة
مش هتكلم من اي ناحية دينية 
لان طبعا زي ما هي قالت انها ملحدة ولا تؤمن باي دين 
واخلاقيا برضو هي اكيد كمان وجهة نظرها انها بتعمل عمل بطولي 
وعادي لما يحصل شويه اخطاء بسيطة 
مفيش مشكلة يعني 

بس اللي انا عايز افهمه فعلا وبجد والله 
ايه الحرية في ده 
يعني هي شايفة اننا مجتمع متخلف 
شكرا يا ستي 
ايه اللي هيغير التخلف ده بقي لما نشوف صورة سيادتك عارية 
ايه علاقة الحرية بالعري 
حد يديني الحلقة الماسكة الاتنين دول ببعض
حرية شخصية مع نفسك 
اقفلي اوضتك يا انسه واعملي اللي انتي عايزاه 
وهتفرق في ايه يعني اتصورتي في بيت والدك ولا بيت شريكك "علي حد قولها يعني"
متهيالي مش هتفرق كتير يعني 
ماهو اكيد الصورة دي مش جديدة عليه يعني 


والله انا مش عايز اجي قوي علي البنت 
هي حاجة برضو لسه صغيرة 
17 سنة او ازيد شويه 
بس دي برضو سفالة 

وكمان الخبر اللي داير قوي ع الفيس 
ناشطة سياسية مش عارف تعمل ايه .....
ناشطة مين ياعم 
الله يسامح الثورة اللي عملت اي حد ناشط سياسي 
بأمارة ايه يعني ناشطة 
وبامارة ايه سياسية
ولا صحيح اللي خلي الاخ سبايدر ناشط سياسي 
يخلي الاخت لوليتا ناشطة 

بصراحة انا بدأـ اضايق واتخنق من اللي بيحصل 
شايف كل شويه ماشيين في طريق 
والثورة انضربت 
والدنيا باظت 
ومحدش فاهم حاجة 



الله يرحمك يا مصر 


سلامو عليكو

08‏/11‏/2011

ايزيس

إيزيس

نفسي أنام فينك؟
يا ام الرموش عنقريب
(العنقريب سرير يصنعه اهل النوبة من الجريد)
ماتدمّعيش عينك
الفرح جاي عن قريب

إيزيس

إزاي بتتحمّل؟؟
أنساها .. وتجيني ..
أسقي بنات الدنيا إلاّها
ولما العطش يكويني ألقاها
هي اللي تسقيني
تهديني يوم وردة
أدِّيها لفلانة
تجري على حضني احكيلها عن نانا

إزاي بتتحمّل؟
غمز البنات واوعر من غمزهم ردِّي
جاياني ملهوفة ما تلاقي غير صدِّي
أحزن في أحضانها وافرح هناك وحدي
يا ام القليب اتخلق معرفش غير يِدِّي

يا ام الفؤاد ولاّد
معرفش غير يعشق
الصبر عدّى وزاد
يا قلبها المتقاد
ما عرِفت يوم تزهق
كانت بتلبس لي اجمل فساتينها
ترمي ف صحاريا أفتن بساتينها
تِدْمع رياحينها
ولا قلبي يوم يشفق

وإزاي بتتحمل ؟؟؟
كُتر الكلام عني بحكاوي وانا غايب
الليلة كان سهران
الليلة كان سكران
الليلة كان عاشق والليلة كان دايب

يا ام الرموش طايشة وام العيون لامّة
حضبك ما حيسعنيش انا بَلْوِتي طامّة
اربع سنين يا هوا مِلْكِيّتي عامّة

كل البنات اتلبنوا بيا وتفُّوني
ورسموني خروف معلوف وسمعوا قصايدي وابتسموا وصحيم
بدري يوم العيد ودبحوني
بقالي ييجي اربع سنين مسمار في غيط شواكيش
دَقُّوا على راسي لكن مثبتونيش
يوم التقي مرسى وسنين ياخدني الطيش

كل الالم فيّا ومش قادر اتألم
وبتصعبي عليا ومش بقدر اتكلم
انا نفسي بس افهم
كل البلاوي ديا ازاي مابعّدوكيش

سامحيني لما اغلط
وانا تاني رايح اغلط لجلٍ تسامحيني
احلى ما في التوهان اول ما باجي اوصل 
واحلى ما في الاحزان انك تضميني

يا مسكناني ضلوع
جواكي راح وبراح
ما بينلهاشي رجوع
شكلي حاموت سواح

كان نفسي فيكي زمان أياميها كان لي قلب
كانت الحياة خضرا
النخلة والبقرة
والقلب طين ابيض بينام على القرآن وبيصحى وقت الحَلْب
اياميها كان لي قلب
ايه اللي قلب النور ضلمة وليل راسي؟
واشمعنى فوق راسي يحلا العذاب والقلب؟
واشمعنى سابوا الناس بقلوب خضار وعمار ؟ وف قلبي نِزْلوا سَلْب ؟
انا اول اللي اتصلب بس التاريخ كداب مفهمش معنى الصلب
ركعوا البنات ليا واتّنوا قدامي
وفي حفل اعدامي
ضحكوا وقالوا كلب

انتي اللي دمّعتي
جمّعتي جسماني من مملكة ايزوريس ويا ريت ما جمّعتي
طب كنتي سبتيني ادخل هنا غزوة واعمل هنا هُدْنة
وما دمت انا ميت ايه تِفْرِق الدفنة؟
ما البحر راح يسبق لو مهما جدّفنا
انتي اللي بتعاندي وعشمانة في الجنة
والجنة مش ليا

إزاي بتتحمل لوم الصحاب فيا؟؟
على ايه غرامك بيه؟
ده التبن من تحتيه
باقي الماعون مية
تضحك على قولهم وتبص في الساعة وتقول زمانه صِحِي
زيدي كمان نورك يا ام الجبين الضَّحِي
جَنّنِي صوت حزنك إياكي يوم تفرحي
لا الفرحة تسرقنا

لا انا حِمل مهرك ودهبك ولا جاي معاي عاجِك
ولا حمل توب من حريرك ولا ماسة من تاجك
ده انا بالكتير حاجج من وسط حجاجك
جيت لك في شهر حرام فمتهدريش دمي
ماتقربيش مني مانتيش كِفَا همي
وَلِّي لحجاجك يا ام الجبين عرفات
حبك كما الصلوات والقِبلة مش يَمِّي

يا معلماني الهوا ومسَكِّنة التباريح
حبك نخيل طارح ميهزهوش الريح
ارمي الحجر جارح تنزِل رطب مجاريح
إزاي بتتكسر اشواكي جواكي
ابكي على صدرك القى البكا تفاريح

إزاي بتتغير دنيايا جوايا اول ما اكون جنبك
وإزاي يجيلك صبر تنشفي بكايا والذنب مش ذنبك
انا الاعمى
جفاني الحب ونسيته على ايدين اللي تتسمى ما تتسمى
قطع راسي على خوانة ولا كَبَّر ولا سمّى
ولا سابني اموت مستور ولمّ عليا ميت لمّة
وذنبك ايه بقية السكة تقضيها بعجوز اعمى؟

انا اللي الناس بتخشاني هوا ومنظر
هموم الدنيا خاشاني وبتمنظر
وعايش عيشة خشّاني وبتغندر
وبتلكلك في حضن الليل سُكّيتي
عواصفي فوق حدود وصفي
وبابك صعب يتحمل عواصف مهما سَكّيتي

انا المدبوح ولما تقول لي حبيتك بحس دماغي واكلاني
اردّ بايه على بنيّة في كل كيانها شايلاني
انا المجرم وانا القاسي وانا اللي نسيتها ميت مرة ما نسيتني
ومشيتها في دروب مرة ما ملّتني
وداست ع الطريق حافية وسلّتني
وصحيت بدري وقت الفجر صلّتني

ارد بايه؟
وقلبها سابها في متاهة
قليل الاصل غَيَّاها
وقلبي التاني قسّاني وقلّ باصله ويّاها


غرامك يا ام طيف مخمل بيتجمّل
ويفرش صدري بالعنبر وبالمحمل
انا المعشوق يا كل العاشقين غيروا
تحبوا شيء جميل طبعا لكن تتحبوا ده الاجمل
حبيبتي احلى من شعري واحلى م الحروف كُمَّل
ولا بتهجر ولا بتغدر ولا بظلمها تتململ
لكني في حيرتي بستغرب
انا ازاي مش بغني لها ؟
وهي ازاي بتتحمل؟؟؟؟

07‏/07‏/2011

العاصفة





احم احم
سلامو عليكو

فاكرين فيلم العاصفة بتاع خالد يوسف 
بتاع حرب العراق والاخين اللي واجهو بعض 

عارفين الاحساس ده 
لما تكون انت في موقف واخوك في موقف معادي 
واقف قصادك وشك في وشه

انا تقريبا حاصل معايا الموقف ده 
بس مع بعض التعديلات 
اولا انا مش واقف قصاد اخويا 
انا واقف قصاد نفسي

حبة توضيح بقي
طبعا انتو عارفين ان انا في الجيش الايام دي
في ايام ثورة يناير وبالظبط يوم الخميس 10 فبراير انا كنت في ميدان التحرير 
انا مكنتش لسه بقيت ظابط ومكنتش مسؤول عن حاجة 
انا كنت في التحرير يومها كمتظاهر 
ولو كنت موجود في بيتنا في الايام اللي قبل التاريخ ده 
كنت قضيتهم في التحرير مع الناس 
ولكن للاسف كنت في الجيش 
المهم انا ساعتها مكنتش بفكر قوي ان انا في الجيش ومينفعش ابقي متظاهر 
كنت بتعامل زي ما بيقولو عندنا في الجيش "ملكي"
والحمد لله الثورة نجحت 

نيجي بقي بعد 5 شهور من اليوم ده 
انا بقيت ظابط والمفروض اني مسؤل 
وبكرة الجمعة 8 يوليو المفروض ان فيه ثورة الغضب التانية 
انا بكرة موجود في الوحدة بتاعتي بأمنها من اي حد 

بغض النظر عن اي حاجة 
سواءا بقي اللي في التحرير صح ولا غلط 
الجيش صح ولا غلط 
بس في 5 شهور انا اتحولت من الصف ده للصف اللي في المواجهة
والصراع بقي داخلي 
عارفين ابو العربي وهو بيقاسي مع حرب الجينات اللي عنده 
بين ابوه الشهيد وخاله الواطي 
اهو انا تقريبا في نفس الموقف 
عارف ان الجيش متكاسل ومتراخي في اخد قرارات لازم تتاخد
بس كمان قربت ازهق من الفوضي اللي في البلد
عارف كويس جدا ان النظام السابق مش هيمشي بسهولة 
ولازم "يفرفر "قبل ما يموت 
دي حاجة منطقية يعني 
بس احنا كمان لازم نبقي اذكي من كده 
ونفهم احنا رايحين فين 

مش عارف اقول لحد روح التحرير 
ومش جايلي قلب اقوله ما تروحش 

بس ياريت اللي رايح يتظاهر باسلوب محترم ويراعي سمعة مصر 
ويحترم مشاعر قوات الامن اللي هتبقي موجودة 
ارجوكم بلاش استفزاز لا للشرطة ولا للجيش
الناس دي مش هما اللي سرقوكم والله 
اذا كان في خطأ في القادة بتوعهم بلاش تاخدوهم بذنبهم 
اكيد اللي موجود في التحرير من الامن رايح علشان يأّمن مصر 
وشعب مصر 
يا اهل التحرير خافو علي مصر 
امنعو البلطجية من انهم يوصلو لغرضهم 
البلطجية بيستخبو بينكم 

ربنا يوفقكم ويحميكم 
ويحمي مصر وينصرها 

اللهم امين


سلامو عليكو

22‏/06‏/2011

النظام الفوضوي & الفوضي المنظمة

http://games.bnanet.com/files/image/istefada_Se8D1.JPG












احم احم 
سلامو عليكو


انا بكره النظام
طبعا عنوان زي ده زمان كان عمل قلق 
كلمة نظام في حد ذاتها بقت ليها هيبة داخليه كده
بس انا هنا مش بقصد النظام اللي هو الحكومة السابقة 
انا بكره النظام اللي هو الترتيب 
اه انا مش بحب الفوضي 
بس برضو بيبقي شئ ممل لما كل يوم تبقي نفس  الحاجات بنفس الشكل 
خصوصا بقي لو كان النظام ده ظاهريا بس 
يعني نرتب الشكل من بره ومن جوه فوضي 

ندي مثال عشان نفهم 

مثلا ايام ما كنت لسه في الكلية وكنت بذاكر بقي وكده
"طبعا الكلام ده في شهر الامتحانات يعني بس"
انا كانت عندي عادة كده 
عندي طرابيزة كبيرة شوية كده ومكتب 
بحط كل الكتب والورق المتعلق بكل المواد بتاعتي علي الطرابيزة دي
بتبقي كل مادة ورقها وكتبها وكشاكيلها 
بس ده مش بيبقي واضح لاي حد يعني 
تقريبا انا بس اللي كنت شايف كده
لان كل يوم لما يجو يرتبو الاوضة بتاعتي 
بلاقي كل الكتب والورق والكشاكيل اتلمو علي بعض 
واتحطو علي المكتب 
والاقي الطرابيزة عليها مفرش جميل وحاجة زي زهريه كده
هما فاكرين كده انهم رتبو الكتب 
لكن بالنسبالي هي اتلخبطت 
وفاكرين ان منظر الطرابيزة بقي اجمل 
لكن برضو انا شايف ان ده محصلش 
لان وظيفة الطرابيزة اني اذاكر عليها 
مش انه يتحط عليها مفرش جميل وزهرية 

الممل في الموضوع ان الحكاية دي كانت بتحصل كل يوم 
يعني انا اخرج من بيتنا حتي لو نص ساعة 
ارجع الاقيهم رتبو الاوضة 
يعني من وجهة نظري انا بوظو النظام اللي انا عامله 
وقولتلهم ملايين المرات محدش يرتب كتبي 
اعملو اي حاجة في الاوضة 
بس سيبو الطرابيزة والمكتب 

اتهموني ان انا مش بحب النظافة
ومش مرتب 
وحاجات تعبانة كده

اللي انا عايز اوصله بقي ليكم 
ان النظام  ده برضو حاجة نسيبة 
يعني انا بستخدم الحاجة دي يبقي اجدر واحد يقدر ينظمها 
حتي لو شكلها قدام الناس انها في حالة فوضي 

وبما اني مهندس برضو اتعلمت حاجة 
ان الهندسة هي انتاج سلعة بأقل تكلفة وأقل مجهود واعلي جودة 

فكل واحد بينظم حياتو علي اساس هو ممشيها ازاي 

يعني انا مقدرش اقول عليك انت مش منظم طالما انت ناجح في حياتك 
النظام اسلوب له اشكال مختلفة 
المهم تكون فاهم 

وانا شخصيا من عشاق الفوضي المنظمة 
بتبقي ممتعة اكتر من النظام والترتيب الروتيني اللي اي حد يفهمه 
ويتعامل معاه 

مش عارف وجهة نظري وصلت ولا لا 
بس عموما انا بكره النظام بتاعكو المتعارف عليه


شكرا 
سلامو عليكو

19‏/06‏/2011

قانون مورفي

احم احم
سلامو عليكو

حد سمع عن قانون مورفي ده
انا كنت قريت عنه من فترة كده وبعدين نسيته
وبالصدفة جه قدامي تاني
بصراحة الموضوع عاجبني قوي 
انا حاولت اجمع اكبر عدد من القوانين لاني عايز احتفظ بيها بصراحة 
وده أأمن مكان عندي 

اه
ده قانون من عندي علي غرار قوانين مورفي 
دايما الحاجة اللي بتخاف عليها من الضياع اول حاجة بتضيع


  • كل شيء يتعطل في الوقت نفسه
  •  إذا تركت الأمور على عواهنها فسوف تنتقل من سيء إلى أسوأ
  • يستحيل تحصين أي أمر ضد الأغبياء لأن غباءهم مبدع
  • لو سار كل شيء على ما يرام، فأنت لم تلحظ الخطأ فقط.
  • الكون ليس غير مبال بالعلماء فقط.. إنه ضدهم على طول الخط..
  • أي سلك تقطعه حسب طول معين هو أقصر من اللازم.
  • احتمال حدوث خطأ يتناسب طرديًا مع الضرر الذي سيسببه هذا الخطأ.
  • عندما يفشل كل شيء آخر اقرأ التعليمات.
  • الرجل الذي يبتسم عند الفشل، يعرف رجلاً آخر يلقي باللوم عليه.
  • لابد أن يسقط التوست على الجانب الذي دهنته بالزبد.
  • احتمال سقوط التوست علي الجانب المدهون بالزبد يتناسب مع ثمن السجادة.
  • الأمر يستغرق وقتًا أكثر مما توقعت له، ومهما فعلت.
  • من سوء الحظ أن تكون متشائمًا.
  • قانون لورا: الطفل لا يقيء وهو في الحمام أبدًا.
  • قانون النوافذ: القذارة على الجانب الآخر من الزجاج دائمًا !
  • قانون الذاكرة: فرصة نسيان شيء مهم تتناسب مع.. مع.. مع....
  • لو لم يسر الأمر حسب الخطة، فلا توجد خطة أصلاً.
  • ابتسم.. فالغد أسوأ.
  • الأشياء تتلف حسب قيمتها.
  • لا يمكن أن تحمي عملك من الحمقى، لأن الحمقى عباقرة.
  • كل حل يخلق مشاكل جديدة !
  • الشيء الذي يقع، يقع في المكان الذي يسبب فيه أكبر ضرر ممكن.
  • بعد ما تبتاع بديلاً للشيء الذي بحثت عنه في كل مكان ولم تجده، يظهر الشيء الأصلي.
  • بمجرد شراء تلك السلعة النادرة، سوف تجدها معروضة في كل مكان وأرخص مما اشتريتها.
  • صمم شيئاً يستطيع حتى المعتوهين استعماله، ولسوف لا يستعمله سوى المعتوهين.
  • كل شيء ممتع في الحياة غير قانوني أو غير أخلاقي أو يسبب السمنة.
  • كل شيء يقع في الحمام لابد أن يسقط في المرحاض.
  • أي شيء تضعه في مكان أمين، لن تجده أبدًا ثانية.
  • الأفكار العظيمة لا نتذكرها أبدًا، والأفكار الغبية لا ننساها أبدًا.
  • الغسالة لا تبتلع إلا فردة واحدة من كل زوج من الجوارب.
  • الضوء في نهاية النفق قطار قادم !
  • صندوق الخطابات دائمًا في الناحية الأخرى من الشارع.
  • الفوضى تربح دائمًا لأنها أفضل تنظيمًا !
  • لو لم تنجح، تخلص من أية أدلة على أنك حاولت.
  • لكل قاعدة شواذ ما عدا هذه القاعدة.
  • الرجل الذي يسبقك مباشرة في طابور المصرف، يقوم بأعقد إجراءات ممكنة.
  • معرفتك بقوانين مورفي لن يساعدك في شيء!
  • قانون الموظف:عندما تكون مشغولا تكثر الطلبات وتتولد الافكار بلا توقف وفي لحظات الفراغ لا أحد يسألك شيئا
  • نظرية كانون: إذا أخبرت رئيسك بأن انفجار إطار سيارتك قد سبب قدومك متأخرا، فسوف ينفجر إطار سيارتك في اليوم التالي
  • - مبدأ ماكسيم: المنطق هو الطريقة المنظمة للوصول بثقة إلى الاستنتاج الخاطئ
  • - نظرية أوتونيل الثانية: عند اكتشاف وإصلاح خطأ ما، فسوف يكتشف فيما بعد أن ذلك الخطأ قد كان صحيحا من الأساس
  • - قانون غامبرسون: درجة احتمال حدوث أي أمر تتوافق بصورة عكسية مع درجة الرغبة في حدوثه
  • - مبدأ إهمان: الأمور سوف تسوء قبل أن تتحسن
  • تعليق غامبرسون: من قال أن الأمور سوف تتحسن.
  • - القانون غير التبادلي للتوقعات: التوقعات المتشائمة تعطي نتائج سيئة، والتوقعات المتفائلة تعطي نتائج سيئة.
  • - قانون الاسترجاع: يستحيل إيجاد الوثائق الضائعة قبل القيام باستبدالها.
  • - قانون الطائرات: عندما تكون الطائرة التي أتيت فيها متأخرة ستأتي الطائرة التي ترغب في التحويل إليها في موعدها.
  • - مبدأ إيتور: المسار الآخر يتحرك بسرعة.
  • - مبدأ بيير: كن على حذر ممن يجهد نفسه في تعلم شيء ما ثم يجد أنه لم يصبح أكثر علما من ذي قبل، لأنه مليء بحقد قاتل على الناس الذين وصلوا لنفس الدرجة من الجهل دون أن يبذلوا الجهد نفسه.
  • - قانون بيير الثاني: ساعد المرء عند حاجته، وسوف يتذكرك عندما يقع في ورطة أخرى.
  • - قانون كارسون: أفضل للمرء أن يكون غنيا ومعافى من أن يكون فقيرا ومريضا.
  • - قانون ويلر: ليس هناك مستحيل للشخص الذي عليه أن يقوم بالوظيفة بنفسه.
  • - قانون بيكهاب: الجمال مضروبا في الذكاء يساوي رقما ثابتا.
  • - قانون الهمس: سوف يصدق الناس كل ما تقول إذا قلته لهم همسا.
  • - قانون الحظ: إذا أكلت ضفدعا حيا في بداية اليوم، فلن يحصل لك أمر أسوأ بقية ذلك اليوم.
  • - مبدأ كارنسدك: بعد أن تذهب الأمور من سيء إلى أسوأ سوف تعيد الدائرة نفسها.
  • - نظرية غروسمان: كل المشاكل المعقدة تملك أجوبة سهلة ويسيرة الفهم ولكنها خاطئة.
  • - مبدأ كونوي: في كل منظمة هناك شخص يفهم تحديدا ما الذي يحدث، ذلك الشخص يجب أن يفصل.
  • - ملاحظة رالف: من الخطأ جعل أي أداة ميكانيكية تلاحظ أنك مستعجل.
  • - تعديل جنسبرغ على القوانين الثلاث للديناميكا الحرارية: لايمكنك أن تفوز، لايمكنك أن تخسر، لايمكنك أن تنسحب.
  • - مبدأ لويس: يحصل المرء في الأغلب على أقل ما يرغبه
  • - مبدأ غب: يتزاحم الأغبياء على المكان الذي يزدحم بالأغبياء.
  • - مبدأ كول: مجموع محصلات الذكاء على هذا الكوكب هو رقم ثابت، وعدد السكان هو الذي يزيد.
  • - قانون الحديث: عندما تذكر شيئا ما، إذا كان جيدا فسوف يختفي، وإذا كان سيئا فسوف يحدث.
  • - قانون هلرانج: إذا انتظرت فسوف يبتعد....
  • تعديل شيفلسون: إذا انتظرت فسوف يبتعد.. :بعد أن يقوم بفعله: إضافة غريلب: إذا انتظرت فسوف يبتعد.. بعد أن يقوم بفعله.. وإذا كان فعله سيئا فسوف يعود مرة أخرى.
  • - قانون دوشارم: الفرصة تطرق الباب دائما في أسوأ الأوقات لها.
  • - الفرضية التماثلية الأولى: الأشياء التي لاتماثلها أشياء أخرى تماثل بعضها البعض.
  • - القانون الغير قابل للتطبيق: غسل سيارتك لجعل السماء تمطر لن يفيد.
  • - قانون النقانق: على الناس الذين يحبون النقانق ويحترمون القانون أن لايروا مطلقا كيف يتم صنع الاثنين!!
  • - قانون غولد: إذا ناسبك مقاس الحذاء فالحذاء قبيح.
  • - مبدأ غالويس: إذا أدخلت حماقة إلى الكمبيوتر فلن تخرج منه غير الحماقة، ولكنها وبسبب مرورها داخل جهاز باهظ الثمن ستصبح حماقة نبيلة لايجرؤ أحد على انتقادها.
  • - قانون كوهن: ما يهم فعلا هو الاسم الذي تطلقه على الحقائق وليس الحقائق نفسها.
  • - قوانين جيرالد الحركية: إذا كان الشيء في وضع الحركة فهو يتحرك في الاتجاه الخاطئ، وإذا كان في وضع السكون فهو في المكان الخاطئ.
  • - قانون غولدوين: الاتفاقية اللفظية لاتساوي قيمة الورق المكتوبة عليه.
  • - قانون لانغين: إذا تركت الأمور للصدف فسوف تصبح أفضل.
  • - قانون لانغين الثاني: إذا احتفظت برباطة جأشك بينما الكل حولك يفقدونها، فربما لم تفهم بعد ما الذي يجري.
  • - إيضاح إبلي: الزواج هو الإتحاد الوحيد الذي لايمكن تنظيمه، فكل من الطرفين يعتقد أنه الإدارة المسؤولة.
  • - قانون بيكر في الاقتصاد: إنك عازف عما يمكنك الحصول عليه.
  • - ملاحظة بوركون: يقاس تأخر وصول المرء في المسرح ببعد مقعده عن الممشى في الوسط.
  • - قاعدة بوسويل: لا أحد يؤكد أن السيارة المستعملة تقتصد في الوقود إلا البائع.
  • - دستور المحادثة: إن لم تود أن يسمع أولادك ما تقول فتظاهر بأنك تخاطبهم.
  • - قاعدة ديكسون لعمر 49: أكبر عزاء لمن بلغ التاسعة والأربعين إدراكه أنه شاخ ولن يموت شابا.
  • - قاعدة غيست للسفر مع الأولاد: لاتذهب وإياهم في إتجاه واحد أبدا.
  • - بشارة غيلبرت: أكبر مؤشر على أنك في ورطة في العمل أن أحدا لا يحاول تعليمك كيف تنجز عملك.
  • - لغز غريسون: أصغر ثقب يفرغ أكبر إناء إلا إذا أعد عمدا للتصريف فهو حينئذ ينسد.
  • - مبدأ هارييت في المطاعم: في كل المطاعم تزداد قساوة قطع الزبدة بازدياد طراوة الخبز المقدم على المائدة.
  • - قانون هليبرغر للمحامين: عندما يعمل محام واحد في البلدة فإنه لايستطيع كسب عيشه أما إذا كان هناك محاميان فسوف يكسب كلاهما رزقه وزيادة.
  • - قاعدة هوف في المسؤولية: توزيع لامسؤولية مئة في المئة على اثنين يعطي كل منهما عشرة في المئة !!
  • - قانون غيست في آداب القيادة: تزداد رعونة السائق بازدياد هلهلة السيارة.
  • - مؤشر كينوورثي: كثافة السجادة في مكتب المسؤوول الذي استدعاك مقياس لفداحة المشكلة التي تواجهها.
  • - وصيتا لاوس للأسفار: إذا وصلت إلى المحطة باكرا تأخر القطار، وإذا كنت مستعجلا فاتك القطار.
  • - نظرية وبستر: نادرا ما تتجاوز أضرار الحوادث الحد الأدنى الذي تغطيه شركات التأمين.
  • - نظام نودل: المسؤولون الوحيدون الذين تجدي مراجعتهم هم الذين لايقابلون الناس.
  • - قاعدة موراي: أي بلد تدخل الديمقراطية اسمه ليس ديمقراطيا. ((الديمقراطية غير قابلة للتنظير))
  • - قاعدة زيا: سيحدث حسب ايمانك. ((أعتقد أنه يقصد ايمانك بحدوث الشيء))
  • - قاعدة الغميز :لا تكن في أول القطيع ولا في اخره (لان اوله حمار واخره كلب)

نفسي ارجع تاني صاحبكم













اسالو عليا يا مدونين عيب كده

صباحو كدب













احم احم
سلامو عليكو


ازيكو يا مدونين
بعد فترة من الاحباط قررت ارجع زي زمان قوي
واكتب وخلاص

بصراحة الاحباط جه من اني فضلت فترة كبيرة مش بكتب حاجة 
ولما قررت اكتب لاقيتني مش عارف اكتب 
زي ما اكون خدت علي الكسل 

المهم قررت اكتب لكم النهارده وخلونا نهبل مع بعض 

نبدأ باكتر حاجة مستفزاني جدا جدا الايام دي وهي هوس الفيس بوك 
معاكم ان الفيس كان عامل كبير في ثورتنا 
وكلنا بنشكره علي الموقف النبيل ده 

 لكن اللي بيحصل ده كتير قوي يعني 
اي واحد ماشي في الشارع وشاف اي حاجة يروح عاملها بيدج 
نام وحلم بحاجة يصحي من النوم اول حاجة يعملها بيدج للحاجة دي 
الكلام ده من قبل الثورة بس بعد الثورة زادت بفظاعة يعني 
ده غير ان الصفحات دي اصلا مش بتعمل حاجة غير انهم يعملو اعلانات لبعض 
هو ده الحاجة الوحيدة اللي بيعملوها 
تدخل علي البيج من دول تلاقي كلها اعلانات لصفحات تانية اتفه منها 
يعني الصفحة بقت عبارة عن عنوان بس 
ده بقي غير الكدب اللي بقي علي الفاضي والمليان 

تلاقي واحد عامل بيج بيقول 
ازاي تخترق معرفش ايه والله العظيم شغال بس انت اتبع الخطوات 
ويخليك تعمل لايك لسبعميت صفحة 
وفي الاخر يقولك لا لا انت اكيد غلطت في حاجة 

وصفحة تانية لفيديو فضيحة معرفش مين 
مش هنعرض الفيديو الا بعد ما نوصل 10000 
ونفس الحوار تاني 

بستغرب جدا لما بلاقي صفحة فيها تقريبا اكتر من 20 او 30 الف 
وهي اصلا مش بتقول اي حاجة 
مش بقصد انها صفحة تافهة 
لا دي اصلا مفيهاش اي حاجة غير المبادلات الاعلانية 

انا معرفش ايه الفايدة منها بصراحة الصفحات دي 
انا فكرت مثلا وقلت يمكن الصفحات دي اصلا الهدف منها الدعاية دي 
وبيكسبو منها فلوس 

ما انا هتجنن يعني 
انت بتعمل الصفحة دي ليييييييييييييييييييييه ؟؟؟؟؟؟؟؟؟
بتستفيد ايه 
لا انت بتنشر رأي 
ولا بتحارب فساد
ولا بتكسب فلوس 
ولا بتضبط بنات "سوري يعني "
ولا بتعمل ايه حاجة 

بصراحة انا ضغطي بقي يعلي كل اما اشوف الصفحات دي 
وبقيت اعملهم ريبورت اول باول كده علي طول 



يلا اشوفكم علي خير 
لما ربنا يريد وارجع اكتب تاني

21‏/05‏/2011

ثورة الغضب المصرية التانية

احم احم
سلامو عليكو




















يوم التلات 25 يناير 2011 كنا نازلين في شوارع مصر كلها 
ضد الفساد والتعذيب 
وكنا بنطالب بالحرية واليمقراطية والعدالة الاجتماعية
لا كان فيه محاكمة مبارك ولا العادلي ولا اي حاجة من الكلام ده 
ونظرا للاهمال اللي اتقابلت بيه مظاهرات يوم 25 يناير
قررنا اننا ننزل يوم الجمعة 28 يناير (جمعة الغضب) 
عشان نقولهم ان احنا لينا صوت ورأي ومش مهمشين 
وعلي الاقل لازم نتسمع 

المهم انا مش بحكي الاحداث 
كلنا عارفين الاحداث كويس 
انا عايز بس افكر الناس احنا كنا نازلين ليه في الاول 
وكانت مطالبنا ايه 
وبعد كام يوم ازاي المطالب دي اتحولت وكبرت بطريقة كبيرة 
لما حسينا ان مفيش حد مهتم بكلامنا 
كنا بنشتكي من فساد الشرطة ..... بقينا نطالب بمحاكمة وزير الداخلية 
اداء الحكومة مكنش علي المستوي المطلوب 
طالبنا بتغيير الحكومة 
طالبنا بتنحي رئيس الجمهورية 
ومش بس كده 
طالبنا  بمحاكمة رئيس الجمهورية 
انا بس بحاول استعرض معاكو ازاي المطالب بتتطور بسرعة 
نظرا لاهمال النظام في التعامل معاها 
بس كتير مننا اعطي النظام السابق العذر في المعاملة دي 
وقولنا اتفاجئو من اللي حصل 
ومكنوش متوقعين ان ممكن الشعب ده يطلعلو صوت 

الكلام بقي دلوقتي موجه للحكومة اللي ماسكو دلوقتي وللمجلس العسكري 
ليه مش عايزين نتعلم من اللي حصل 
ليه بنسيب الامور تتطور وتخرج عن السيطرة 
طالما في ايدنا الحل وعارفين ايه اللي يتعمل ساكتين ليه 
باقيين علي مبارك ليه 
ليه محسسنا ان له ديول موجودة في البلد وليها سلطة 
دا احنا كنا بتريق علي الرئيس الليبي والسوري انهم متعلموش من اللي حصل في مصر وتونس 
ليه احنا كمان مبنتعلمش من اللي بيحصل عندنا 

انا مع ثورة سلمية تانية 
للتأكيد علي مطالب الشعب ومطالب ثورة 25 يناير 
اللي هي الحرية والديمقراطية والعدالة الاجتماعية 
مش محاكمة مبارك وعصابته 
اصل دي المفروض مش محتاجة ثورة عشان نطالب بيها 
ده  امر بديهي وطبيعي 
واحد عمل فينا البدع سرقة وقتل  ونهب وترويع وتعذيب واضطهاد  و .....
وبلاوي تانية كتيييييير قوي 
اللي زي ده نبقي عليه ليه 
وليه نخليه يبقي السبب في فساد ثورتنا 

المجلس العسكري والحكومة المصرية 
اعلنو حسن النوايا وحاكمو المجرم محاكمة عادلة 

انا مع الثورة السلمية قلبا وقالبا 
لكن احتراما للجيش طبعا مش هنزل الشارع حتي لو كنت فاضي 
مع اني نزلت المرة اللي فاتت بس اعتقد الوضع مختلف دلوقتي 


نيجي بقي لحتة المجلس الرئاسي 
انا مش فاهمها قوي 
الناس طالبت بالحكاية دي عشان خايفة من الجيش 
ولا عشان اداء المجلس العسكري مش كويس

بصراحة انا مش قادر اخد قرار في الموضوع ده 
وشايف تنفيذه هيبقي صعب شويه 
لان فعلا الجيش ماسك البلد دلوقتي 
واعتقد متحكم في كل حاجة 
والمجلس اللي هيجي هيبقي سلطته مدنية وعسكرية ؟؟؟
ولا مدني بس
يعني هنقسم البلد نصين المجلس الرئاسي يحكم الشعب 
والمجلس العسكري يمسك الجيش 
؟؟؟؟
ولا المجلس الرئاسي هيبقي له سلطة علي المجلس العسكري 

انا شايف انها ملخبطة ومليانة حوارات 
انا مع انتخابات رئاسية في اقرب فرصة 
مع استمرار المجلس العسكري بتدوير شئون البلاد 
ومع مراقبة الشعب (يعني لا مجلس ائتلاف الثورة ولا الاحزاب ولا الاخوان )
مراقبة الشعب لاداء المجلس 
والتحرير موجود 


سلامو عليكو

06‏/05‏/2011

اول يوم ظابط

احم احم

سلامو عليكو










ازيكو يا بني ادمين يا غاليين عليا
انا جايلكو النهارده عايز احكيلكو قصة اول يوم ليا وانا ظابط
والمرمطة اللي شفتها وانا رايح الوحدة 

اولا كنت مسافر يوم خميس بعد الظهر 
الجو كان حر جدا 
كان معايا شنطتين 
والاهم من ده كله مكنتش عارف الوحدة فين بالظبط 

المهم خرجت من بيتنا وبدأت الرحلة وبعد تلات ساعات في المواصلات 
وصلت العبور 
علي فكرة في الظروف العادية من بنها للعبور بتاخد ساعة او ساعة ونص يعني بالكتير

طبعا مكنتش عارف انا هنول فين بالظبط 
فسألت واحد كان واقف بتاكسي وصفلي بوابة هدخل منها 
هي علي بعد 10 كم تقريبا من المكان اللي انا كنت واقف فيه 
وقفت نص ساعة كده ولقيت مكروباص جاي وركبت معاه 
والرجل نزلني عند البوابة اللي قولتله عليها 

المهم وانا لسه يدوب بره قابلت صول وسالته عن الوحدة بتاعتي 
هي موجوده هنا او قريبه يعني من المكان ده 
قالي اه ادخل علي طول بعدين هتكسر يمين 

طبعا كانت الساعة تقريبا دلوقتي كده 4 ونص بعد العصر 
المهم دخلت وقابلت الامن اللي علي البوابة وسالتهم نفس السؤال 
بس للاسف محدش كان يعرف فيهم 
هما كانو سامعين عنها بس هي فين بالظبط مش عارفين 
فضلو يسألو بعض وقالو نفس الكلام ان هي موجودة جوه بس بلاش تمشي 
عشان المسافة هتبقي كبيرة  شويه واستني اي عربية داخلة 
انا قلت ماشي 
وجت عربية كانت خارجة تجيب حاجات للكانتين 
هي عربية نقل كده ومتقفلة من ورا 
ركبت ورا زي ال .......... ما علينا 
الهربية مشيت تقريبا بتاع 10 دقايق كده وقالولي يا فندم سيادتك 
هتكمل علي طول بقي عشان احنا هنحود هنا 
قلت مفيش مشاكل 

انا قلت في عقل بالي العربية خدت 10 دقايق وتقريبا زي ما قالولي دي تص المسافة 
يعني انا همشي مثلا نص  ساعة 
ومكنش فارق معايا لان الجو اصلا كان بدأ يحلو عشان كنا قربتا علي المغرب 
المهم قررت امشي وفعلا بدأت 
وبعد نص ساعة تقريبا قابلتني اول بوابة لاول وحدة علي الطريق 
فرحت وقولت ياااااه الحمد لله وصلت 
سألتهم علي البوابة هي دي وحدة ............. قالولي لا يا  فندم 
وبرضو فضلو يسألأو بعض ويتشاورو في الامر 
ورجعو قالولي انت هتكمل مشي علي طول لحد ما توصل  لبوابة  ......... وحود يمين 
وهتلاقي الوحدة بتاعتك هناك في المكان ده 
انا قلت ماشي وكملت 
ودي كمان خدت معاها كمان نص ساعة مشي 
ولما وصلت سألت تاني برضو عشان اتأكد وكان الرد ايجابي 
قلت كويس وكملت طريقي 

واخدين بالكو معايا انا ماشي بشنطتين ها ؟

في الوقت ده تقريبا كان المغرب اذن 
اه نسيت اقولوكو حاجة 
الطرق اللي انا ماشي فيها دي كلها صحرااااااء 
لا مية ولا نور ولا حد بيمشي فيها 
هي اخرها انها متسفلته بس 

المهم خدت الطريق ده علي طول زي ما قالولي 
وفي الطريق ده ضربتلي بتاع ساعتين ماشي 
طبعا المغرب كان اذن والعشاء اذنت والجو ضلّم وانا ماشي 
المشكلة الاكبر اني مكنتش بقابل حاجة علي الطريق 
او حد اتاكد منه انا ماشي صح ولا لا
انا ماشي وخلاص ومش عارف انا رايح فين 

 وكمان انا مكنش معايا لا مية ولا اكل مكنتش فاكر ان انا طالع سفاري بصراحة 

المهم بعد الساعتين دول وصلت لوحدة كده علي الطريق كده 
كنت شايف نورها من بعيد 
الوحيدة اللي لقيتها يعني 
رحت عليها وسألتهم برضو عن الوحدة بتاعتي 
جالي صول محترم كده 
وده الوحيد اللي كلمني بصراحة 
اول ما قلتله اسم الوحدة لقيته استغرب كده وقالي ايه ياباشا الي جابك من هنا 
ده انت المفروض تنزل عند مش عارف فين 
ووصفلي حاجة تانية خالص 
بس الكلام ده كان من الاول طبعا 
هو كان بيقولي ارجع وامشي علي الوصفة بتاعته 
انا قلتله مستحيل ارجع اللي مشيته ده تاني 
ده انا لو هموت في الصحرا دي مش راجع 
قولي اوصل ازاي 
قالي يا باشا دي هتاخد منك ساعتين مشي 
طبعا الكلمة نزلت عليا كالصاعقة 
ساعتين تاني ؟؟؟؟
انا اصلا كنت تعبت بجد بدنيا ونفسيا 
خلاص يعني كنت خلصت 
قولتله في حل تاني ؟؟؟
قالي لا 
قولتله خلاص اوصف 
المهم قالي همشي ازاي وهيقابلك ايه في الطريق 
شكله كان دارس المنطقة يعني
المهم شكرت الراجل ولميت شنطي ومشيت 

الجو ضلمة .......
وانا عطشان وجعان  .......
وتعبان بدرجة كبيرة جدا ........
وفي نفس الوقت سامع اصوات غريبة حواليه 

المشكلة فعلا ان انا مكنتش خايف معرفش ليه 
يمكن التعب وحلم الوصول (مش الوصول لكاس العالم) كانو مسيطرين عليا 
ومش مديني فرصة افكر في اي حاجة تانية 

في الليلة دي جه عليا وقت قلت ايه اللي بيحصلي ده 
كان كتير عليا قوي 
بتاع خمس او ست ساعات مشي متواصل مع اول يوم ظابط 
كانو كتير عليا 
وده كان كافي يديني الانطباع الاول عن الجيش 
في المرحلة الجديدة 


عموما بعد رحلة الشقاء  دي وصلت للوحدة الحمد لله

يلا بقي اسيبكو دلوقتي 

ونلتقي في مغامرة تانية 
باي باي

16‏/04‏/2011

Back

احم احم 
سلامو عليكو 


ازيكو يا بني ادمين ايه اخباركو 
انا تقريبا دلوقتي بقالي بتاع 5 شهور ما دخلتش علي المدونة 
وكنت تقريبا نسيتها 
بس انا كل لما ببقي مخنوق او مضايق ومش بلاقي حد اكلمه 
باجي هنا 
بحس انها صاحبي اللي كل ما احتاجه بلاقيه 
المهم مش عايز انكد علي حد 
انا جاي اطمن عليكو واسلم بسرعة كده عشان عندي جيش 
مش فاضي بقي 
كنت ايز بس اقولكو اني خلاص يوم التلات اللي جاي 
هتخرج من كلية الضباط الاحتياط وهبقي ظابط بجد 
عشان كده غيرت اسم المدونة
يعني زي نيولوك كده 
انا بحب التغيير 
اا كانت مصر كلها اتغيرت جت يعني علي اسم المدونة بتاعتي 


المهم بقي قولولي مبروك وادعولي 
وبما اني هبقي ظابط بقي عايز اطلب منكم طلب 
الطلب لاخونا المتظاهرين اللي كنت واحد منكم قبل ما ادخل الجيش 
امانة عليكو ما تعاملوش الجيش زي الشرطة  
الجيش بيحارب في اكتر من جبهة 
وكمان هو مش متعود علي المواجهة المباشرة مع المدنيين 
وكمان الجيش مفيش في ايده عصاية 
ده سلاح واحنا بشر 
هو صحيح مفيهوش خيرة ومنظر علي الفاضي 
بس برضو احترمو ان دول بشر 
وجهو كلامو للي يقدر ياخد قرار 
الظابط اللي في الشارع ميقدرش يعمل حاجة غير انه يحافظ علي الوضع امن وبس 
انا بقول كده عشان اولا بحب مصر 
ثانيا صحابي نازلين الشارع والله اعلم انا كمان هنزل ولا لا 


يلا بقي عشان مسافر اتمني ليكم حياة سعيدة 
واتمني مستقبل احسن لمصر 


سلامو عليكو

Recent News

Introduction

Recent News