النهارده التلات 26 يناير 2010 الساعة 3.20 م
مش عارف ايه حكايتي النهارده مع الناس الرغايين
وانا رايح الكلية الصبح وطبعا مش نايم كويس وقرفان عشان
ندي امتحان مادة مش فاهم فيها حاجة ومصدع بطريقة وحشة
ركبت العربية عادي زي كل يوم ومن سوء حظي قعدت جنب بنتين
برضو كان عندهم امتحان عشان برضو كانو ماسكين ورق في ايديهم
بس من اول ما ركبت العربية لحد ما نزلت يعني تقريبا كان نص ساعة كده
مابطلوش كلام والكلام ايه ورا بعض ورا بعض كده كأنهم بيتسابقو
والمشكلة الاكبر بقي انهم كانو بيتكلمو في وقت واحد يعني متهيالي
مكنش حد فيهم فيهم التاني عايز ايه رغي وخلاص لحد بجد دماغي كانت هتتفرتك
واله بجد انا كنت عايز بعد ما انزل اضربهم
بس لاسف ما بضربش بنات
ده كان وانا رايح الكلية
كمان بقي وانا جاي
بعد ما الصداع تضاعف والخنقة طبعا زادت عشان العك اللي حصل في الامتحان
وانا مروح بقي ركبت برضو عربية
وقعد ورايا اتنين بس كانو رجالة بقي المرة دي
يعني كانو كبار بتاع 40 و 50 سنة كده
بس في الرغي برضو اساتذة
فضلو يتكلمو في مواضيع ملهاش اي علاقة ببعض
شويه كورة علي حبه سياسة ودخلو برضو في الفن
بس برضو اللي يغيظ قوي انهم مش فاهمين اي حاجة في اي حاجة
يعني مثلا من ضمن الحاجات اللي علقت في دماغي
سيرة محمد علي باشا كانو بيتكلمو عنه وواحد رد ع التاني
يقوله ايوه اللي هو كان سنة مش عارف 800 وكام ده
يعني من الف سنة
طبعا انا قاعد طول الطريق بضحك من الحكايات اللي قاعد بسمعها
بجد الرغي ده شئ فظيع جدا
وانا اكتر حد بكرهه هما الرغايين وخصوصا لما يتكلمو في حاجة
هما اصلا مش فاهمينها
وبعد ده كله وصلت بيتنا بسلام بس برضو
مازال الصداع مستمرا بشكل كبييييير
فاصل ونكمل
.......
انسان عادي
ليست هناك تعليقات:
إرسال تعليق