رحلة الفشل 2

النهارده السبت 27 فبراير 2010 الساعة 12.12 ص

احم .. سلامو عليكو

هنكمل النهارده الجزء التاني من رحلة الفشل



بالمناسبة ويمكن ده خفف شويه من الحالة دي

انا كنت اياميها شغال في شركة امن كنوع من احساسي

اني مش عايز احمل والدي حملي وانا فاشل كده

المهم كان معايا في الشغل ده اتنين واحد اسمه سعيد ده كان



اصغر مني

و كان معاه دبلوم تجارة بس كان هو الاقدم في الشغلانة دي

وكان هو الخبرة يعني والتاني اسمه عماد ده اشتغل بعدي

بالنسبة لعماد ده بقي اولا كان  عنده تقريبا 26 سنة

وكان متجوز ومخلف بنت ومكنش متعلم خالص

يعني كان يعرف يكتب اسمه بس ميعرفش يقراه اتعلم يرسمه يعني

وكان مرتبه زي مرتبي بالظبط كان 283 جنيه

المرتب ده كان يدوب بيقضيني مواصلات ومصاريف

وقليل لما يفيض منه حاجة وانا بطولي مش معايا حد

اللي كان محيرني ازاي عماد بيقدر يظبط نفسه علي العيشة بالمرتب ده

واللي كان يشوفه كان يقول عليه مرتاح جدا

دايما بيضحك وفرحان مفيش حاجة علي باله

بجد انا كنت بحسده علي حالته دي

الهدف من قصة عماد دي ان انا في الوقت ده طبعا كنت ضايع

زي ما قولت وبجد من كتر الحيرة والتوهان اللي انا كنت فيهم

هانت عليا كل السنين اللي درستها وقلت هيجري ايه لما اعيش

زي عماد ده ماهو زي الفل  اهو وباله رايق ولا شايل للدنيا هم

انا ايه اللي يخليني اتعب نفسي دراسة ومصاريف وفي الاخر اسقط سنتين ورا بعض

بجد كانت ايام سوده

اصعب لقطة بقي في الموضوع ده لما بقي

خلاص المفروض اقول لابويا علي النتيجة

انا  قولتله بعدها بتلات ايام الله اعلم التلات ايام دول

عدو عليا ازاي مفتكرش ان انا بصيت في عنيه خالص

ولا كنت بحاول اتكلم معاه ولا مع أي حد طبعا

انا كنت بروح الشغل بالليل وكان شغلي 12 ساعة

اجي الصبح افطر

وانام ولما اصحي احاول اضيع وقت باي شكل

لحد ما يجي  معاد الشغل

وهكذا بس لما اتزنقت بقي وبقي لازم اقوله جالتلي فكرة

قولت اكتبله جواب واقوله كل اللي انا عايز اقوله

عشان ابعد عن المواجهة عشان انا اصلا

بتقتلني النظرة اكتر من الكلمة

وفعلا كتبت الجواب بعد ما تعبت جد في كتابته

لاني مكنتش لاقي حجه اقولهاله او حاجة تهون عليه شويه

ولما غلب حماري قولتله المعلومة وخلاص

" انا سقط " وخلاص بقي

وحطيت له الجواب جنب الورق بتاعه والمحفظة

واللي طبعا هياخدهم معاه وهو رايح الشغل الصبح

المهم حطيت الجواب ومشيت انا ع الشغل باللبل

وجاي الصبح مستعد للكلام بقي ولما جيت لاقيت ابويا لسه نايم

مش معقول ده اتاخر علي الشغل

سالت والدتي هو بابا مش هيروح الشغل ؟؟

قالتلي لا ده النهارده اجازة !!!!!!!

طبعا انا لاكنت داري باجازة ولا بنيلة

انا كنت في دنيا تانية اصلا لا بعرف النهارده ايه ولا انا فين

وبقي خلاص مفيش غير حل واحد هو اني اقوله بنفسي

فجينا واحنا بنتغدي سألني ع النتيجة عشان كان فيه ناس

صحابي نتايجهم ظهرت وكده المهم سألني مردتش

سألني تاني فقلتله سقت بس وانا طبعا وشي في الارض

وصوتي رايح ومعرفش ان كان سمعني ولا لا

ولاهو كان عارف اصلا

عشان اكيد انا كان باين عليا اصلا اني عامل بلوة كبيرة

المهم هو رد عليا بكلمة واحدة بس قالي  "  تاني ؟؟؟  "

الكلمة دي لما سمعتها منه انا كان هاين عليا الارض

تنشق وتبلعني

ولا اني اسمع نبرة صوته دي وكمية الحزن اللي كانت فيها

المهم الايام في الوقت ده بقت تعدي كده شغل ونوم

ومش نوم قوي يعني انا كنت باجي من الشغل ادخل اوضتي

علي اساس ان انا هنام وادخل اقعد لوحدي

وافضل طول النهار في الاوضة لحد ما اخرج للشغل تاني

لا كنت بكلم اخواتي ولا اصحابي ولا أي حد وكذلك برضو في

الشغل مكنتش بكلم حد

زي ما تقولو كده خلاص مبقتش عايز حاجة من الدنيا وحاسس

كمان ان الدنيا مبقتش عايزاني


فاصل ونكمل


...........

انسان عادي