النهارده الاحد 7 مارس 2010 الساعة 8.43 م
احم
سلامو عليكو
بعد ما كنت بتريق علي الناس اللي بتتصل بـ 0900
والمسابقات والكلام الفاضي
لف الزمن واتعملت فيا بس غصب واقتدار بقي
طبعا عشان التكنولوجيا ملت حياتنا وبقينا عايشين عليها
قررت جامعة بنها ومن ضمنها طبعا كليتي العزيزة هندسة شبرا
انها تطبق التكنولوجيا علينا وال ايه
اتصل بزيرو تسعميه عشان تجيب النتيجة
وطبعا لاني مقاطع لمثل هذه الحاجات اللي ملهاش لازمة
قلت مش هتصل ولو حتي اتشقلبو وخلاص خدت قراري
وهستني لما يعلقوها
وفي نفس اليوم وانا قاعد ع الفيس بوك لاقيت واحد من كليتي
بيقول انه جاب النتيجة
انا لقيت قلبي بيدق بسرعة وحالة القلق اشتغلت
وبصيت لنفسي كده بكسوف وقلت " هتنزل المرة دي "
ما حبكتش يعني مش ناقصة تقفيل
المهم خدت قراري اني هتصل خلاص واشوف النتيجة
اتصلت لقيت الست بتقولي مرحبا بك في جامعة بنها
وال ايه هتعدلي الكليات من الاول للاخر وانا اختار
انا قلت مفيش مشاكل
وبالفعل اخترت
ودخلت الكلية
لقيتها هتعد تاني الدفعات اعدادي - اولي - تانية .......الخ
طبعا وانا علي اعصابي
قلت ومالو ووصلت رابعة واخترت
وللمرة التالتة هتعد الاقسام عشان اختار القسم بتاعي
واخترته
وفي كل ده انا عمال ادعي علي الست الرزلة دي
اللي عمالة تموطح فيا
وللمرة الرابعة كمان قايمة اختيارات للتخصص جوه القسم
وانا هعيط وانا قاعد
خلصي بقي
واخيرا قالتلي ادخل رقم جلوسك
لقيت دقات قلبي زادت قوي وبقيت اقول ربنا يستر
دخلت رقم الجلوس وانا ايدي بتترعش
وفي الاخر بقي خلاص هعرف النتيجة
الوليه بنت التييييييييييييت تقولي نتيجتك لم تظهر بعد
كنت عايز اخنقها بجد بقي
وقالتلي دخل رقم موبايلك عشان نبعتلك النتيجة عليه
اللي لفت نظري بجد في الليلة دي
ان دايما انا بكون في الاخر
يعني كليتي كانت في الاخر الكليات
قلت يمكن عشان بعيدة عن الجامعة
وانا في الفرقة الرابعة يعني اخر حاجة
وقسم ميكانيكا قالته اخر قسم او قبل الاخر تقريبا
حتي لما بقي الاختيار من اتنين بس في التخصص
كنت انا الاختيار التاني برضو
كنت حاسس ان هما قاصدين يعذبوني انا بالذات
عموما نفسي في طلب واحد بس منكم
ياريت اللي يقرا الموضوع ده ولو عن طريق الخطا
يدعيلي انجح عشان اخلص بقي
عشان بجد زهقت
فاصل ونكمل
......
انسان عادي
ليست هناك تعليقات:
إرسال تعليق