النهارده الاربع 14 يوليو 2010 الساعة 11.04 م
احم احم
سلامو عليكو
بجد انا الايام دي في حالة نفسية سيئة جدا
مفيش حد في البيت مستحملني
ولا انا مستحمل اي كلمة من حد
بزهق لاي سبب
وبقيت دايما في خناقات
ومش بخرج من البيت خالص
ولا حتي بروح عند اي حد من اصحابي
يمكن ايام الامتحانات كنت بخرج اكتر من كده
يدوب بروح لحد المسجد وبرجع تاني
مش عارف فيه ايه
يمكن عشان مستني النتيجة الايام دي
يمكن عشان حاسس اني داخل علي جو مختلف
وخايف منه
وحاسس اني مش قده
مش عارف بجد
وفيه كمان حد كنت متوقع انه هيستحملني
ويهون عليا
للاسف هو كمان مش مستحمل
حتي المدونة هنا بقيت مش عارف اكتب فيها
كل اما اجي اكتب حاجة اتخنق واروح قافل
مش عارف اكتب
مش عارف اتكلم
بجد حالة منيّلة بنيلة
ده حتي اصحابي ابتدو يزعلو مني هما كمان
عشان المفروض نتقابل بقي كل يوم
وانا مش بروح لحد
انا حاسس ان حياتي واقفة
مش بعمل اي حاجة
حتي كنت ناوري اقرا في شويه مواضيع كده
اهو يعني تأكيد لشوية المعلومات اللي طلعت بيهم من الكلية
واحاول ازود عليهم شويه
برضو مكسل ومش قريت ولا حاجة
يعني بفكر مثلا في النتيجة وافضل اقول يا تري هتيجي عاملة ازاي
وحتي لو جت كويسة ابص للجيش
ساعات ابقي عايز اخد تأجيل عشان الحق اعمل حاجة
بدل ما اضيع تلات سنين ع الفاضي
وبعدين اطلع ابتدي من جديد
وساعات تانبة ابقي عايز ادخل الجيش
عشان خايف ملاقيش شغل
او حتي الاقي بس مكنش كفء للشغل ده
الدنيا مضلمة في عنيا قوي
وبجد محتاج حد اتكلم معاه
حاولت افضض معاكو شويه
بس مش عارف الدنيا هتبقي عاملة ازاي الفترة اللي جاية دي
ربنا يستر
ويعديها علي خير
ياريت بجد تدعولي
محتاج دعواتكم
واستحملوني انتم بقي مليش غيركم دلوقتي
فاصل ونكمل
..........
انسان عادي
هناك 4 تعليقات:
يـآآآه ده ايه الأوكتئاب والكبت ده كله
ارغي برآحتك ولا يهمك ..
ولما متابعين مدونتك ميسمعوش .. مين اللي هيسمع يعني ؟!!
مش عارفه انت مديقها على نفسك كده ليه ؟
اخرج وقابل صحابك واتبسط وعيش .. ومحدش عارف بكره هيكون فيه ايه ؟ ..
خلي ثقتك ف ربنا كبيره .. والجيش المتضارب مع الشغل ده ..
حاول تزبط ف شغل كويس ويكون هيستناك سنين الجيش .. يلا اهم 3 سنين اخلص منهم بسرعه .. وهتطلع احتمالية انك متلاقيش شغل .. بس هتدور وعلى قد ما هتتعب وتدور ربنا هيوفقك .. واكيد هتلاقي شغل كويس .. وبعدين انت مفروض تكون واثق ف نفسك .. ده انت جايب امتيااااز في المشروع .. يبقى تضمن شغل اكيد ..
متبقاش متشائم كده .. انت لسه اهو على عتبة بداية حياتك ..
ده حتى الخروج بليل ف الحر ده جميل .. بدل حبسة البيت الممله دي :(
" تفائلوا بالخير تجدوه " ..
وعلى فكره بقى الجيش مش وحش يعني .. انا قرايبنا اللي دخلوا جيش .. بيقولوا كانت احلى ايام قضوها .. واتعلموا منه حاجات كتيره ..
وانت هتتعلم منه حاجات اكتر وتيجي تعلمهالنا إن شاء الله .. :D
ربنا يوفقك ف حياتك .. وبطل النظره التشاؤميه دي .. الحياه لسه بمبي :)
بص يا سيدي
موضوع أنك حاس باكتئاب ده معلش اصبر شوية
هي كده أول ما تخلص الكلية بتبقي حاسس أنك خلصت مرحلة و مش عارف ايه اللي هيتم الفترة الجاية أصل أحنا لما كنا في الكلية كان اليوم بيجيب يوم يعني النهاردة في محاضرة لغاية بالليل و تروح تذاكر و بعد اسبوع في امتحان و تخرج مع أصحابك فاليوم بيعدي و الحياة بتمر بسرعة و مش شايل لها هم لأنك بتنتقل من سنة لسنة و خلاص
أنما دلوقتي أنت مش عارف حاجة
هل هتخش جيش و لا لأ ولو دخلت هتدخل أد ايه ؟
و هل هتلاقي شغل ولا لأ بعد ما تخرج
و لو ما دخاتش هل هتشغل ايه و أزاي
اقولك حاجة حلوة
سيبها علي ربنا
أنت بس أمشي في أوراق الجيش و خلص يسرعة المواضيع دي
و أخرج دلوقتي مع أصحابك و زأطط (:
أعمل زي ما فودافون بتقول
"عيش أحلي ما في اللحظة"
تقبل مرموري
ازيك ياقمر
معلهش ان شاء الله النتيجه هططلع وهتكون كويسه
معلهش مش لوحدك اللى بتمر بالحاله دى قلبى معاك
ربنا يفك كربك ويبعد عنك اى حزن
وان شاء الله هترجع اقوى واحسن من الاول قلبى معااااااااااااااااااك
توتا
السلام عليكم برضو كده
انت عارف انى هدخل عندك
القيك مكتأب كده
مش متوقع كده
يابنى حال تلات تربع طلاب مصر كده اللى خايفين على ضياع السنه ومش مستعدين على ضياعها بمعنى مش مضيانها وضربينها طناش
معلش للاسلوب الكلام بس
بحاول اخرجك من اللى حضرتك فيه
يابنى انت بتصلى فى المسجد ده كويس
بمعنى
يعنى فى سلم فى جسر
ادعوا
وخبط على بابه سبحانه
وشوف نفسك مخنوق من ايه وقوله وحاول تعالج نفسك
بص
لا يحك جلدك الا ظفرك
اقصد خليك طبيب نفسك ولو قصرت مع الناس
بس لازم تراعى ظروفهم وتقرب منهم تانى
(لا تكن لين فتعصر ولا صلب فتكسر )
هى فتره وهتعدى
على خير ان شاء الله
إرسال تعليق