ثورة الغضب المصرية التانية

احم احم

سلامو عليكو

يوم التلات 25 يناير 2011 كنا نازلين في شوارع مصر كلها 

ضد الفساد والتعذيب 

وكنا بنطالب بالحرية واليمقراطية والعدالة الاجتماعية

لا كان فيه محاكمة مبارك ولا العادلي ولا اي حاجة من الكلام ده 

ونظرا للاهمال اللي اتقابلت بيه مظاهرات يوم 25 يناير

قررنا اننا ننزل يوم الجمعة 28 يناير (جمعة الغضب) 

عشان نقولهم ان احنا لينا صوت ورأي ومش مهمشين 

وعلي الاقل لازم نتسمع 

المهم انا مش بحكي الاحداث 

كلنا عارفين الاحداث كويس 

انا عايز بس افكر الناس احنا كنا نازلين ليه في الاول 

وكانت مطالبنا ايه 

وبعد كام يوم ازاي المطالب دي اتحولت وكبرت بطريقة كبيرة 

لما حسينا ان مفيش حد مهتم بكلامنا 

كنا بنشتكي من فساد الشرطة ..... بقينا نطالب بمحاكمة وزير الداخلية 

اداء الحكومة مكنش علي المستوي المطلوب 

طالبنا بتغيير الحكومة 

طالبنا بتنحي رئيس الجمهورية 

ومش بس كده 

طالبنا  بمحاكمة رئيس الجمهورية 

انا بس بحاول استعرض معاكو ازاي المطالب بتتطور بسرعة 

نظرا لاهمال النظام في التعامل معاها 

بس كتير مننا اعطي النظام السابق العذر في المعاملة دي 

وقولنا اتفاجئو من اللي حصل 

ومكنوش متوقعين ان ممكن الشعب ده يطلعلو صوت 

الكلام بقي دلوقتي موجه للحكومة اللي ماسكو دلوقتي وللمجلس العسكري 

ليه مش عايزين نتعلم من اللي حصل 

ليه بنسيب الامور تتطور وتخرج عن السيطرة 

طالما في ايدنا الحل وعارفين ايه اللي يتعمل ساكتين ليه 

باقيين علي مبارك ليه 

ليه محسسنا ان له ديول موجودة في البلد وليها سلطة 

دا احنا كنا بتريق علي الرئيس الليبي والسوري انهم متعلموش من اللي حصل في مصر وتونس 

ليه احنا كمان مبنتعلمش من اللي بيحصل عندنا 

انا مع ثورة سلمية تانية 

للتأكيد علي مطالب الشعب ومطالب ثورة 25 يناير 

اللي هي الحرية والديمقراطية والعدالة الاجتماعية 

مش محاكمة مبارك وعصابته 

اصل دي المفروض مش محتاجة ثورة عشان نطالب بيها 

ده  امر بديهي وطبيعي 

واحد عمل فينا البدع سرقة وقتل  ونهب وترويع وتعذيب واضطهاد  و .....

وبلاوي تانية كتيييييير قوي 

اللي زي ده نبقي عليه ليه 

وليه نخليه يبقي السبب في فساد ثورتنا 

المجلس العسكري والحكومة المصرية 

اعلنو حسن النوايا وحاكمو المجرم محاكمة عادلة 

انا مع الثورة السلمية قلبا وقالبا 

لكن احتراما للجيش طبعا مش هنزل الشارع حتي لو كنت فاضي 

مع اني نزلت المرة اللي فاتت بس اعتقد الوضع مختلف دلوقتي 

نيجي بقي لحتة المجلس الرئاسي 

انا مش فاهمها قوي 

الناس طالبت بالحكاية دي عشان خايفة من الجيش 

ولا عشان اداء المجلس العسكري مش كويس

بصراحة انا مش قادر اخد قرار في الموضوع ده 

وشايف تنفيذه هيبقي صعب شويه 

لان فعلا الجيش ماسك البلد دلوقتي 

واعتقد متحكم في كل حاجة 

والمجلس اللي هيجي هيبقي سلطته مدنية وعسكرية ؟؟؟

ولا مدني بس

يعني هنقسم البلد نصين المجلس الرئاسي يحكم الشعب 

والمجلس العسكري يمسك الجيش 

؟؟؟؟

ولا المجلس الرئاسي هيبقي له سلطة علي المجلس العسكري 

انا شايف انها ملخبطة ومليانة حوارات 

انا مع انتخابات رئاسية في اقرب فرصة 

مع استمرار المجلس العسكري بتدوير شئون البلاد 

ومع مراقبة الشعب (يعني لا مجلس ائتلاف الثورة ولا الاحزاب ولا الاخوان )

مراقبة الشعب لاداء المجلس 

والتحرير موجود 

سلامو عليكو

اول يوم ظابط

احم احم

سلامو عليكو

ازيكو يا بني ادمين يا غاليين عليا

انا جايلكو النهارده عايز احكيلكو قصة اول يوم ليا وانا ظابط

والمرمطة اللي شفتها وانا رايح الوحدة 

اولا كنت مسافر يوم خميس بعد الظهر 

الجو كان حر جدا 

كان معايا شنطتين 

والاهم من ده كله مكنتش عارف الوحدة فين بالظبط 

المهم خرجت من بيتنا وبدأت الرحلة وبعد تلات ساعات في المواصلات 

وصلت العبور 

علي فكرة في الظروف العادية من بنها للعبور بتاخد ساعة او ساعة ونص يعني بالكتير

طبعا مكنتش عارف انا هنول فين بالظبط 

فسألت واحد كان واقف بتاكسي وصفلي بوابة هدخل منها 

هي علي بعد 10 كم تقريبا من المكان اللي انا كنت واقف فيه 

وقفت نص ساعة كده ولقيت مكروباص جاي وركبت معاه 

والرجل نزلني عند البوابة اللي قولتله عليها 

المهم وانا لسه يدوب بره قابلت صول وسالته عن الوحدة بتاعتي 

هي موجوده هنا او قريبه يعني من المكان ده 

قالي اه ادخل علي طول بعدين هتكسر يمين 

طبعا كانت الساعة تقريبا دلوقتي كده 4 ونص بعد العصر 

المهم دخلت وقابلت الامن اللي علي البوابة وسالتهم نفس السؤال 

بس للاسف محدش كان يعرف فيهم 

هما كانو سامعين عنها بس هي فين بالظبط مش عارفين 

فضلو يسألو بعض وقالو نفس الكلام ان هي موجودة جوه بس بلاش تمشي 

عشان المسافة هتبقي كبيرة  شويه واستني اي عربية داخلة 

انا قلت ماشي 

وجت عربية كانت خارجة تجيب حاجات للكانتين 

هي عربية نقل كده ومتقفلة من ورا 

ركبت ورا زي ال .......... ما علينا 

الهربية مشيت تقريبا بتاع 10 دقايق كده وقالولي يا فندم سيادتك 

هتكمل علي طول بقي عشان احنا هنحود هنا 

قلت مفيش مشاكل 

انا قلت في عقل بالي العربية خدت 10 دقايق وتقريبا زي ما قالولي دي تص المسافة 

يعني انا همشي مثلا نص  ساعة 

ومكنش فارق معايا لان الجو اصلا كان بدأ يحلو عشان كنا قربتا علي المغرب 

المهم قررت امشي وفعلا بدأت 

وبعد نص ساعة تقريبا قابلتني اول بوابة لاول وحدة علي الطريق 

فرحت وقولت ياااااه الحمد لله وصلت 

سألتهم علي البوابة هي دي وحدة ............. قالولي لا يا  فندم 

وبرضو فضلو يسألأو بعض ويتشاورو في الامر 

ورجعو قالولي انت هتكمل مشي علي طول لحد ما توصل  لبوابة  ......... وحود يمين 

وهتلاقي الوحدة بتاعتك هناك في المكان ده 

انا قلت ماشي وكملت 

ودي كمان خدت معاها كمان نص ساعة مشي 

ولما وصلت سألت تاني برضو عشان اتأكد وكان الرد ايجابي 

قلت كويس وكملت طريقي 

واخدين بالكو معايا انا ماشي بشنطتين ها ؟

في الوقت ده تقريبا كان المغرب اذن 

اه نسيت اقولوكو حاجة 

الطرق اللي انا ماشي فيها دي كلها صحرااااااء 

لا مية ولا نور ولا حد بيمشي فيها 

هي اخرها انها متسفلته بس 

المهم خدت الطريق ده علي طول زي ما قالولي 

وفي الطريق ده ضربتلي بتاع ساعتين ماشي 

طبعا المغرب كان اذن والعشاء اذنت والجو ضلّم وانا ماشي 

المشكلة الاكبر اني مكنتش بقابل حاجة علي الطريق 

او حد اتاكد منه انا ماشي صح ولا لا

انا ماشي وخلاص ومش عارف انا رايح فين 

 وكمان انا مكنش معايا لا مية ولا اكل مكنتش فاكر ان انا طالع سفاري بصراحة 

المهم بعد الساعتين دول وصلت لوحدة كده علي الطريق كده 

كنت شايف نورها من بعيد 

الوحيدة اللي لقيتها يعني 

رحت عليها وسألتهم برضو عن الوحدة بتاعتي 

جالي صول محترم كده 

وده الوحيد اللي كلمني بصراحة 

اول ما قلتله اسم الوحدة لقيته استغرب كده وقالي ايه ياباشا الي جابك من هنا 

ده انت المفروض تنزل عند مش عارف فين 

ووصفلي حاجة تانية خالص 

بس الكلام ده كان من الاول طبعا 

هو كان بيقولي ارجع وامشي علي الوصفة بتاعته 

انا قلتله مستحيل ارجع اللي مشيته ده تاني 

ده انا لو هموت في الصحرا دي مش راجع 

قولي اوصل ازاي 

قالي يا باشا دي هتاخد منك ساعتين مشي 

طبعا الكلمة نزلت عليا كالصاعقة 

ساعتين تاني ؟؟؟؟

انا اصلا كنت تعبت بجد بدنيا ونفسيا 

خلاص يعني كنت خلصت 

قولتله في حل تاني ؟؟؟

قالي لا 

قولتله خلاص اوصف 

المهم قالي همشي ازاي وهيقابلك ايه في الطريق 

شكله كان دارس المنطقة يعني

المهم شكرت الراجل ولميت شنطي ومشيت 

الجو ضلمة .......

وانا عطشان وجعان  .......

وتعبان بدرجة كبيرة جدا ........

وفي نفس الوقت سامع اصوات غريبة حواليه 

المشكلة فعلا ان انا مكنتش خايف معرفش ليه 

يمكن التعب وحلم الوصول (مش الوصول لكاس العالم) كانو مسيطرين عليا 

ومش مديني فرصة افكر في اي حاجة تانية 

في الليلة دي جه عليا وقت قلت ايه اللي بيحصلي ده 

كان كتير عليا قوي 

بتاع خمس او ست ساعات مشي متواصل مع اول يوم ظابط 

كانو كتير عليا 

وده كان كافي يديني الانطباع الاول عن الجيش 

في المرحلة الجديدة 

عموما بعد رحلة الشقاء  دي وصلت للوحدة الحمد لله

يلا بقي اسيبكو دلوقتي 

ونلتقي في مغامرة تانية 

باي باي

Back

احم احم 
سلامو عليكو 


ازيكو يا بني ادمين ايه اخباركو 
انا تقريبا دلوقتي بقالي بتاع 5 شهور ما دخلتش علي المدونة 
وكنت تقريبا نسيتها 
بس انا كل لما ببقي مخنوق او مضايق ومش بلاقي حد اكلمه 
باجي هنا 
بحس انها صاحبي اللي كل ما احتاجه بلاقيه 
المهم مش عايز انكد علي حد 
انا جاي اطمن عليكو واسلم بسرعة كده عشان عندي جيش 
مش فاضي بقي 
كنت ايز بس اقولكو اني خلاص يوم التلات اللي جاي 
هتخرج من كلية الضباط الاحتياط وهبقي ظابط بجد 
عشان كده غيرت اسم المدونة
يعني زي نيولوك كده 
انا بحب التغيير 
اا كانت مصر كلها اتغيرت جت يعني علي اسم المدونة بتاعتي 


المهم بقي قولولي مبروك وادعولي 
وبما اني هبقي ظابط بقي عايز اطلب منكم طلب 
الطلب لاخونا المتظاهرين اللي كنت واحد منكم قبل ما ادخل الجيش 
امانة عليكو ما تعاملوش الجيش زي الشرطة  
الجيش بيحارب في اكتر من جبهة 
وكمان هو مش متعود علي المواجهة المباشرة مع المدنيين 
وكمان الجيش مفيش في ايده عصاية 
ده سلاح واحنا بشر 
هو صحيح مفيهوش خيرة ومنظر علي الفاضي 
بس برضو احترمو ان دول بشر 
وجهو كلامو للي يقدر ياخد قرار 
الظابط اللي في الشارع ميقدرش يعمل حاجة غير انه يحافظ علي الوضع امن وبس 
انا بقول كده عشان اولا بحب مصر 
ثانيا صحابي نازلين الشارع والله اعلم انا كمان هنزل ولا لا 


يلا بقي عشان مسافر اتمني ليكم حياة سعيدة 
واتمني مستقبل احسن لمصر 


سلامو عليكو

خطبة العيد سياسية بحتة لاول مرة

النهارده التلات 16 نوفمبر 2010 الساعة 6.18 م 

(اول ايام عيد الاضحي )

احم احم 

سلامو عليكو 

ازيكو يا بني ادمين يا مدونين يا حلوين 

عاملين ايه من غيري ؟؟؟

اولا كل سنة وانتو طيبين بمناسبة عيد الاضحي 

وربنا يوعدنا جميعا بالوقوف علي جبل عرفة ويرزقنا حجة مقبولة يارب

* طبعا انتو عارفين اني دخلت الجيش ضابط احتياط تلات سنين وفعلا بدأت فترة الخدمة العسكرية من يوم 21 اكتوبر 2010 وقضيت 25 يوم في كلية الضباط الاحتياط في الاسماعيلية ونزلت اول اجازة يوم الاحد اللي فات ده وتمتد الاجازة لحد يوم الجمعة 

* حالتي النفسية شغالة يعني مش سيئة يمكن كنت تعبان شويه في اول يومين تلاتة بس لما فهمت الليلة ماشية ازاي خلاص اتعودت وكيفت نفسي عليها والحمد لله احنا احسن من غيرنا 

* طبعا انا كان نفسي افضل احكي معاكو بقي علي احوالي في الجيش بس المفروض ان ده ممنوع وغير مصرح فيه اني اطلع اخبار الوحدة بتاعتي بره طبعا ده كلام بس انا بما اني فرد في القوات المسلحة حابب التزم بالقوانين دي 

اشطة ؟؟؟

ندخل بقي الموضوع اللي انا عايز اتكلم فيه النهارده وهو خطبة العيد

لاول مرة تقريبا اسمع خطبة سياسية بحتة بالطريقة دي 

يمكن عشان موسم الانتخابات بقي وكده

المهم عنوان الخطبة كان : 

الاصلاح طريق التغيير وليس العكس 

طبعا هي في الاول وفي الاخر وجهات نظر ويا نتفق يا نختلف 

اولا بس عايز اوضح نقطة هي ان الشيخ اللي كان بيخطب المفروض انه محسوب علي الاخوان المسلمين يمكن مش بطريق مباشر بس هو محسوب عليهم 

ندخل جوه الموضوع بقي

طبعا في الفترة الاخيرة وخصوصا بعد ظهور البرادعي علي الساحة السياسية وظهور الحركة الوطنية للتغيير الناس كلها تقريبا بقت تتكلم علي التغير وبتطالب بيه كمان 

التغيير في كل حاجة تغيير نواب الشعب في الانتخابات 

وتغيير الحكومة الفاسدة (من وجهة نظر البعض )

وتغيير رئيس الجمهورية 

يعني ممكن نقول انها بقت موضة التغيير 

اتفجأت بقي النهارده من الشيخ (اللي انا بحبه وبحترمه جدا جدا وبثق في رأيه جدا)

اتفجأت من معني الكلام في الاول حسيت ان احنا كنا ماشيين في الطريق المثالي (علي حسب ظننا يعني)

وفجأة جه واحد يقولك الطريق ده غلط 

انا عايز اوضح بس الاول وجهة نظره 

هو قال اننا عشان نتغير من عصر الفساد اللي احنا فيه لعصر اقوي لازم يحصل تغيير

بس التغيير ده مش معناه تغيير الحكومة او الرئيس 

مش ده اللي ممكن يعمل نهضة او اصلاح 

قال ان الحكومة بتكون مرآة للشعب 

يعني لو الشعب كويس صورته في المراية هتكون كويسة 

ولو الشعب مش كويس وفيه سلبيات برضو الصورة في المراية هتكون وحشة 

وفيها نفس السلبيات دي 

حتي لو احنا غيرنا المراية دي مليون مرة من غير ما نغير الاصل 

الصورة هتفضل هي هي مش هتتغير

وقال ان الحل الامثل هو تغيير الشعب لنفسه 

يعني بدل ما تضيع الوقت والمجهود في انك بس تدعي علي الحاكم الظالم 

او حتي تحاول انك تغيره 

ركز المجهود والوقت ده في تغيير نفسك للاحسن وكمان حاول انك تغير اللي حواليك 

من اسرتك لاصحابك واخواتك يعني والبيئة بتاعتك 

ثمرة تغيير نفسك واللي حواليك هتبان اكتر واسرع من تغيير الحكومة والرئيس 

وقال كمان معلومة 

ان التغيير مرهون علي الحكومة والشعب مع بعض 

بس بنسب مختلفة 

يعني الحكومة مهما كانت قوية متقدرش تغير اكتر من 20 % اما الشعب فهو عليه ال 80 % الباقيين 

ده باختصار موضوع الخطبة 

المشكلة بقي مكنتش موضوع الخطبة 

لانها في الاول وفي الاخر وجهة نظر ممكن تقتنع بيها وممكن لا

انما النقاش اللي حصل بعد الصلاة بيني وبين بعض الناس كان علي موقف الشيخ نفسه 

ناس قالت الشيخ بقي حزب وطني علشان قال نغير نفسنا قبل ما نغير الحكومة 

وناش تانية فهمت كلامو بطريقة تانية 

قالو ده هو كده بيدعي للتغيير بشكل اقوي لانه قال لازم التغيير يكون نابع من الشعب 

يعني كل الشعب يكون عايز التغيير ده ويطالب بيه 

يعني يكون التغيير مطلب جماهيري لل 80 مليون مصري

يعني اختلف رأي الناس عليه 

وطبعا فيه ناس اصلا مفهمتش حاجة من الكلام اللي اتقال ويمكن يكونو مش عارفين اصلا تغيير ايه اللي هو كان بيتكلم فيه 

بالنسبالي انا بقي انا واثق في الشيخ جدا ورأيه بيمثلي حاجة كبيرة 

واللي لفت انتباهي اكتر هو جرأته في عرض الموضوع ده في الوقت ده 

وفي خطبة عيد يعني اكبر تجمع ممكن للناس اللي في بلدنا

والجرأة دي بتتحقق علي اختلاف الاراء 

يعني لو هو بقي وطني فالجرأة انه يعلنها في الوقت ده قدام الناس دي كلها 

ولو هو معارضة فالجرأة طبعا اكبر 

شكرا ليكم واشوفكم علي خير بقي في الاجازة اللي جايه ان شاء الله لو كان لينا عمر 

ادعولي ارجوكم ربنا يعدي الايام دي علي خير 

فاصل ونكمل

.............

انسان عادي

سؤالات ؟؟؟؟؟؟؟؟؟؟

النهارده الاربع 22 سبتمبر 2010 الساعة 12.53 م 

مبحبهاش ؟؟ بحبها ؟؟

يا هل تري هو الكلام ده يهمها  ؟؟

فعلا بيفرق عندها ؟؟؟

يعني بتسأل لما اغيب انا  عنها ؟؟؟

ولا لما بنجرح جرحي ده بيهزها ؟؟؟

بيبان عليها في شكلها ؟؟

دمعت مرة عشاني وانتو شفتو دمعها ؟؟

حسستكو مرة اني حاجة غالية في قلبها ؟؟

يعني جت سيرتي في كلامها ؟؟

ولا شافتني في منامها ؟؟

ولا هز صوتها اسمي زي ما بيهز قلبي اسمها ؟؟

احم احم 

سلامو عليكو 

انا مش هعلق علي كلامي  اللي انا كتبه 

ده كان احساس وطلع وخلاص 

انا بس عايز اطمنكو عليا عشان من زمان مدخلتش 

انا بعد ما اتخرجت الحمد لله 

كشفت في الجيش وقبلت في الجيش ظابط احتياط 3 سنين 

اعتقد كده بانت شويه انا مكنتش بدخل ليه 

ههههههههه

وان شاء الله هروح الجيش يوم 20 اكتوبر 2010

مش محتاج الايام دي والايام اللي الجاية اكتر من دعواتكو 

وحشتوني جدا جدا 

كلكم فرد فرد 

يارب تكونو انتو كمان بخير واحسن حال 

طمنوني عليكم 

ومتزعلوش مني لما متلاقونيش 

يلا اشوفكم علي خير 

انسان عادي سابقا 

مسجون احتياطي حاليا 

فاصل والله اعلم هنكمل ولا لا

سلامو عليكو

بعد الغياب

النهارده الاربعاء 25 اغسطس 2010 الساعة 5.51 م


احم احم
سلام عليكو

عايز ارجع بقي يا جماعة

حد يشد ايدي

والله مش عارف اكتب

زهققققققققققققققققققققققققققققققققققققققت

صورة ع الفيس بوك

النهارده الاتنين 19 يوليو 2010 الساعة 5.44 ص

صورة ع الفيس بوك

كنت عالفيس بوك بضيّع وقت بصراحة في ليلتها

ما كانش فيه في دماغي حاجة تانية أعملها ولغيتها

وقلت أفسبك قبل ما افتح سكة الانحراف غايتها

بس يظهر إني لما جيت أكحلها عميتها

ومهما أروح في أي حتة الشيطان يبقى محاوطها

أصلي شفت واحدة مزّة ايدي ببراءة اختارتها

حاطة صورة جامدة جدا قال كمان بتقول صورتها

لبس فاضح كله واضح بس فيه مناطق داريتها

تحت منها كان فيه ألف كومنت فـ سيرتها

تلميح صريح وكلام أبيح عنها واللي خلفتها

بس صورة من جمالها تقول ساعتها

لو كنت بس الكاميرا دي اللي صوّرتها

ولا حتى انشالله اكون استيك ساعتها

نفسي ابقى خياطة في قماشة جيبتها

ولا توكة في الحزام اللي رابطها

ولا متر ترزي يوم ما راحت ديّقتها

ولا حتى بلوزة بس في يوم قاستها

ان شاالله تكون لبستها مرة وغيرتها

ياريتني كنت كعب جزمة دوبتها

ولا حتى عقد فالسو في رقبتها

ولا دبدوب قبل نومها بتدفنه وسط دراعتها

وابقى نايم جنب منها فوق سريرها وملايتها

نفسي أبقى بونبوناية فوق لسانها استطعمتها

ولا حتى شوكولاتاية بين سنانها دي نهايتها

بس دابت عالشفايف لما لمستها وداقتها

ولا حتى ابقى قطة في يوم راعتها

وياما مستكتها وباستها ودلعتها

واما زهقت منها برة البيت رميتها

ومش مهم خالص هي قيمتي ايه في حياتها

المهم بس ابقى اي حاجة وبتاعتها

وابقى شايف في الخباثة كل حاجة بيّـنتها

شوف بأه كام ألف واحد ملـّى عينه بفضيحتها

وشوف بأه كام فكرة سافلة جوة منهم حركتها

طاب هي لو بجد هي ازاي عيشيتها

وهي شايفة الناس باعتها واشترتها

ولا مبسوطة بكلمة حسستها

انها في سوق البنات بتزيد قيمتها

وانها أحلى بمراحل من فلانة أنتيمتها

وهي لو ما كانتش هي ازاي حالتها

وهي مش عارفة حاجة أصلا عن خيبتها

وعن صورتها اللي الف عين وعين شافتها

وكل عين نهشت في مفاتنها وكلتها

ما سابتش حتة فيها الا ومصمصتها

المهم تبقى بنت في الآخر يا ريتها

مايكونش واحد كان بيتسرمح في بيتها

وقالها حتجوزك.. بسذاجة كلمة صدقتها

بس قال لنفسه فكك المهم تكون باسطها

فـجت تقول له يصلـّح غلطة كان غِلِطها

ويجيب صورها اللي خدهالها فـ أودتها

فقال في باله دي بصراحة مشكلتها

تبقى تروح تشكي لباباها ولمامتها

اللي هاجروا يعيشوا برة وهي قاعدة لدراستها

وانا عمري كنت حتى من باقيت عيلتها

عشان أصلـّح غلطة أصلا في ربايتها

فمن ندالته خد صورها وراح حاططها

واشتغل بيها صحابه اللي دابوا في أنوثتها

أصله واطي وعقله فاضي وأمه لا مؤاخذة براحتها

وابوه مطلقها تلاتة وهو مـ الآخر حيلتها

وصحابه دول شباب في قلبه حاجات كابتها

تعبوا خلقة من أفلام شالوا رقابتها

وكليبات كتير العري كان جوة حكايتها

معقولة هي دي بلدنا ودول بناتها ورجالتها

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

محمد محمود حامد

احم احم 

سلامو عليكو 

بعيدا عن الملل والمرض اللي انا فيهم دلوقتي 

حبيت اكسر الحالة دي بشعر جميل 

تأليف واحد صديق ع الفيس بوك 

كان في وقت من الاوقات زميل كفاح في رحلة البحث عن الشهرة 

هههههههههههه

بس الحمد لله 

احنا الاتنين فشلنا 

بس هو لسه عنده امل يعني ربنا يوفقه 

وده برضو لينك القصيدة عنده عشان الامانة بقي وكده 

صورة ع الفيس بوك

القصيدة دي عجبتني جدا جدا اول ما قريتها 

لانها فعلا بتوصف صح قوي 

حال ناس كتير 

سواء البنت اللي بتحط صورتها 

او الولد اللي بيستهبل وبيدخل باسم بنت

او كمان الولد اللي بيشوف الصورة دي 

والافكار السافلة اللي بتيجي في دماغه 

علي راي الشاعر يعني 

ههههههههههه

انا مش هتكلم كتير 

هي مش محتاجة كلام يعني 

عموما اتمني انها تعجبكو 

وادعو لصاحبها ربنا يوفقو 

وادعولي ارجوكم ان النتيجة تظهر بسرعة عشان تعبت جدا 

فاصل ونكمل 

.........

انسان عادي