النهارده الاتنين 5 ابريل 2010 الساعة 11.01 م
احم احم
سلامو عليكو
اولا انا بجد انسان عادي وعادي جدا
مش مثقف بدرجة كافية اني اكتب في مدونة
او حد ياخد بكلامي
معنديش لغة قوية او اسلوب يشد الناس
عمري ما مشيت في مظاهرة ولا كنت عضو في حزب
بتأثر بسرعة جدا بكل الظروف اللي بتحصل حواليا
وممكن قوي كلمتين يولعوني وكلمتين برضو ينزلوني الارض
ندخل في الجد بقي
انا زمان لما كنت بتفرج علي الافلام الوطنية بتاعتنا
واشوف الرئيس جمال عبدالناصر بيحي الشعب
والناس فرحانة بيه وبتحبه بشكل جنوني
وكل ما تيجي سيرته مثلا قدام والدتي تفضل تحكيلي
يوم ما مات
بتقولي فضلنا نعيط عليه واحنا عمرنا ما شفناه
ولما بشوف اقتناع والدي بالثورة ورجالة الثورة مهما عملو بعد كده
ومهما حصل منهم
يقولي بس دول خرجو البلد من احتلال
عموما انا كنت بعذرهم وبقول ان الاعلام كان مكثف جهوده علشان يفهمهم كده
انا مش بقصد ان جمال والثورة كانو وحشين
بالعكس هما فعلا عملو تغيير جامد جدا
بس اقصد انهم خلفو سلبيات كتير والناس عدتها
زي ما بنقول كده الشعب بلعلهم الزلط
وقلت في عقل بالي كل الحكام بيعملو سلبيات كتير عشان الهدف الاسمي
احم احم عدوها عدوها
بس زمان الشعب كان بيحب الحكام عشان مكنش يعرف السلبيات دي
انما دلوقتي الدنيا مفضوحة وكل حاجة مكشوفة
وربنا يخلي الجزيرة اللي مستلمانا ومبتفوتش حاجة
وقلت ان ده سبب عدم حبي للريس (بدون ذكر اسماء)
لكن فيه منظر شفته زمان ايام الشيخ زايد الله يرحمه
ايام وفاته كنت شايف حزن الشعب بتاعه عليه بجد
كنت حاسسهم زعلانين
انا نفسي كنت زعلان عليه جدا
وكنت بقول فيه حاكم عربي كويس اهو وشعبه بيحبو
ساعتها بصراحة حسيت بغيرة فظيعة
طب ليه انا ميبقاش عندي رئيس بيخاف عليا وبخاف عليه
بجد كان نفسي في ده وقتها
نيجي لعلاقة البرادعي بقي بالموضوع ده
انا قبل كده كنت بسمع عن البرادعي قليل جدا
عادي يعني اه هو صحيح كان حد مميز جدا
ومصري ماسك منصب عالمي
بس مكنش فيه اي حب بيني وبينه عادي
مش زي زويل مثلا
وحتي بعد ما رجع والكلام كتر عليه علي انه هيرشح نفسه للرئاسة
يمكن بصراحة من شحنة الاحباط اللي جوايا مكنتش مصدق
انه ممكن ياخد الخطوة دي
خصوصا انه راجل دماغه كبيره وعارف ان الكلام ده مش سهل
المهم فضلت العلاقة باردة بيني وبينه لحد ما حكومتنا العزيزة
قربت الوصال بينا وبدأت تحاربه
بدأت انا كمان اخد بالي
طب هما بيحاربوه ليه ؟؟؟؟؟
هوممكن فعلا حد يجي ويهز كرسي العرش بتاع الريس
بدأت افكر وبدأت كمان اقتنع انه ممكن يحصل حاجة
ساعتها بقي بدأت اذاكر البرادعي
وعشان انا علي نياتي زي كل المصريين (الا من رحم ربي)
صدقت كل الكلام واقتنعت بيه وايدته
والبركة في حكومتنا العزيزة
واملي الاخير في الدنيا اني احب الرئيس
او الرئيس يبقي اللي انا بحبه
وربنا يدينا ويديكو طولت العمر واشوف اليوم ده
فاصل ونكمل
......
انسان عادي
هناك 5 تعليقات:
بجد وربنا انت كل مره بتتكلم بصوتى :D
نفسى احبه انا كمان يا شيخ :D
بغير اوى بردو لما الاقى فى بلاد تانيه بيحبوا الريس بتاعهم
طب اشمعنا احنا مش كده
بس فى حكايه الحكم دى بصراحه
بحس انى مقتنعه جدا بحكايه اللى تعرفه احسن من اللى ماتعرفوش
وانا للاسف زيك قبل ما تثقف نفسك وتقرأ عن البرادعى
ماعرفش عنه كتير
ومش بشجعه ولا حاجه عشان سايبه الحكايه دى وقت الانتخابات لان الواحد مايعرفش بكره هيحصل ايه والا هو هيعمل ايه
لو اتحارب فا هو اتحارب عشان الحكومه حست انه عمل جذب للشعب وخصوصا الشباب عشان يأيدوه
وده اللى خوفهم مش اكتر
دينا خدت اول رد يا خساره
معلش فى بيتها بردو ماهى اختى :D
نيجى بقى للحج البرادعى اولا كلمه دينا صح اللى نعرفو احسن من الىل منعرفوش
وبعدين يا بودى البرادعى ده متربى فى امريكا وعاش هناك
يعنى سلوكياته عمرها ما هتكون زى سلكويتنا ولا افكاره زى افكارنا
وكمان قريت انه عاوز يخلى دين الاسلام دين متحرر
ال متحرر ال
يعنى ايه متحرر دى
يعنى مثلا حجاب حد واربع ومايوه اتنين وخميس مثلا ولا ايه؟
ده انسان مصرى فى البطاقه وبس
لكن عمره ما كان متربى وسط البلد دى ممكن يكون فعلا شرب من نيلها لكن النيل مجريش جوه دمه
ممكن اللى يقرا كلامى يقول انى بكدب او بحور او بمثل وبقول كلام افلام
لكن لا والله
كل الحكايه انى بحب حسنى مبارح
اه حاجات كتير غلط فى البلد وهو سبب من اسابها بس يا جماعه مننساش اللى عملو عشان البلد دى قبل ما يبقى رئيس وبعد ما بقى رئيس ومين عارف مش يمكن لو كان حاكم دى حاكم البلد دى ممكن يكون كان سلمنا زى ما عرفات عمل فى فلسطين
اول ممكن يكون كان عمل زى الشيخ زايد زى ما بتقول يا بودى
بس نرجع ونقول الحمد لله اننا احرار مدخلش بلدنا اسرائليين واحتلونا
وبردو هقول نفسنا نحكى ونتحاكى بيك يا ريس
ومننكسفش واحنا بنقول رئيسنا محمد حسنى مبارح هنعيش بنحبو ونموت بنحبو
وفى النهايه بقول انا مصريه يعنى مصلحت بلدى من مصلحتى
واللى فيه الخير ربنا هيقدمو
وهانت كلها فتره والانتخابات تبدأ وكلنا اكيد مع حسنى مبارح
وناييييس بوست يا بودى
يلهوى انا كتبت كل ده تيب والله ايدى مش وجعتنى
طبعا عشان بكتب كلام طالع من قلبى :$
بنت من الزمن ده
اولا ازيك يا دينا يارب تكوني كويسة ؟؟
انا معاكي اللي تعرفه احسن من اللي متعرفوش
بس ده لما تكوني خارجة تشتري شنطة ولا جزمة او حتي هدوم
الاحسن يعني انك تروحي محل عارفاه وواثقة فيه عشان تبقي مطمنة وانتي بتشتري
لكن فيالسياسة الحال مختلف
انا ارشح اللي ممكن يخدمني اكتر
زي ما بيقولو هما ... مصلحتك اولا
ايون انا يهمني مصلحتي
يبقي اللي يقدر يحققلي كل طلباتي يبقي الافضل ويستاهل صوتي
نبص بقي علي الواقع
عندنا الرئيس مبارك بقالو تلاتين سنة ريس
ايه اللي حصل ؟؟؟؟
ولا حاجة
التعليم اتنيل اكتر من الاول
الاقتصاد بقي زبالة
البطالة كل يوم بتزيد ودول عايزني اخد بكالريوس هندسة واشتغل عامل خراطة مع احترامي للعمال طبعا
ده حتي سمعتنا اللي كانت كل الدول العربية بتحلف بيها باظت
وكل الناس بقو يكرهونا
مين السبب في ده كله
مش هو السبب؟؟؟ اهو ده اللي احنا نعرفه
اما بقي اللي منعرفوش
الراجل جاي وبيقول يا جماعة انا دلوقتي مش بعمل حملة دعائية للانتخابات
ده بيجع توقيع من الشعب عشان الدستور يتغير
ويلغو قانون الطوارئ
وبعد كده ليك مطلق الحرية في الاختيار
لكن لو فضل الحال علي كده مش هيبقي فيه قدامنا فرصة للاختيار
وهيبقي غصب واقتدار
عموما شكرا ليكي علي ردك وتفاعلك مع الموضوع
واتمني ان اللي يمسك الاصلح منهم ان شاء الله
وربنا اعلم باللي في القلوب
شكرااااااااا
نيرة
ازيك يا نونا منورة
برضو نفس الكلام
انتو ايه حتي دماغكو شبه بعض
ربنا يخليكو لبعض يارب
بصي يا نونا
احنا مش هيفرق معانا البرادعي متربي فين
مع اني واثق انه مصري زيي زيك ان مكنش اكتر
بس دلوقتي رئيس الجمهورية ده ايه
في الاول وفي الاخر هو موظف بيحكمه شويه قوانين
الا وهي الدستور
اللي يهمنا فيه انه يكون انسان محترم
عنده عقليه سياسية قادرة علي العبور
بس العبور للمستقبل بقي مش العبور اياه اللي ذلنا بيه
اما من ناحية الاسلام متخفيش
اللي بيحمي الاسلام في الارض مش حسني مبارك ولا الاخوان المسلمين
ولا اي حد
اللي بيحمي الاسلام ربنا
وهو قادر انه ينصره
اتمني بس تقعدي مع نفسك كده وتشوفي انتي عايزة ايه من مصر ومن رئيس مصر
واحسبيها بالورقة والقلم
واللي هيحققلك طلباتك دي رشحيه
وكده يبقي عداكي العيب
بس كوني واثقة ان صوتك له قيمة وهيفرق كتير
مرسي يا قمر علي تشريفك
ومبروووك تالت
ههههه
إرسال تعليق