اللي طلع قدام يبعت .... لو سمحت

النهارده السبت 27 مارس 2010 الساعة 1.02 ص

وحياتك يا استاذ تطلع شويه قدام ايون انت 

هو المكان ده فيه سكر يعني 

اطلع قدام الناس هتقع ع الباب 

ايوه اللي طلع قاد يبعت 

وحاسب ورا كعب عالي 

...........

احم احم 

سلامو عليكو 

طبعا الكلام ده يلزمه موسيقي تصويرة مكونة من 

رغي البني ادمين وكلاكسات العربيات بالاضافة الي 

صوت اجزاء الاتوبيس اللي بتخبط في بعضها مع كل مطب 

او حتي من غير مطبات كفاية انه ماشي في شوارع مصر المحروسة 

طبعا بطل اللقطة دي هو كمسري الاتوبيس 

وهو بيرص الطوب .....

قصدي بينظم الركاب عشان علبة السردين او الاتوبيس يعني 

يبقي فل " وفل هنا مش زهرة الفل الفل ده يعني full" 

احم احم ثقافة بقي 

الهدف بقي من اللقطة دي ايه ؟؟؟؟؟

سيبك من احتقاري لنفسي واحساسي ان انا مش بني ادم 

وانا موجود جوه علبة السردين دي 

وسيبك من الوقت الخرافي اللي بيروح وانا جوه العلبة 

انا عاوزك تركز مع البطل الكمسري 

والمجهود الجبار اللي الراجل ده بيعمله عشان يلم الاجرة من الركاب 

وازاي مفيش بني ادم يقدر يزوغ منه في وسط الهيصة دي 

وازاي بيقدر يستحمل الدوشة والزحمة والحر والخنقة 

وكل الهموم اللي كل المصريين فيها 

جمع كل ده في دماغك 

طب لو الكمسري ده كمسريه (يعني لو واحدة ست اشتغلت كمسري )

والله انا لحد دلوقتي مشفتهاش 

هي صحيح الست اشتغلت حاجات كتير مكناش متخيلنها فيها 

زي سواق تاكسي وسواق نقل تقيل 

وحاجات تانية كتير

لكن معرفش ليه وقفت قدام الكمسري ده ومقدرتش اتخيلها 

اعتقد انه صعب ان مكنش مستحيل 

تفتكر لو ده حصل هيبقي الوضع ازاي 

وياتري الاتوبيسات هتفضل بالزحام ده ؟؟؟؟؟

ولا الزحام هيقل ؟؟؟

انا عن نفسي اعتقد انه هيزيد 

دانا هحب الاتوبيسات قوي 

ههههههههههههه

فاصل ونكمل 

.....

انسان عادي 

من علية السردين