النهارده التلات 9 فبراير 2010 الساعة 9.46 م
النهارده وانا جاي من الكلية حصل موقف وقفني كتير قوي
خلاني افكر شويه
انا كنت مروح بالقطر وبعد ما نزلت المحطة وخرجت فيه مزلقان بعد كده
المزلقان ده بيعدي علي ترعة كبيرة شويه
المهم عشان الكلام ما يبقاش رخم انا متعود امشي من علي الكوبري بتاع القطر ده
طبعا انا عارف ان القطر بيمشي علي الشمال دايما فبالتالي انا بمشي علي اليمين
عشان لو فيه قطر جاي ابقي شايفه قدامي
المهم بقي وانا بعدي كان فيه قطر جاي ورايا بس طبعا علي الناحية التانية
مش ع القضيب اللي انا ماشي عليه
وانا بعدي كان فيه اتنين شباب واقفين خايفين يعدو
عشان مش عارفين القطر هيجي فين بالظبط
وانا بعدي نادو عليا وقالولي القطر جاي وراك حاسب
انا طبعا عشان شكاك شويه ما بصتش ورايا واعتبرتهم بيشتغلوني وقلتلهم
بثقة القطر جاي علي الناحية التانية
ودخلت علي الكوبري وكملت مشي
وانا في نص الكوبري واحد منهم نادي تاني بس باهتمام اكتر بقي
يا كابتن القطر جاي حاسب
وبرغم ان انا واثق مليون في الميه ان القطر مش هيجي علي القضيب اللي
انا ماشي عليه الا اني برضو خدتي لحظة خوف
مش من القطر انما من فكرة تانية
احنا سمعنا كتير عن الاهمال اللي في مصر
لكن هل ممكن يوصل الاهمال ان القطر بدل ما يمشي علي الشمال
يمشي علي اليمين ؟؟؟؟؟
بجد اللقطة دي جت في دماغي وانا ماشي حسيت بلحظة خوف رهيبة
ولما خلاص سمعت صوت القطر ورايا علي طول
وخلاص مفيش كام ثانية وهيبقي يا اما جنبي يا اما فوقي
لاقيتني غصب عني ببص ورايا عشان اشوفه هو ماشي فين
مع اني متاكد ان هو لو كان ورايا مش هيبقي فيه امل اني ابعد عنه
رايح رايح يعني
دي كانت لحظة من لحظات الخطر اللي انا عشتها بجد
وفيه لحظات تانية كتير ممكن نبقي نتكلم عليها بعدين
فاصل ونكمل
....
....
انسان عادي
ليست هناك تعليقات:
إرسال تعليق