النهارده الاثنين 1 مارس 2010 الساعة 3.27 م
عمرو ومنة
.jpg)
احم
سلامو عليكو
دول يبقو من ولاد اخواتي
عمرو ومنة
هي الفكرة من الموضوع في ظاهرها بسيطة بس انا لما فكرت شويتين
بصراحة حسيت انها صعبة قوي
ندخل في الموضوع
عمرو عنده 3 سنين ونص ومتة عندها 3 سنين
هما ولاد عم اتربو مع بعض الفترة اللي فاتت
يعني كانو يوميا بيشوفو بعض ويلعبو مع بعض
بس من يومين بالظبط منة وباباها ومامتها سافرو السعودية
جالهم شغل هناك وهيقعدو هناك
المهم انا كنت متأكد ان عمرو طبعا هيتأثر لما يجي اول يوم وميلاقيش منة
بس انا خاب ظني في اول يوم لانه جه وسال عليها زي كل يوم
قالولو ده هي في مشوار مع مامتها فهو عادي خرج يلعب بره
بس اللي حصل بعد كده بقي
انه لما بيجي كل يوم بيسأل عليها فطبعا الرد الثابت بتاع المشوار ده
زهقه بقي ( هو كل يوم مشوار كل يوم مشوار )
وبدأ فعلا بقي يحس ان منة مش موجودة معاه
وبدأ برضو يدور عليها ولما زهق بقي يحاول يكلمها في التلفون
يرفع سماعة التلفون ويفضل يلعب في الزراير شويه
واقوله يابني مش هترد عليك يقولي لا هترد استني انت بس
وبقيت حاسس انه فعلا الموضوع ده مأثر فيه بشكل كبير
وعشان انا برضو خايب وبتأثر بسرعة
ومن ناحية تانية البت منة وحشتني قوي
وعلي فكرة دي اول مرة حد من اخواتي يسافر
فخت قرار متهور وكلمتهم في التلفون عشان خاطر عمرو بيه
وطبعا رصيدي خلص
ههههههههههه
بس بجد موقف عمرو اثر فيا جامد
وانا مش عارف ايه موقف منة هناك بس اكيد برضو متأثرة
في الاخر احب اقول كلمتين
لو كلامي ده اثر في حد منكو فيلريت يشحنلي باي حاجة
عشان اخوكو فقران اليومين دول
ههههههههههههههه
يلا
فاصل ونكمل
.........
انسان عادي
ليست هناك تعليقات:
إرسال تعليق