ربع قرن من الزمان 1

النهارده الاربع 2 يونيو 2010 الساعة 3.24 م 

احم احم 

سلامو عليكو 

هنبتدي الحكاية من البداية 

ايون من الاول خالص من يوم 8 يونيو 1985 م 

في اليوم ده انا جيت للدنيا من اب وام مصريين مسلمين 

قرايب ومن عيلة واحدة 

(احم احم اكيد عرفتو سبب التخلف )

جيت لاقيت قبلي اربع اخوات 

طارق وخالد وايمان وحسام 

واكيد طبعا كنت انا اصغرهم وفضلت برضو الصغير 

عشان مفيش حد جه تاني بعدي 

اصر والدي انه يسميني علي اسم جدي 

عبدالفتاح 

اذن انا اسمي عبدالفتاح 

بس ومشيت الايام عادي خالص لحد ما بقي عندي 6 شهور 

وهنا كان اول موقف يحصلي 

وده طبعا اتحكالي من والدتي 

واحدة جارتنا كانت رايحة تكشف عاي بنتها اللي هي اكبر مني 

وقالت لوالدتي تيجي معاها وطبعا امي خدتني معاهم لاني لسه صغير 

المهم وصلو عند الدكتورة العبقرية ودخلو يكشفو 

واذ بالعبقرية تتجلي وتشوف الدكتورة ان انا عيان 

وتقنع والدتي بالحكاية دي 

(طبعا مش هتكدب الدكتورة يعني )

ويا سبحان الله عرفت المرض والعلاج كان عندها جاهز 

وقررت انها تديني حقنة مش فاكر اسمها 

المهم خت الحقنة ورحت انا في دنيا تانية 

امي وجارتنا شافوني كده خلاص بموت 

امي ما اتكلمتش خالص او مقدرتش تتكلم 

او مش عارفه تقول ايه 

بس سبحان الله بجد الدكتورة ربنا الهمها 

وعملتلي تنفس صناعي ومعرفش اديتني ايه كده 

(طبعا الحاجات دي اتحكتلي يعني )

وربنا رد فيا الروح تاني 

المشكلة بقي 

امي قالت لدكتور علي اللي حصل ده 

وسألها علي الحقنة دي هي ايه 

وقالتله اسمها 

فرد عليها وقالها من الدكتورة المتخلفة الي عملت كده 

الحقنة دي ياخد نصها طفل عنده 6 سنين 

وانا خدتها كلها وكان عندي 6 شهور 

بس مكتوب لي اعيش واكمل 

الحمد لله علي كل حال 

فاصل ونكمل 

.........

انسان عادي