العاصفة

احم احم

سلامو عليكو

فاكرين فيلم العاصفة بتاع خالد يوسف 

بتاع حرب العراق والاخين اللي واجهو بعض 

عارفين الاحساس ده 

لما تكون انت في موقف واخوك في موقف معادي 

واقف قصادك وشك في وشه

انا تقريبا حاصل معايا الموقف ده 

بس مع بعض التعديلات 

اولا انا مش واقف قصاد اخويا 

انا واقف قصاد نفسي

حبة توضيح بقي

طبعا انتو عارفين ان انا في الجيش الايام دي

في ايام ثورة يناير وبالظبط يوم الخميس 10 فبراير انا كنت في ميدان التحرير 

انا مكنتش لسه بقيت ظابط ومكنتش مسؤول عن حاجة 

انا كنت في التحرير يومها كمتظاهر 

ولو كنت موجود في بيتنا في الايام اللي قبل التاريخ ده 

كنت قضيتهم في التحرير مع الناس 

ولكن للاسف كنت في الجيش 

المهم انا ساعتها مكنتش بفكر قوي ان انا في الجيش ومينفعش ابقي متظاهر 

كنت بتعامل زي ما بيقولو عندنا في الجيش "ملكي"

والحمد لله الثورة نجحت 

نيجي بقي بعد 5 شهور من اليوم ده 

انا بقيت ظابط والمفروض اني مسؤل 

وبكرة الجمعة 8 يوليو المفروض ان فيه ثورة الغضب التانية 

انا بكرة موجود في الوحدة بتاعتي بأمنها من اي حد 

بغض النظر عن اي حاجة 

سواءا بقي اللي في التحرير صح ولا غلط 

الجيش صح ولا غلط 

بس في 5 شهور انا اتحولت من الصف ده للصف اللي في المواجهة

والصراع بقي داخلي 

عارفين ابو العربي وهو بيقاسي مع حرب الجينات اللي عنده 

بين ابوه الشهيد وخاله الواطي 

اهو انا تقريبا في نفس الموقف 

عارف ان الجيش متكاسل ومتراخي في اخد قرارات لازم تتاخد

بس كمان قربت ازهق من الفوضي اللي في البلد

عارف كويس جدا ان النظام السابق مش هيمشي بسهولة 

ولازم "يفرفر "قبل ما يموت 

دي حاجة منطقية يعني 

بس احنا كمان لازم نبقي اذكي من كده 

ونفهم احنا رايحين فين 

مش عارف اقول لحد روح التحرير 

ومش جايلي قلب اقوله ما تروحش 

بس ياريت اللي رايح يتظاهر باسلوب محترم ويراعي سمعة مصر 

ويحترم مشاعر قوات الامن اللي هتبقي موجودة 

ارجوكم بلاش استفزاز لا للشرطة ولا للجيش

الناس دي مش هما اللي سرقوكم والله 

اذا كان في خطأ في القادة بتوعهم بلاش تاخدوهم بذنبهم 

اكيد اللي موجود في التحرير من الامن رايح علشان يأّمن مصر 

وشعب مصر 

يا اهل التحرير خافو علي مصر 

امنعو البلطجية من انهم يوصلو لغرضهم 

البلطجية بيستخبو بينكم 

ربنا يوفقكم ويحميكم 

ويحمي مصر وينصرها 

اللهم امين

سلامو عليكو

ثورة الغضب المصرية التانية

احم احم

سلامو عليكو

يوم التلات 25 يناير 2011 كنا نازلين في شوارع مصر كلها 

ضد الفساد والتعذيب 

وكنا بنطالب بالحرية واليمقراطية والعدالة الاجتماعية

لا كان فيه محاكمة مبارك ولا العادلي ولا اي حاجة من الكلام ده 

ونظرا للاهمال اللي اتقابلت بيه مظاهرات يوم 25 يناير

قررنا اننا ننزل يوم الجمعة 28 يناير (جمعة الغضب) 

عشان نقولهم ان احنا لينا صوت ورأي ومش مهمشين 

وعلي الاقل لازم نتسمع 

المهم انا مش بحكي الاحداث 

كلنا عارفين الاحداث كويس 

انا عايز بس افكر الناس احنا كنا نازلين ليه في الاول 

وكانت مطالبنا ايه 

وبعد كام يوم ازاي المطالب دي اتحولت وكبرت بطريقة كبيرة 

لما حسينا ان مفيش حد مهتم بكلامنا 

كنا بنشتكي من فساد الشرطة ..... بقينا نطالب بمحاكمة وزير الداخلية 

اداء الحكومة مكنش علي المستوي المطلوب 

طالبنا بتغيير الحكومة 

طالبنا بتنحي رئيس الجمهورية 

ومش بس كده 

طالبنا  بمحاكمة رئيس الجمهورية 

انا بس بحاول استعرض معاكو ازاي المطالب بتتطور بسرعة 

نظرا لاهمال النظام في التعامل معاها 

بس كتير مننا اعطي النظام السابق العذر في المعاملة دي 

وقولنا اتفاجئو من اللي حصل 

ومكنوش متوقعين ان ممكن الشعب ده يطلعلو صوت 

الكلام بقي دلوقتي موجه للحكومة اللي ماسكو دلوقتي وللمجلس العسكري 

ليه مش عايزين نتعلم من اللي حصل 

ليه بنسيب الامور تتطور وتخرج عن السيطرة 

طالما في ايدنا الحل وعارفين ايه اللي يتعمل ساكتين ليه 

باقيين علي مبارك ليه 

ليه محسسنا ان له ديول موجودة في البلد وليها سلطة 

دا احنا كنا بتريق علي الرئيس الليبي والسوري انهم متعلموش من اللي حصل في مصر وتونس 

ليه احنا كمان مبنتعلمش من اللي بيحصل عندنا 

انا مع ثورة سلمية تانية 

للتأكيد علي مطالب الشعب ومطالب ثورة 25 يناير 

اللي هي الحرية والديمقراطية والعدالة الاجتماعية 

مش محاكمة مبارك وعصابته 

اصل دي المفروض مش محتاجة ثورة عشان نطالب بيها 

ده  امر بديهي وطبيعي 

واحد عمل فينا البدع سرقة وقتل  ونهب وترويع وتعذيب واضطهاد  و .....

وبلاوي تانية كتيييييير قوي 

اللي زي ده نبقي عليه ليه 

وليه نخليه يبقي السبب في فساد ثورتنا 

المجلس العسكري والحكومة المصرية 

اعلنو حسن النوايا وحاكمو المجرم محاكمة عادلة 

انا مع الثورة السلمية قلبا وقالبا 

لكن احتراما للجيش طبعا مش هنزل الشارع حتي لو كنت فاضي 

مع اني نزلت المرة اللي فاتت بس اعتقد الوضع مختلف دلوقتي 

نيجي بقي لحتة المجلس الرئاسي 

انا مش فاهمها قوي 

الناس طالبت بالحكاية دي عشان خايفة من الجيش 

ولا عشان اداء المجلس العسكري مش كويس

بصراحة انا مش قادر اخد قرار في الموضوع ده 

وشايف تنفيذه هيبقي صعب شويه 

لان فعلا الجيش ماسك البلد دلوقتي 

واعتقد متحكم في كل حاجة 

والمجلس اللي هيجي هيبقي سلطته مدنية وعسكرية ؟؟؟

ولا مدني بس

يعني هنقسم البلد نصين المجلس الرئاسي يحكم الشعب 

والمجلس العسكري يمسك الجيش 

؟؟؟؟

ولا المجلس الرئاسي هيبقي له سلطة علي المجلس العسكري 

انا شايف انها ملخبطة ومليانة حوارات 

انا مع انتخابات رئاسية في اقرب فرصة 

مع استمرار المجلس العسكري بتدوير شئون البلاد 

ومع مراقبة الشعب (يعني لا مجلس ائتلاف الثورة ولا الاحزاب ولا الاخوان )

مراقبة الشعب لاداء المجلس 

والتحرير موجود 

سلامو عليكو

خطبة العيد سياسية بحتة لاول مرة

النهارده التلات 16 نوفمبر 2010 الساعة 6.18 م 

(اول ايام عيد الاضحي )

احم احم 

سلامو عليكو 

ازيكو يا بني ادمين يا مدونين يا حلوين 

عاملين ايه من غيري ؟؟؟

اولا كل سنة وانتو طيبين بمناسبة عيد الاضحي 

وربنا يوعدنا جميعا بالوقوف علي جبل عرفة ويرزقنا حجة مقبولة يارب

* طبعا انتو عارفين اني دخلت الجيش ضابط احتياط تلات سنين وفعلا بدأت فترة الخدمة العسكرية من يوم 21 اكتوبر 2010 وقضيت 25 يوم في كلية الضباط الاحتياط في الاسماعيلية ونزلت اول اجازة يوم الاحد اللي فات ده وتمتد الاجازة لحد يوم الجمعة 

* حالتي النفسية شغالة يعني مش سيئة يمكن كنت تعبان شويه في اول يومين تلاتة بس لما فهمت الليلة ماشية ازاي خلاص اتعودت وكيفت نفسي عليها والحمد لله احنا احسن من غيرنا 

* طبعا انا كان نفسي افضل احكي معاكو بقي علي احوالي في الجيش بس المفروض ان ده ممنوع وغير مصرح فيه اني اطلع اخبار الوحدة بتاعتي بره طبعا ده كلام بس انا بما اني فرد في القوات المسلحة حابب التزم بالقوانين دي 

اشطة ؟؟؟

ندخل بقي الموضوع اللي انا عايز اتكلم فيه النهارده وهو خطبة العيد

لاول مرة تقريبا اسمع خطبة سياسية بحتة بالطريقة دي 

يمكن عشان موسم الانتخابات بقي وكده

المهم عنوان الخطبة كان : 

الاصلاح طريق التغيير وليس العكس 

طبعا هي في الاول وفي الاخر وجهات نظر ويا نتفق يا نختلف 

اولا بس عايز اوضح نقطة هي ان الشيخ اللي كان بيخطب المفروض انه محسوب علي الاخوان المسلمين يمكن مش بطريق مباشر بس هو محسوب عليهم 

ندخل جوه الموضوع بقي

طبعا في الفترة الاخيرة وخصوصا بعد ظهور البرادعي علي الساحة السياسية وظهور الحركة الوطنية للتغيير الناس كلها تقريبا بقت تتكلم علي التغير وبتطالب بيه كمان 

التغيير في كل حاجة تغيير نواب الشعب في الانتخابات 

وتغيير الحكومة الفاسدة (من وجهة نظر البعض )

وتغيير رئيس الجمهورية 

يعني ممكن نقول انها بقت موضة التغيير 

اتفجأت بقي النهارده من الشيخ (اللي انا بحبه وبحترمه جدا جدا وبثق في رأيه جدا)

اتفجأت من معني الكلام في الاول حسيت ان احنا كنا ماشيين في الطريق المثالي (علي حسب ظننا يعني)

وفجأة جه واحد يقولك الطريق ده غلط 

انا عايز اوضح بس الاول وجهة نظره 

هو قال اننا عشان نتغير من عصر الفساد اللي احنا فيه لعصر اقوي لازم يحصل تغيير

بس التغيير ده مش معناه تغيير الحكومة او الرئيس 

مش ده اللي ممكن يعمل نهضة او اصلاح 

قال ان الحكومة بتكون مرآة للشعب 

يعني لو الشعب كويس صورته في المراية هتكون كويسة 

ولو الشعب مش كويس وفيه سلبيات برضو الصورة في المراية هتكون وحشة 

وفيها نفس السلبيات دي 

حتي لو احنا غيرنا المراية دي مليون مرة من غير ما نغير الاصل 

الصورة هتفضل هي هي مش هتتغير

وقال ان الحل الامثل هو تغيير الشعب لنفسه 

يعني بدل ما تضيع الوقت والمجهود في انك بس تدعي علي الحاكم الظالم 

او حتي تحاول انك تغيره 

ركز المجهود والوقت ده في تغيير نفسك للاحسن وكمان حاول انك تغير اللي حواليك 

من اسرتك لاصحابك واخواتك يعني والبيئة بتاعتك 

ثمرة تغيير نفسك واللي حواليك هتبان اكتر واسرع من تغيير الحكومة والرئيس 

وقال كمان معلومة 

ان التغيير مرهون علي الحكومة والشعب مع بعض 

بس بنسب مختلفة 

يعني الحكومة مهما كانت قوية متقدرش تغير اكتر من 20 % اما الشعب فهو عليه ال 80 % الباقيين 

ده باختصار موضوع الخطبة 

المشكلة بقي مكنتش موضوع الخطبة 

لانها في الاول وفي الاخر وجهة نظر ممكن تقتنع بيها وممكن لا

انما النقاش اللي حصل بعد الصلاة بيني وبين بعض الناس كان علي موقف الشيخ نفسه 

ناس قالت الشيخ بقي حزب وطني علشان قال نغير نفسنا قبل ما نغير الحكومة 

وناش تانية فهمت كلامو بطريقة تانية 

قالو ده هو كده بيدعي للتغيير بشكل اقوي لانه قال لازم التغيير يكون نابع من الشعب 

يعني كل الشعب يكون عايز التغيير ده ويطالب بيه 

يعني يكون التغيير مطلب جماهيري لل 80 مليون مصري

يعني اختلف رأي الناس عليه 

وطبعا فيه ناس اصلا مفهمتش حاجة من الكلام اللي اتقال ويمكن يكونو مش عارفين اصلا تغيير ايه اللي هو كان بيتكلم فيه 

بالنسبالي انا بقي انا واثق في الشيخ جدا ورأيه بيمثلي حاجة كبيرة 

واللي لفت انتباهي اكتر هو جرأته في عرض الموضوع ده في الوقت ده 

وفي خطبة عيد يعني اكبر تجمع ممكن للناس اللي في بلدنا

والجرأة دي بتتحقق علي اختلاف الاراء 

يعني لو هو بقي وطني فالجرأة انه يعلنها في الوقت ده قدام الناس دي كلها 

ولو هو معارضة فالجرأة طبعا اكبر 

شكرا ليكم واشوفكم علي خير بقي في الاجازة اللي جايه ان شاء الله لو كان لينا عمر 

ادعولي ارجوكم ربنا يعدي الايام دي علي خير 

فاصل ونكمل

.............

انسان عادي

وانا مال اهلي

النهارده الاتنين 7 يونيو 2010 الساعة 5.10 ص 

احم احم 

سلامو عليكو 

فيه موضوع الح علي دماغي بشكل كبير 

خلاني اقطع المذكرات اللي دبست نفسي فيها دي 

(وانا بصراحة مصدقت يعني )

موضوع بيستفزني قوي قوي قوي 

اولا عايز اوضح حاجة 

انا مش ضد الحب ولا الارتباط السليم قبل الجواز 

بالعكس يمكن ده بيدي فرصة للطرفين انهم يفهمو بعض 

ويقربو من بعض واكيد ده بيقلل المشكلات اللي بتقابلهم بعد كده 

بس علي الجانب الاخر بقي 

فيه ناس بتاخد علاقة الحب دي تسلية وتقضية وقت 

بيخلص مع واحدة يخش ع التانية وهكذا ....

اكيد بيبان من منظر البنت والولد لما بتشفهم اول مرة 

اذا كانت العلاقة اللي بينهم محترمة ولا لا 

انا بقي جه عليا وقت وبقت لما بشوف ولد ماشي مع بنت بالشكل ده 

وبيعاملها باسلوب بيرخص منها جدا قدام الناس 

بصراحة كنت بتنرفز جدا وبضايق بشكل كبير قوي 

وافضل احرق في دمي واقول 

طب هي ازاي راضية عن كده 

مش هتكلم عن لبسها ولا شكلها 

لكن علي الاقل احترامها قدام الناس وقدام نفسها 

عارفين 

كان بيجلي اوقات كتير احساس غيرة علي البنت دي 

اه كنت بغير عليها 

مع اني معرفهاش ولا عمري شفتها 

بس كنت بقول لو دي مثلا اختي ولا واحدة قريبتي 

ولا حتي اي واحدة اعرفها اكيد مكنتش هرضي انها تبقي بالشكل ده 

وفضلت تاعب نفسي فترة طويلة كده 

لحد ما شوشو جالي 

(شوشو ده الشيطان عشان بس مياخدش باله)

جالي كالعادة وقلي لا لا لا 

انت مش غيران علي البت ولا حاجة

قولتله ازاي 

قالي انت غيران من الولد ده عشان انت مش عارف تعمل زيه 

قولتله لا بقي ده انت متعرفنيش 

دانا لو فكرت بس هتلاقيهم طوابير 

قالي انت بتاع كلام ولا تقدر تعمل حاجة 

المهم انا كنت لسه غلبان وطيب وبسخن بسرعة 

وقلت طيب انا هوريك 

ودخلت علي النت علي منتدي معين كنت بدخل عليه دايما 

ويا سبحان الله كأنها مترتبة 

الاقي واحدة كاتبة موضوع معناه انها نفسيتها مضايقة وتعبانة شويه 

وعايزة حد تتكلم معاه وسايبه ايميلها كمان 

لولا ان انا عارف ان المنتدي ده محترم انا كان جه في بالي حاجة تانية 

وطبعا انا عشان شهم وطيب وبرضو بينضحك عليا 

قلت اشوف الحكاية دي 

المهم اتكلمنا شويه واتعرفنا علي بعض 

وبعدين اتكلمنا تاني وتالت 

وطبعا شوشو شغال برضو مش ساكت 

المهم بعد تلات ايام بالظبط من معرفتي بيها قلتلها عايز اقابلك 

(مانا غشيم بقي مش عارف النظام )

المهم شوشو خدمني خدمة العمر ولين دماغ البنية و وافقت 

انا مش  هحكي تفاصيل بس لاقيت الحوار ماشي سهل سهل 

لدرجة تقلق وبعدين لاقيت الكلام بيتغير 

والنظرات بتقول حاجات 

والدنيا كانت ماشية حلو قوي 

ودايما انا متعود كده لما الدنيا بتمشي معايا انا بقف 

مينفعش نمشي احنا الاتنين 

فوقفت هنا وقفة مع النفس وخدتني قلم فوقني ورجعت لعقلي تاني 

ونهيت علي الحوار الفاشل ده

طبعا شكلي كان وحش قوي قدام البت بس مش مشكلة 

بس فعلا من اهم الاسباب اللي خلتني انهي الحكاية دي 

او اصلا ما ابدأهاش هو خوفي علي البنت دي 

اولا انا داخل الموضوع ومفيش اي حاجة في دماغي 

مجرد عند وتحربه وخلاص 

بس في نص السكة عرفت ان فيه سمعت بنت ممكن تبوظ 

فيه احساس ممكن ينجرح 

في ثقة في الناس ممكن تدمر وتضيع 

لاقيت مصايب كبيرة مترتبة علي موضوع كان من وجهة نظري صغير 

المهم ان انا جيت بقي وقلت خلاص 

انا مليش دعوة 

هي البنت عايزة كده وليها اب واخ 

والواد اللي ماشي معاها مبسوط 

خلاص بقي انا مال اهلي بالحكاية دي 

وكبر دماغك با اين الحلال وخليك في حالك 

وبعدين بس انت اقدر علي نفسك وصلحها 

وابقي بص للناس 

بس برضو للاسف لسه لحد دلوفتي بضايق قوي من المناظر دي 

وفعلا بقولها بجد 

انا بحس بغيرة جامدة قوي علي اي بنت بشوفها ماشية بالشكل ده 

وبزعل قوي 

عموما انا بدعي ربنا يهديني 

ويهدي شباب وبنات المسلمين 

اللهم امين 

ويارب كل اللي قرا الموضوع ده 

ينسي الحكاية بتاعتي دي بعد الرد علي طول 

ياااااااااااارب

فاصل ونكمل 

..........

انسان عادي

لو بتحبها روحلها لحد البيت

النهارده التلات 1 يونيو 2010 الساعة 12.23 م

احم احم

سلامو عليكو

علي فكرة

التدوين وحشتني جدا وكنت مفتقدهشكل كبير

المهم اهي فترة وعدت ويارب فعلا تكون اخر امتحانات

ندخل في المهم

طيعا كلنا سمعنا حملة اعلانات ميلودي دراما

عندنا دراما غير اي دراما

المهم الجملة الموجودة في الاعلان التاني اللي هي

لو بتحبها روحلها لحد البيت

طبعا الجملة لما تسمعها من الموديلز

بالاسلوب بتاعهم وبشكلهم ده

هيديك ايحاءات جامدة جدا

بس انا بقي اخدتها من ناحية تانية

لوبتحبها وحلها لحد البيت

الكلام ده يتقال لاي واحد بيحب واحدة 

وبيقولها 

احنا هنكمل مع بعض 

احنا مخلوق لبعض 

الدنيا من غيرك ما تساويش 

يعني الكلام الاقرع اللي احنا حافظينو وبنقولو دايما ده

واعتقد انه بيكون سذاجة من البنت انها تصدق اي كلام 

يتقالها بدون اي ضمانات 

انا اللي اعرفه كويس ومتاكد منه 

ان انت لو بتحب البنت يبقي تروح تكلم اهلها 

لو بتحل البنت دي يبقي تخاف عليها وعلي سمعتها 

لو بتحب البنت دي  متمشيش تتمنظر بيها في الشوارع ال يعني 

الواد مقطع السمكة وديلها 

يعني لو بتحب البنت دي روحلها لحد البيت 

علي فكرة 

انا في وقت من الاوقات قابلت بنت 

وتقريبا لاقيت فيها كل اللي انا عايزه 

حسيت انها هي دي اللي انا ممكن ارتبط بيها 

بس وقتها كنت مدبلر في الكلية 

والدنيا كانت خربانة جدا معايا 

واكيد طبعا مكنش فيه فرصة لارتباط حقيقي 

في الوقت الحالي علي الاقل 

غصب عني في لحظة قولتلها بحبك 

بس بسرعة تاني قررت ابعد 

لاني مكنتش هقدر اروحلها البيت في الوقت ده 

طبعا يمكن اكون غلط 

يمكن اكون عملت الصح 

بس انا قلت لو ليك نصيب فيها هترجع تاني 

واهي بترجع تاني 

واعتقد في الوقت الصح 

احم احم 

انا معرفش قلت الكلام ده ليه دلوقتي 

يمكن مش عايز حد يقراه غيرها 

بس حقها انه يتقال 

اخيرا عشان ما اسيحش اكتر من كده 

بقول لكل شاب لا تنحرف 

ومتسمعش كلام شوشو 

ولو فعلا ناوي خير روح لاهل البنت اللي بتحبها 

علي الاقل تبقي بترضي ربنا 

ومن الناحية التانية بتحافظ علي الانسانة اللي معاك 

اللي ذنبها الوحيد انها بتحبك 

شكرا ليكم جدا 

وبقول تاني وحشتوني جدا 

فاصل ونكمل 

..........

انسان عادي

تنويه بسيط 

انتظروني في 

ربع قرن من الزمان 

سيرة ذاتية 

قريبا

نفسي احبك يا ريس

النهارده الاتنين 5 ابريل 2010 الساعة 11.01 م

احم احم

سلامو عليكو

اولا انا بجد انسان عادي وعادي جدا

مش مثقف بدرجة كافية اني اكتب في مدونة

او حد ياخد بكلامي

معنديش لغة قوية او اسلوب يشد الناس 

عمري ما مشيت في مظاهرة ولا كنت عضو في حزب

 بتأثر بسرعة جدا بكل الظروف اللي بتحصل حواليا

وممكن قوي كلمتين يولعوني وكلمتين برضو ينزلوني الارض

ندخل في الجد بقي

انا زمان لما كنت بتفرج علي الافلام الوطنية بتاعتنا

واشوف الرئيس جمال عبدالناصر بيحي الشعب

والناس فرحانة بيه وبتحبه بشكل جنوني

وكل ما تيجي سيرته مثلا قدام والدتي تفضل تحكيلي

يوم ما مات

بتقولي فضلنا نعيط عليه واحنا عمرنا ما شفناه

ولما بشوف اقتناع والدي بالثورة ورجالة الثورة مهما عملو بعد كده

ومهما حصل منهم

يقولي بس دول خرجو البلد من احتلال

عموما انا كنت بعذرهم وبقول ان الاعلام كان مكثف جهوده علشان يفهمهم كده

انا مش بقصد ان جمال والثورة كانو وحشين

بالعكس هما فعلا عملو تغيير جامد جدا

بس اقصد انهم خلفو سلبيات كتير والناس عدتها

زي ما بنقول كده الشعب بلعلهم الزلط

وقلت في عقل بالي  كل الحكام بيعملو سلبيات كتير عشان الهدف الاسمي

احم احم عدوها عدوها

بس زمان الشعب كان بيحب الحكام عشان مكنش يعرف السلبيات دي

انما دلوقتي الدنيا مفضوحة وكل حاجة مكشوفة

وربنا يخلي الجزيرة اللي مستلمانا ومبتفوتش حاجة

وقلت ان ده سبب عدم حبي للريس (بدون ذكر اسماء)

لكن فيه منظر شفته زمان ايام الشيخ زايد الله يرحمه 

ايام وفاته كنت شايف حزن الشعب بتاعه عليه بجد 

كنت حاسسهم زعلانين 

انا نفسي كنت زعلان عليه جدا 

وكنت بقول فيه حاكم عربي كويس اهو وشعبه بيحبو 

ساعتها بصراحة حسيت بغيرة فظيعة 

 طب ليه انا ميبقاش عندي  رئيس بيخاف عليا وبخاف عليه

بجد كان نفسي في ده وقتها 

نيجي لعلاقة البرادعي بقي بالموضوع ده 

انا قبل كده كنت بسمع عن البرادعي قليل جدا 

عادي يعني اه هو صحيح كان حد مميز جدا 

ومصري ماسك منصب عالمي 

بس مكنش فيه اي حب بيني وبينه عادي 

مش زي زويل مثلا 

وحتي بعد ما رجع والكلام كتر عليه علي انه هيرشح نفسه للرئاسة 

يمكن بصراحة من شحنة الاحباط اللي جوايا مكنتش مصدق 

انه ممكن ياخد الخطوة دي 

خصوصا انه راجل دماغه كبيره وعارف ان الكلام ده مش سهل 

المهم فضلت العلاقة باردة بيني وبينه لحد ما حكومتنا العزيزة 

قربت الوصال بينا وبدأت تحاربه 

بدأت انا كمان اخد بالي 

طب هما بيحاربوه ليه ؟؟؟؟؟

هوممكن فعلا حد يجي ويهز كرسي العرش بتاع الريس 

بدأت افكر وبدأت كمان اقتنع انه ممكن يحصل حاجة 

ساعتها بقي بدأت اذاكر البرادعي 

وعشان انا علي نياتي زي كل المصريين (الا من رحم ربي)

صدقت كل الكلام واقتنعت بيه وايدته 

والبركة في حكومتنا العزيزة 

واملي الاخير في الدنيا اني احب الرئيس 

او الرئيس يبقي اللي انا بحبه 

وربنا يدينا ويديكو طولت العمر واشوف اليوم ده 

فاصل ونكمل 

......

انسان عادي

الشيخ محمد سيد طنطاوي

النهارده الخميس 11 مارس 2010 الساعة 5.08 م 

احم 

سلامو عليكو 

امبارح لما صحيت كالعادة اول حاجة عملتها اني فتحت الكمبيوتر 

وكالعادة برضو دخلت علي الفيس بوك 

ولقيت اول خبر قابلني هو وفاة شيخ الازهر 

بصراحة اتفجأت وقولت اتأكد برضو يمكن اشاعة 

خرجت قلبت في التلفزيون شويه اني الاقي مثلا قناة مصرية 

جايبة قرآن ولا نعي ولا اي حاجة 

ابدا ملقتش 

ولا قناة جايبة سيره 

رجعت للنت تاني لقيت الخبر زاد بقي وكل الناس والمواقع اكدته 

بصراحة برغم ان ساعات كنت بحس ان الشيخ طنطاوي الله يرحمه 

مكنش هو شخصية شيخ الازهر اللي في دماغي 

يمكن مكنش قوي بما فيه الكفاية 

او مش واخد برستيجه المطلوب 

انا كنت بتخيل كده ان شيخ الازهر ده لازم يكون صح 

وكل الناس تتفق علي رأيه وقراراته 

او علي الاقل معظم الناس 

انما في الفترة الاخيرة لاقيت ناس كتير ليهم قدر كبير من العلم يعني 

بيعترضو علي كلامه او بيقولو اراء مخالفة ليه يعني 

طبعا انا مش بنكر ان هو عنده علم كبير 

لكنه مكنش مستخدم سلطته بما فيه الكفاية 

المهم انا الي زعلني بقي 

انه بغض النظر عن شخصية شيخ الازهر 

مخدش حقه او ما اتكرمش كفاية بما يتناسب مع مكانته 

انا قلت هلاقيهم بدل ما بيذيعو اغاني وافلام ومسلسلات طول النهار 

هيعملو حداد تلات ايام ولا حاجة 

مش اخرتها دقيقة حداد في ماتش كورة 

بجد حاجة تزعل 

ده القنوات كلها ايام وفاة محمد علاء مبارك قفلت تلات ايام 

ومبقتش تجيب غير قرآن 

علي الاقل نحترم بعض قدام الناس 

عشان محدش يضحك علينا 

فاصل ونواصل 

........

انسان عادي

عظيمة يا مصر

النهارده السبت 6 مارس 2010 الساعة 11.00 م 

 

عظيمة يا مصر 

عظيمة يا مصر يا ارض الهرم 

يا ارض العزايم وارض الهمم 

يا ارض الجدود .. النيل والسدود 

يا ارض الجوامع 

يا ارض الكنايس 

يا ارض المعابد 

...

..

.

يا ارض الالم 

***

يا ارض الفراعنة وارض الحضارة 

يا اكبر تاريخ يا اعظم منارة 

يا حلمي اللي كان .. يا امن وامان 

يا ارض العناد 

يا احلي البلاد 

ليه الظلم زاد 

والحق انعدم 

***

يا ارضي وبيتي في كل الحالات 

يا فرشي وغطايا حياة او ممات 

يا ست الحبايب  .. ليه العدل غايب 

وايه اللي فيكي

ما اصبحش فيكي 

وانتي كان ماليكي 

يا مصر النعم 

***

ليه بقينا دايما تجارة للكبار 

ليه بقت جنانك بالنسبة لينا نار 

ليه دا احنا ولادك .. وهما كمان ولادك 

يا امه تصدقي 

بقيتي تفرقي 

وتدوسي وتحرقي 

ولا همك الالم 

***

بقيتي ليه تسيبينا في الدنيا حيرانين 

لا همك اللي فينا ولافارقة احنا فين 

ولا حتي شاغلة بالك .. مين في الشدة شالك 

ومين اللي بيسرق 

ومين اللي بيغرق 

ومين كان يوم يصدق 

يموت فيكي الحنين 

***

ادي حبة من ولادك ماتو محروقين 

وادي حبه من ولادك ماتو مخنوقين 

وادي حبة ناس كمان .. لا ماتو ولا عايشين 

ليه عايزة النهارده 

نكون بنموت ونرضي 

اوعي تكوني قاصدة 

نعيش متعذبين 

***

سكتنا كتير وقلنا ده نصيبنا وده قدر 

وبكرة الحال هيحلي ونعيش زي البشر 

لكن ده كل يوم .. بتزيد فينا الهموم 

بنعيش والحزن فينا 

وننام والخوف مالينا 

يا مصر حسي بينا 

بصلنا بنص عين 

يا مصر حسي بينا بصلنا بنص عين 

احم احم 

سلامو عليكو

معلش مش هعرف اتكلم 

انا بس عايز اقول ان دي من كلماتي القليلة قوي 

اللي كتبتها من غير ما افكر

حاسسها بطريقة وحشة قوي 

ومش هبالغ لما اقول كل ما اقراها ببكي

فاصل وتكمل 

.....

انسان عادي

أفضل 100 حكمة عالمية وعصرية

  النهارده الاثنين 1 مارس 2010 الساعة 2.57 م

أفضل 100 حكمة عالمية وعصرية

1- أن تضيء شمعة صغيرة خير لك من أن تنفق عمرك تلعن الظلام

2- لا يحزنك إنك فشلت مادمت تحاول الوقوف على قدميك من جديد

3- كلما ازدادت ثقافة المرء ازداد بؤسه

4- سأل الممكن المستحيل : أين تقيم ؟ فأجابه في أحلام العاجز

5- إن بيتا يخلو من كتاب هو بيت بلا روح

6- ليس القوي من يكسب الحرب دائما وإنما الضعيف من يخسر السلام دائما
7- الألقاب ليست سوى وسام للحمقى والرجال العظام ليسوا بحاجة لغير اسمهم
8- من يحب الشجرة يحب أغصانها
9- نحن لا نحصل على السلام بالحرب وإنما بالتفاهم
10-إذا اختفى العدل من الأرض لم يعد لوجود الإنسان قيمة
11- ليست السعادة في أن تعمل دائما ماتريد بل في أن تريد ما تعمله
12- إن أسوأ ما يصيب الإنسان أن يكون بلا عمل أو حب
13- الحياء جمال في المرأة وفضيلة في الرجل
14- صديقك من يصارحك بأخطائك لا من يجملها ليكسب رضاءك
15-الصداقة بئر يزداد عمقا كلما أخذت منه
16- الابتسامة كلمة طيبة بغير حروف
17- لا تفكر في المفقود حتى لا تفقد الموجود
18- من قنع من الدنيا باليسير هان عليه كل عسير
19- الكلمة الطيبة جواز مرور إلى كل القلوب
20- إذا ازداد الغرور..نقص السرور
21- الضمير المطمئن خير وسادة للراحة
22- من يزرع المعروف يحصد الشكر
23- البستان الجميل لا يخلو من الأفاعي
24-العمر هو الشئ الوحيد الذي كلما زاد نقص
25- القلوب أوعية والشفاه أقفالها والألسن مفاتيحها فليحفظ كل إنسان مفتاح سره
26- الخبرة .. هي المشط الذي تعطيك إياه الحياة .. عندما تكون قد فقدتَ شعرك
27- المال خادمٌ جيد .. لكنه سيدٌ فاسد
28- عظَمة عقلك تخلق لك الحساد .. وعظَمة قلبك تخلق لك الأصدقاء
29- دقيقة الألم ساعة .. وساعة اللذة دقيقة
30- لا داعى للخوف من صوت الرصاص .. فالرصاصة التى تقتلك لن تسمع صوتها.
31- يستطيع الشيطان أن يكون ملاكاً . . والقزم عملاقاً . . والخفاش نسراً
والظلمات نوراً . . لكن أمام الحمقى والسذج فقط .
32- تتوقف السيدة عن توبيخ زوجها لكى ترد على التليفون.
33- مسكين زوجها أحب شعرها الطويل فوجد لسانها أطول.
34- إذا أردت أن تفهم حقيقة المرأة فانظر إليها وأنت مغمض العينين.
35- إذا كان لديك رغيفان فـكُل أحدهما واشتر بالأخر زهوراً.
36- من يقع فى خطأ فهو إنسان ومن يصر عليه فهو شيطان.
37- قوة السلسلة تقاس بقوة اضعف حلقاتها .
38- يستطيع الناس أن يعيشوا بلا هواء بضع دقائق وبلا ماء أسبوعين وبلا
طعام حوالى شهرين وبلا أفكار سنوات لا حصر لها.
39- نمضى النصف الأول من حياتنا بحثاً عن المال والنجاح والشهرة ونمضى
النصف الثانى منها بحثاً عن الأطباء.
40- من اشترى ما لا يحتاج إليه باع ما يحتاج إليه.
41- عندما يمدح الناس شخصاً ، قليلون يصدقون ذلك وعندما يذمونه فالجميع يصدقون.
42- ينام عميقاً من لا يملك ما يخاف من فقدانه؟
43- الزواج يأتى بدون سابق إنذار كما تقع نقطة من الحبر الأسود على ملابس الإنسان.
44- لا يوجد رجل فاشل ولكن يوجد رجل بدأ من القاع وبقى فيه.
45- غالبا ما يضيع المال .. بحثاً عن المال.
46- لو امتنع الناس عن التحدث عن أنفسهم وتناوُل الغير بالسوء لأصيب الغالبية الكبرى من البشر بالبكم.
47- الطفل يلهو بالحياة صغيراً دون أن تعلم الحياة سوف تلعب به كبيراً.
48- رغباتنا هى كصغار الأطفال ، كلما تساهلنا معها اكثر زادت طلباتها منا؟
49- اختر كلامك قبل أن تتحدث وأعط للاختيار وقتاً كافياً لنضج الكلام فالكلمات
كالثمار تحتاج لوقت كاف حتى ننضج.
50- كن على حذر من الكريم إذا أهنته ومن اللئيم إذا أكرمته ومن العاقل إذا أحرجته ومن الأحمق إذا رحمته.
51- من السهل أن يحترمك الناس .. ولكن من الصعب أن تحترم نفسك.
52- يشعر بالسعادة من يغسل وجهه من الهموم ورأسه من المشاغل وجسده من الأوجاع.
53- كل مأذون له شارب طويل ولحية أطول ليخفى ابتسامة الشماتة
54- إذا بلغت القمة فوجه نظرك إلى السفح لترى من عاونك فى الصعود إليها
وانظر إلى السماء ليثبت الله أقدامك عليها.
55- من عاش بوجهين مات لا وجه له.
56- إذا استشارك عدوك فقدم له النصيحة ، لأنه بالاستشارة قد خرج من
معاداتك إلى موالاتك.
57- إذا كنت غنياً فتناول طعامك متى شئت .. وإذا كنت فقيراً فتناول طعامك
متى استطعت.
58- عندما يقول لك إنسان انه يحبك مثل أخيه تذكر قابيل وهابيل.
59- تكلم وأنت غاضب .. فستقول اعظم حديث تندم عليه طوال حياتك.
60- لا تجادل بليغاً ولا سفيهاً .. فالبليغ يغلبك والسفيه يؤذيك.
61- حسن الخلق يستر كثيراً من السيئات كما أن سوء الخلق يغطى كثيراً من
الحسنات.
62- الزواج أخذ وعطاء وهو يعطى وهى تأخذ..
63- الرجل التافه يحرمك من العزلة دون أن يوفر لك جلسة ممتعة.
64- قليل من العلم مع العمل به .. أنفع من كثير من العلم مع قلة العمل به ..
65- تعتقد بعض النساء أن الزواج هو الفرصة الوحيدة للانتقام من الرجل..
66- إذا تشاجر كلبان على غنيمة تكون من نصيب الذئب الذى يأتى على
صياحهما.
67- فى الزواج ليس هناك سوى يومين جميلين ، ويوم دخول القفص ويوم
الخروج منه.
68- الإنسان لا لحمه يؤكل .. ولا جلده يلبس .. فماذا فيه غير حلاوة اللسان..
69- الصحة هى الشىء الذى يجعلك تشعر بان اليوم الذى تعيشه . هو افضل
وقت فى السنة..
70- إذا كنت تخشى الوحدة فلا تتزوج.
71- فاتورة التليفون هى ابلغ دليل على أن الصمت أوفر بكثير من الكلام.
72- ليس الفقير من ملك القليل .. إنما الفقير من طلب الكثير
73- أولى لك أن تتألم لأجل الصدق .. من أن تكافأ لأجل الكذب.
74- لاشك أن الحياة كانت تبدو رائعة جميلة لو كنا نولد فى سن الثمانين
ونقترب على مر الأعوام من الثانية عشر
75- ليس السخاء بان تعطينى ما أنا فى حاجة إليه اكثر منك ، بل السخاء فى
أن تعطينى ما تحتاج إليه اكثر منى.
76- إذا أعطيت فقيراً سمكة تكون قد سددت جوعه ليوم واحد فقط .. أما إذا
علمته كيف يصطاد السمك تكون قد سددت جوعه طوال العمر
77- الكلب السعيد يهز ذيله المنافق يهز لسانه.
78-إذا قرر الرجل الزواج فقد يكون هذا أخر قرار يسمح له باتخاذه.
79- الإنسان الناجح هو الذى يغلق فمه قبل أن يغلق الناس آذانهم ويفتح أذنيه
قبل أن يفتح الناس أفواههم.
80-لا تدع لسانك يشارك عينيك عند انتقاد عيوب الآخرين فلا تنس انهم مثلك
لهم عيون والسن.
81- من ركب الحق غلب الخلق
82- لا يباع الحطب قبل قطعه ولا يباع السمك في البحيرة
83- عندما يمشي الكسل في الطريق فلابد أن يلحق به الفقر
84- أموت محبوبا خير لي من أن أعيش مكروها
85- إذا أردت أن تحتفظ بصديق فكن أنت أولا صديق

86- كن مستمعا جيدا لتكن متحدثا لبقا

87- لا يعرف ثقب الجورب إلا الحذاء

88- الشجرة العاقر لا يقذها أحد بحجر

89- أسهل كثيرا أن يصدق الإنسان كذبة سمعها

ألف مرة من أن يصدق حقيقة لم يسمعها من قبل

90- لا شئ أشجع من الحصان الأعمى

91-احترس من الباب الذي له مفاتيح كثيرة

92- لو أعطيت الأحمق خنجرا أصبحت قاتلا

93- ليس مهم أن تحب المهم من تحب

94- ما أسهل أن تكون عاقلا . . بعد فوات الآوان

95- كل الظلام الذي في الدنيا لا يستطيع أن يخفي ضوء شمعة مضيئة

96- خير لك أن تسأل مرتين من أن تخطأ مرة واحدة

97- من أذنب وهو يضحك دخل النار وهو يبكي

98- يكفي أن تظهر السوط  للكلب المضروب

99- الريش الجميل ليس كافيا ليصنع طائرا جميلا

100- يسخر من الجروح كل من لا يعرف الألم

احم 

سلامو عليكو 

الكلام ده منقول بس عجبني 

فاصل ونكمل 

.......

انسان عادي

فيها ايه دلوقتي مصر عشان يتحب

النهارده الاحد 28 فبراير 2010 الساعة 5.55 ص

فيها ايه دلوقتي مصر عشان يتحب 

فيها غش وفيها ظلم وفيها كدب 

فيها ناس بتدوس علي كل اللي فيها 

فيها خلق بياكلو بعض يحلو بيها 

فيها موت وخراب ديار والزيف ماليها
وفيها ناس ملهومش غير كلمة يارب 

فيها ضعف وفيها ذل في كل شئ 

فيها ظلم يخلّي شيخ منصر برئ 

فيها شباب مش لاقيه للاحلام طريق 

وفيها ناس ملهومش غير كلمة يارب 

فيها كراسي قاعد فوقيها ناس ولكن 

ماتت قلوبها وجوه منها الغدر ساكن 

ملّت خلاص من شكلهم كل الاماكن 

وفيها ناس ملهومش غير كلمة يارب 

فيها حق وفيها باطل زاد عليه 

فيها عدل معتقل مكسور عنيه 

فيها خير لكنه خير راحت عليه 

وفيها ناس ملهومش غير كلمة يارب 

فيها فرحة يوم فرحها عريسها مات 

فيها ضحكة بس ضحكة اوانها فات 

فيها ناس ساكنين مقابر السكات 

وفيها ناس ملهومش غير كلمة يارب 

فيها ايه دلوقتي تاني من الآلام 

فيها كتير بس انا خاني الكلام 

وخفت من كتر العدد يروح الابتسام 

واديني عايش مش لاقي غير كلمة يارب 

احم 

سلامو عليكو 

في مرة كنت قاعد بتكلم مع اخويا في الاحوال والدنيا 

وبعدين الكلام خد طابع سياسي شويه

وفضلنا نتكلم عن مصر واللي بيحصل فيها من اهمال او فساد

لحد ما لاقيت اخويا بيسألني سؤال غريب كده

قالي ... انت بتحب مصر يا عبده ؟؟؟؟

انا سكت شويه كده كده وكان المفروض ارد عليه واقوله لا 

دي بلد بنت تييييييييت وفيها وفيها 

بس لاقيتني بقوله طبعا بحبها وهو برضو قالي  انه مش لاقي غير الرد ده 

وبعد كده قعدت مع نفسي شويه وفكرت 

ياتري احنا بنحب فيها ايه 

غير بقي الكلمتين اللي قالهم حسين فهمي في فيلم مافيا 

هل فعلا فيه حاجات مادية ملموسة نقدر نتكلم عنها 

(طبعا بخلاف منتخب مصر الحاجة الوحيدة اللي بيترفع ليها علم مصر )

عموما انا فكرت وجبت شوية حاجات وحشة في مصر 

انا عايز اسمع منكو بقي الحاجات الحلوة بس 

ماشي ؟؟؟؟

فاصل ونكمل 

.........

انسان عادي